Փաստ ինֆո

Չավուշօղլուի ցույց տված ժեստը ռասիստական, ահաբեկչական կազմակերպության ժեստ էր՝ի ր բոլոր հնարավոր հետևանքներով, սա ևս մեկ անգամ ապացուցում է, որ Թուրքիայի պետական քաղաքականության մեջ անգամ 100 տարի անց ոչինչ չի փոխվել: «Փաստինֆո»-ի հետ զրույցում ասել է ադրբեջանագետ, ԱԺ նախկին պատգամավոր Տաթևիկ Հայրապետյանը՝ մեկնաբանելով Թուրքիայի ԱԳ նախարար Մևլյութ Չավուշօղլու վերջին արարքը: Ինչպես արդեն հայտնել ենք, Ուրուգվայի հայ համայնքը բողոքի ակցիա էր իրականացրել Թուրքիայի դեսպանատան մոտ, որտեղից այդ պահին հեռանում էր Մևլյութ Չավուշօղլուն եւ վերջինս ավտոմեքենայի մեջ նստած «Գորշ գայլեր» խմբավորման սիմվոլիկան էր ցուցադրել տեղում բողոքի ակցիա իրականացնող հայերի ուղղությամբ, ինչին թուրք նախարարին ուղեկցող անձնակազմը արձագանքել էր ծափահարություններով: Ադրբեջանագետ Տաթևիկ Հայրապետյանը մեզ հետ զրույցում ընդգծեց, որ Չավուշօղլուի ցույց տված ռասիստական ժեստը հայտնի «Գորշ գայլեր» ահաբեկչական խմբավորման ժեստն է, որոնց գործունեությունը շատ երկրներում արգելված է: Սա, ըստ փորձագետի, միայն Չավուշօղլուի վերաբերմունքը չէր, այլ՝ Թուրքիայի վարած պետական քաղաքականության դրսևորումն էր.

«Պետական պաշտոնյան շարքային անհատ չէ, սովորական քաղաքացի չէ, դա պետական քաղաքականության դրսևորման նշան էր: Ավելին՝ մինչև 2019թ-ը՝ համավարակի տարածումը, Ստամբուլում երթերը թույլատրվում էին Ցեղասպանության տարելիցի օրերին, այդ ժամանակ անգամ նրանց օգտագործած բառապաշարն էր այլ, չեմ ասում ՝ճանաչում էին Ցեղասպանությունը, բայց զգուշավոր բառեր փորձում էին օգտագործել, իսկ երեկ հայտնի դարձավ, որ երթերն արգելված են, եթե նախկինում համավարակով էր պայմանավորված, հիմա համավարակ չկա, իսկ Ուրուգվայում հայերի ակցիայի ժամանակ Չավուշօղլուն համապատասխան ժեստը ցույց տվեց, որն ինքնին շատ խոսուն էր, հաստատ խաղաղության հրեշտակ չէր նկարել այդ ժեստով»,-ասաց Հայրապետյանը:

Հարցին՝ արդյո՞ք սա ևս մեկ անգամ չի փաստում, որ չնայած հայկական կողմից հնչող խաղաղության կոչերից, Թուրքիան և Ադրբեջանն ամենևին էլ պատրաստ չեն խաղաղության, զրուցակիցն ասաց.

«Անգամ առանց այդ ժեստի էլ պարզ էր, որ պատրաստ չեն խաղաղության, որովհետև իրենք խոսում են հաղթողի դիրքերից, մեզ վերաբերվում են որպես պարտվող, իսկ երբ հաղթողը փորձում է իր պայմաններով խաղաղություն պարտադրել պարտվողին, դա որևէ կերպ խաղաղություն չէ, դա կապիտուլյացիա է »,-ասաց Հայրապետյանը:

Նշենք, որ մինչ այս պահը Հայաստանը պաշտոնապես չի արձագանքել Չավուշօղլուի արարքին, հայկական կողմի արձագանքը եղել է միայն ԱԺ արտաքին հարաբերությունների նախագահ Էդուարդ Աղաջանյանի կողմից, որը, ինչպես Տաթևիկ Հայրապետյանը բնորոշեց՝ շատ անդեմ էր։

«Դա էլ իրենք չէին անի, եթե հանրային լայն արձագանք չունենար Չավուշօղլուի արարքը:

Իշխանությունը գործընթաց է սկսել, ցանկանում է հանրության աչքին թոզ փչել, թե խաղաղության դարաշրջան է բացվում, սակայն իրականում թույլ չեն տալիս տեսնել այն սպառնալիքները, որոնք գալիս են հարևան երկրներից: Իրենք կա՛մ ունակ չեն, կա՛մ էլ ցանկություն չունեն դրանց դիմագրավելու, դրա համար էլ փորձում են ստեղծել զուգահեռ թվացյալ իրականություն, որն իրականության հետ աղերս չունի, խաղաղություն և պատերազմի արհեստական դիսկուրս են ստեղծում, ինչու՞ արհեստական, քանի որ հարցը հստակ է, եթե մեզ վրա հարձակվում են, մենք պաշտպանվո՞ւմ ենք, թե հանձնվո՞ւմ ենք, իսկ իշխանությունը մեզ տրամադրում է հանձնվելուն է, ուրիշ քննարկում չկա, չկա պատերազմի օրակարգով քաղաքական ուժ ո՛չ խորհրդարանում, ո՛չ էլ խորհրդարանից դուրս»,-մեզ հետ զրույցում ասաց Տաթևիկ Հայրապետյանը:

Աղբյուր` Փաստինֆո