Փաստ ինֆո

Հստակ է, որ ազգն արթնացել է, հստակ է, որ մարդիկ գիտակցել են, որ պետք է քշել այս իշխանություններին, որ ունենանք անվտանգ Հայաստան ու Արցախ և արժանապատիվ ապրող քաղաքացիներ։ Ամփոփելով իրազեկման ակցիաների երկրորդ փուլի առաջին օրը՝ քիչ առաջ Ազատության հրապարակում լրագրողների հետ զրույցում նման գնահատական հնչեցրեց «Հայրենիք» կուսակցության նախագահ Արթուր Վանեցյանը։

«Այսօր ևս նախատեսված են բազմաթիվ միջոցառումներ մեր կողմից, հուսամ՝ կլինեն նաև ինքնաբուխ ակցիաներ քաղաքացիների նախաձեռնությամբ։ Ժամը 18։00-ին կհավաքվենք Ազատության հրապարակում։ Հնարավոր է, որ իրազեկման երթ անենք»,-նշեց Վանեցյանը և հավելեց, որ այսուհետ Ազատության հրապարակում հավաքներ կլինեն ամենօրյա ռեժիմով, ամենայն հավանականությամբ, ժամն անփոփոխ կմնա՝ 18։00։

Վանեցյանը հույս հայտնեց, որ ոստիկանությունը կգործի իր գործառույթների շրջանակում և արկածախնդրության չի գնա, մինչդեռ երեկ ուժի կիրառման դեպքեր են եղել՝ հարվածներ են հասցվել մի քանի ցուցարարների։ Նա նաև համոզմունք հայտնեց, որ ոչ ոստիկանությունը, ոչ էլ որևէ այլ ուժ չի կարող կասեցնել ժողովրդի պոռթկումը։

Լրագրողի այն դիտարկմանը, որ իշխանությունն ընդդիմությանը մեղադրում է նոր պատերազմ հրահրելու մեջ, Վանեցյանը հակադարձեց․ «Պատերազմի թեզն առաջ տանելով՝ իշխանությունները փորձում են ահաբեկել հասարակությանը։ Նոր պատերազմ չի լինելու․ ավելի շուտ՝ պատերազմ լինելու է միայն այն դեպքում, եթե նրանք շարունակեն մնալ իշխանության։ Պատերազմը շարունակվում է․ այն, որ երեկ չէ առաջին օրը ևս մեկ զինվորականի գերեվարեցին, ի՞նչ է, եթե ոչ պատերազմ»։

Վանեցյանը շեշտեց, որ իրենք ևս խաղաղության կողմնակից են, բայց այն չպետք է լինի ի հաշվի Հայաստանի ու Արցախի տարածքային ամբողջականության, և հայը պետք է իր արժանապատվությունը վերականգնի։

Կրկին հիշեցնելով պայքարի նպատակը՝ Վանեցյանը նշեց․

«Մենք իշխանության համար չենք պայքարում․ այն չունի ընդգծված առաջնորդներ։ Մենք այստեղ ենք որպես ՀՀ քաղաքացիներ»։

Աղբյուր` Փաստինֆո