Փաստ ինֆո

Ցեղասպանության 107-րդ տարելիցի նախօրեին Թուրքիայի արտգործնախարար Մևլութ Չավուշօղլուի՝ Գորշ քայլերին բնորոշ ժեստը՝ ուղղված Ուրուգվայի հայ համայնքի ներկայացուցիչներին, վերահաստատում է, որ Թուրքիան ու Ադրբեջանը մտադիր են կրկին հայերի ցեղասպանությունը։ Այս կարծիքին է Արցախի ԱԺ պատգամավոր Մետաքսե Հակոբյանը։

Հայաստանի իշխանությունների կողմից Չավուշօղլուի այդ քայլին պաշտոնապես չարձագանքելը, ըստ արցախցի պատգամավորի, պայմանավորված է, այսպես կոչված, խաղաղության օրակարգի առաջմղմամբ․

«ՀՀ ներկա իշխանությունները հանրությանը ամեն կերպ փորձում են հասարակությանը նախապատրաստել խաղաղության կեղծ օրակարգին, բայց Չավուշօղլուն, փաստորեն, ցինիկաբար ցույց տվեց, որ խաղաղություն չի կարող լինել, որ նրանք մտադիր են վերացնել հայ ազգին»։

Այն, որ խաղաղության օրակարգը լրիվությամբ կեղծ է և սահմանագծումը, որը շտապում են իրականացնել Ադրբեջանն ու ՀՀ ներկա իշխանությունները, ոչ միայն թշնամու ախորժակը չի փակելու, այլև ավելի է գրգռելու, տիկին Հակոբյանը չի կասկածում։

«Սողացող պատերազմը, որը հիմա է ընթանում, շարունակվելու է և, այսպես ասած, խաղաղության օրակարգին անցնելուց հետո, ուղղակի, ավելի փոքր սահմաններով հայկական պետության դեմ է լինելու։ Ավելին՝ այդ օրակարգը, ի վերջո, ավելի սարսափելի պատերազմի է հանգեցնելու, քան 44-օրյան էր»,- «Փաստինֆո»-ի հետ զրույցում նման համոզմունք է հայտնել Մետաքսե Հակոբյանը։

Այն, որ օրեր առաջ Ադրբեջանի նախագահը Շուշիում հոխորտաց, թե եթե Հայաստանը սահմանագծման գործընթացը ձախողի, ապա Զանգեզուրին սպասվում է նույն ճակատագիրը, ինչ Արցախին, Հակոբյանի խոսքով՝ նշանակում է, որ Ադրբեջանն Արցախի հարցը համարում է լրիվությամբ փակված։

«Դրա մասին է վկայում նաև այն, որ ադրբեջանցիները ներխուժել ու հաստատվել են Քարագլխի հատվածում ու ետ գնալու մտադրություն չունեն։ Այդպես մաս-մաս նաև Սյունիքն են զավթելու։ Ու այդ մտադրությունը նրանք չեն թաքցնում, բացեիբաց ասում են»,-հավելում է պատգամավորը։

Ուշադրություն հրավիրելով նախ՝ ադրբեջանական տեղեկատվական դաշտում հայտնվող հաղորդագրություններին, ապա ՀՀ ԱԳՆ կողմից պատասխան հայտարարություններին, արցախցի պատգամավորը նկատում է․

«Դա խոսում է այն մասին, որ նրանք աշխատում են փոխհամաձայնեցված․ Հայաստանի իշխանությունները հերթով կատարում են Ադրբեջանի պայմանները։ Ինչ Ադրբեջանը պարտադրում է, նրանք ստրուկի պես կատարում են և շարունակելու են կատարել։ 44-օրյա պատերազմը ևս նրանց պայմանավորվածության կետերից մեկն էր։ Հնարավոր է նաև, որ Ադրբեջանի հետ Հայաստանի ներկա իշխանությունները նախքան 2018 թվականը լինեին պայմանավովածություններ ձեռք բերած»,-ասում է տիկին Հակոբյանը։

Այն, որ Նիկոլ Փաշինյանի գլխավորած իշխանությունն իր պարտվողական քաղաքականությամբ՝ ներառյալ խաղաղության կեղծ օրակարգը, 44-օրյայից ավելի սարսափելի պատերազմի է տանում Հայաստանն ու Արցախը, արցախցի պատգամավորն առավել քան վստահ է։

Աղբյուր` Փաստինֆո