Փաստ ինֆո

Խրամորթի բնակչությունը շարունակում է մնալ տարհանված։ Գյուղում մնացել են միայն տղամարդիկ ու երկու կին։ Մյուս բնակիչները միայն ժամանակ առ ժամանակ գյուղ են գնում՝ տներից անհրաժեշտ իրեր վերցնում ու վերադառնում իրենց ժամանակավոր կեցության վայրերը։ Այս մասին «Փաստինֆո»-ի հետ զրույցում ասում է Խրամորթի բնակիչ Գայանեն, որը գյուղը երբևէ չի լքել։

«Ադրբեջանցիները նույն տեղում են։ Ոնց եկել հաստատվել են, նույն տեղում էլ մնում են։ Հիմա Քարագլխի հատվածում էլ կան խաղաղապահներ, մի քանի հենակետեր ունեն նաև Խրամորթի ներքևի հատվածում՝ մեր ու ադրբեջանցիների արանքում»,-ասում է Գայանեն։

Ավելի քան մեկ ամիս է՝ Գայանեն ու ամուսինը երեխաներին գրեթե չեն տեսնում։ Մարտի 24-ից երեխաներն Իվանյանում են՝ ամուսնու ընկերոջ տանը։ Երեք զավակներն էլ սովորել են ծնողներից հեռու ապրելուն, այլ տարբերակ չունեն։

«Գյուղի բնակչությունը տարհանված է մնում, քանի որ այստեղ՝ այս պայմաններում հնարավոր չէ երեխա պահել։ Ինձնից բացի, մեկ էլ մի ծեր կին է գյուղում։ Գնալու տեղ չունի, ճիշտն ասած»,-ասում է Գայանեն։

Հույսը, որ ադրբեջանցիները հետ կշպրտվեն ելման դիրքեր ու գյուղացիները կվերադառնան իրենց տները, Գայանեի խոսքով, մի մասի մոտ կամաց-կամաց մարում է։ Ամեն դեպքում, Գայանեն, ով նաև կամավորագրվել և դիրքեր էր գնում տղամարդկանց հետ, գյուղից հեռանալ չի պատրաստվում։ Լիահույս է, որ կգա օրը, և Խրամորթում նորից երեխաների անզուսպ ծիծաղը կզրնգա, գյուղը նորից կվերածնվի։

Հիշեցնենք, որ մարտի-ից ի վեր, երբ ադրբեջանական զորքերը ներխուժեցին Փառուխ ու շարժվեցին դեպի Քարագլուխ, Խրամորթի ու Փառուխից տարհանվեցին կանայք ու երեխաները։ Տարհանված բնակչությունը ժամանակավոր ապաստանել է բարեկամների, ընկերների տներում։

Թշնամին, հաստատվելով Քարագլխի հատվածում և ուղիղ նշանառության տակ պահելով գյուղը, անհնար է դարձրել գյուղացիների վերադարձը հայրենի օջախներ։

Աղբյուր` Փաստինֆո