Փաստ ինֆո

Պետության կողմից ՊՆ-ին միջոցներ տրամադրում են, իսկ եթե գույքը Հայաստանի գույքն է եւ ՊՆ-ն գտնում է, որ տվյալ պարագայում այն ոչ մեկին պետք չէ, գործածության համար այն անարդյունավետ է, ի՞նչ անի: Ապրիլի 24-ինԾիծեռնակաբերդի հուշահամալիրում լրագրողների հետ զրույցում նման հայտարարությամբ է հանդես եկել ՀՀ պաշտպանության փոխնախարար Արման Սարգսյանը՝ արձագանքելով ՊՆ-ի գույքը վաճառքի հանելու թեմային:

Ինչպես արդեն տեղեկացրել ենք` ՊՆ-ն վաճառքի է հանել 72 անուն գույք, այդ թվում` զորամասեր:

«Օրինակ, մենք ՔԿՀ-ներ ունենք փակված, եթե դրանց գույքը վաճառվի, դրա մեջ որեւէ մեկը խնդիր տեսնելո՞ւ է: Դա Հայաստանի գույքն է, ոչ թե ՊՆ-ի»,-ասաց նա, սակայն չկարողացավ ասել նախկինում եւս նման դեպք եղել է, թե ոչ:

Լրագրողի այն հարցին, թե օրհասական այս վիճակում, ի՞նչ է արվում բանակն արդիականացնելու համար`փոխնախարարը նշել է. «Այդպես տրագեդիկ մի ներկայացրեք, օրհասական վիճակում չենք: Ամեն ինչ արվում է, մեր բարեփոխումներն արդեն մեկնարկել են: Այն, ինչ արվում է, արվում է ուժեղ բանակ ունենալու համար: Արդյունքները կտեսնեք այն ժամանակ, երբ կուզեք տեսնել: Երբեմն մարդիկ կամ քաղաքական ուժեր կան, որ չեն ուզում տեսնել»:

Ինչ վերաբերում է սահմանների կահավորմանը, ապա, նրա խոսքով, բնագծերի կահավարումը երկարատեւ պրոցես է: «Գիտք, որ վերջին պատերազմի հետեւանքով սահմանի փոփոխություններ են տեղի ունեցել: Բնականաբար, նոր բնագծեր, նոր զբաղեցրած դիրքերը դրանք ժամանակ պահանջող պրոցեսներ են: 1,5 տարվա ընթացքում, եթե համեմատական տանենք, ահռելի աշխատանք է իրականացվել թե զինվորների սոցիալական, թե անվտանգային խնդիրները լուծելու ուղղությամբ», - ասել է նա` առանց մանրամասնելու, թե «ահռելի» աշխատանքն ինչում է դրսեւորվել:

Աղբյուր` Փաստինֆո