Փաստ ինֆո

Ոստիկանների գործողությունները այս օրերին ակցիա իրականացնող քաղաքացիների նկատմամբ ոչ իրավաչափ են, այդ թվում՝ անհամաչափ ուժ կիրառելու, գույքին վնաս հասցնելու դեպքեր են արձանագրվում: «Փաստինֆո»-ի հետ զրույցում նման գնահատականով է հանդես եկել իրավապաշտպան Ռուբեն Մելիքյանը:

Նրա խոսքով՝ շատ հաճախ ոստիկանները բերման ենթարկելիս վնասվածքներ են պատճառում քաղաքացիներին, լինում են դեպքեր, երբ մարդիկ պնդում են, որ ոստիկանական մեքենաներում են իրենց վատ վերաբերվել.

«Կարելի է ասել՝ ոստիկանությունն ինչպես կա, այնպես էլ մնացել է»,-ասաց իրավապաշտպանը:

Ռուբեն Մելիքյանը միևնույն ժամանակ նկատում է, որ ոստիկանները, որպես կանոն, իրենց իրավաչափ են պահում այն դեպքերում, երբ ակցիայի մասնակիցների թիվը շատ է լինում, իսկ ոստիկանների թիվը բավարար չի լինում ինչ-որ գործողություններ իրականացնելու համար.

«Ապակենտրոն գործողությունները նաև այդ կողմն ունեն, որ ոստիկանությունը չի հասցնում տարբեր տեղեր համապատասխան ուժեր տեղակայել, և երբ ոստիկանների թվաքանակը փոքր է լինում ,ավելի համաչափ են գործում»,-ասաց զրուցակիցը:

Վերջին օրերին հատկապես ակնհայտ է տղամարդ ոստիկանների ներգրավվածությունը կին ակտիվիստներին բերման ենթարկելու գործում:

Թե որքա՞նով է իրավաչափ, որ տղամարդ ոստիկանն է բերման ենթարկում կանանց, փորձագետը նշեց՝ կանանց բերման ենթարկելու մասով օրենքն այդքան կոշտ չէ, բայց անգամ այս դեպքում պետք է օրենքն այնպես մեկնաբանել, որ բերման ենթարկելու գործառույթն իրականացվի կին ոստիկանների կողմից.

«Երբ ունենք իրավիճակ, որ առանձնապես վտանգավոր կին հանցագործի վնասազերծման գործողություն է, այս դեպքում հասկանելի է, բայց եթե անձին վերագրված արարքն ընդամենը ոստիկանի օրինական պահանջը չկատարելն է, այս դեպքում տղամարդ ոստիկանի որոշակի գործողություններ կատարելը տարբեր հարցեր կարող է առաջացնել: Իմ, որպես իրավաբանի, տեսակետն այն է, որ հակակշիռ իրավաչափ շահի խնդիր կա, որը, սեռով պայմանավորված, անձի արժանապատվության իրավունք է, որը պետք է հարգվի: Մենք տեսնում ենք, որ հաճախ այդպես չէ, թեև հանուն արդարության պետք է նշեմ, որ նկատել եմ՝ եթե տղամարդ ոստիկաններին նման հրահանգ են տալիս, նրանք որպես կանեն փորձում են պատշաճության սահմանները չանցնել»,-ասաց Ռուբեն Մելիքյանը:

Աղբյուր` Փաստինֆո