Փաստ ինֆո

Հղի կնոջը վրաերթի ենթարկելու համար Փաշինյանին ուղեկցող անձնակազմի ներկայացուցչին՝ ոստիկանության ծառայողին մեղադրանք դեռևս մեղադրանք չի առաջադրվել։ ՀՀ քննչական կոմիտեից «Փաստինֆո»-ի հարցին ի պատասխան նշեցին, որ ձերբակալման 72 ժամը դեռևս չի անցել, այդ ընթացքում պարզ կլինի՝ մեղադրանք կառաջադրվի, թե ոչ։ ՔԿ-ից հայտնեցին, որ քրեական գործով ձերբակալված այլ անձինք չկան։

Հիշեցնենք, որ երեկ՝ ապրիլի 26-ին՝ ժամը 18.05-ի սահմաններում, Լեո-Պարոնյան-Պռոշյան փողոցների հատվածում Նիկոլ Փաշինյանի կառավարական ավտոշարասյան մեքենաներից մեկը վրաերթի է ենթարկել 28 տարեկան երիտասարդ հղի կնոջ, որը տեղափոխվել էր «Նաիրի» հիվանդանոց, որտեղ մահացել է։ Չի հաջողվել փրկել նաեւ պտղի կյանքը։ Ընդ որում, մեքենա. երիտասարդ կնոջը վրաերթի ենթարկելուց հետո անգամ չի կանգնել՝ պարզելու, թե արդյոք կինը մահացել է, թե ոչ, արդյոք պետք է նրան օգնություն ցուցաբերել, թե ոչ։ Մամուլում հրապարակումներից հետո Փաշինյանի առնչության մասով շտապեց հերքել «Ֆեյքերի» ՊՈԱԿ-ի նախկին ղեկավար Տարոն Չախոյանը, որն այժմ Փաշինյանի աշխատակազմի ղեկավարի տեղակալն է, սակայն, նշեց, որ Փաշինյանն անձամբ մեքենա չի վարում, իսկ հանրահայտ փաստին, որ վրաերթը եղել է Փաշինյանի ավտոշարասյան կողմից՝ որևէ կերպ արձագանք չի եղել։

ՀՀ քննչական կոմիտեից հայտնել են, որ ՀՀ ոստիկանության «Ճանապարհային ոստիկանություն» ծառայության ուղեկցող սպայական վաշտի հրամանատարն իր կողմից վարած «Տոյոտա Պրադո» մակնիշի ավտոմեքենայով վրաերթի է ենթարկել Արարատի մարզի 28-ամյա բնակչուհուն, որի հետևանքով ստացած մարմնական վնասվածքներով վերջինս տեղափոխվել է «Նաիրի» բժշկական կենտրոն, որտեղ գիտակցության չգալով՝ մահացել է:

Նշված ավտոմեքենայի վարորդը դեպքից հետո թողել է ճանապարհատրանսպորտային պատահարի վայրը և հեռացել։ Նույն աղբյուրի փոխանցմամբ՝ վարորդը դեպքի վայր է վերադարձել ժամը 20:05-ին և մասնակցել կատարվող քննչական գործողություններին, երբ դեպքի մասին արդեն հայտնի էր դարձել մամուլին։ Դեպքի առթիվ հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասով և 244-րդ հոդվածի 1-ին մասով, որի շրջանակներում ձերբակալվել է վաշտի հրամանատարը։

Հեղինակ՝ Իզաբել Սահակյան

Աղբյուր` Փաստինֆո