Փաստ ինֆո

Ապարանից քաղաքացիների մի խումբ քայլերթով շարժվում է Երևան: Քաղաքացիների քայլերթը մեկնարկեց աղոթքով, նրանք նաև ծաղիկներ խոնարհեցին Արցախյան պատերազմում զոհված զինվորների շիրիմին:

Երթը գլխավորում է «Հայաստան» խմբակցության պատգամավոր Արթուր Խաչատրյանը.

«Այսօր Հայաստանը դիմագրավում է մարտահրավերների, որոնց առջև վերջին 100 տարիներին կանգնած չի եղել:

Թուրք-ադրբեջանակն հրոսակները չեն թաքցնում իրենց նպատակները՝ ոչնչացնել Հայաստանը և հայ ազգը, քանզի հայ ազգն առանց Հայաստանի և Արցախի գոյություն ունենալ չի կարող: ՀՀ իշխանությունները, փոխանակ բռունցքվելուն և ոխերիմ թշնամիներին հակահարված տալուն, խոսում են հաշտության և խաղաղության մասին, խոսում են միակողմանի զիջումների մասին: Մենք խաղաղությանը դեմ չենք, մենք խաղաղության կողմնակիցներ ենք, մենք հայտարարում ենք՝ քանի Հայաստանը հզոր պետություն չէ, Հայաստանը չի կարող այս տարածաշրջանում խաղաղ ապրել»,-լրագրողների հետ զրույցում ասաց ընդդիմադիր պատգամավորը:

Նշենք, որ քաղաքացիների հաջորդ խումբը քայլերթը կսկսի Սարդարապատից` քիչ անց:

Հիշեցնենք նաև , որ առաջին քայլերթը սկսվել է Տավուշից` պատգամավոր Ասպրամ Կրպեյանի ղեկավարությամբ, որին հետագայում միացավ նաեւ պատգամավոր Աննա Գրիգորյանի ղեկավարած քայլերթը` Տիգրանաշենից:

Նախատեսվում է, որ բոլոր խմբերը Երեւան պետք է հասնեն միաժամանակ։

Աղբյուր` Փաստինֆո