Փաստ ինֆո

Երեկ երեկոյան բերման ենթարկված երկու հոգուց մեկն ազատ է արձակվել, մյուսը՝ «Ազատագրում» շարժման ղեկավար Միքայել Բադալյանը, շարունակում է մնալ անազատության մեկ։ Այս մասին քիչ առաջ Ազատության հրապարակում ասել է «Հայրենիք» կուսակցության քաղխորհրդի անդամ Արսեն Բաբայանը։

Լրագրողի հարցին, թե ինչու են ոստիկանները բերման ենթարկել Միքայել Բադալյանին, Բաբայանը պատասխանեց․ «Կասկածներ ունեմ, որ դա կապված է ՌԴ դեսպանության դիմաց հակառուսական քարոզիչների դեմ անցկացված ակցիայի հետ։ Ոստիկանության գործողությունից ակնհայտ էր, որ գործ ունենք քրեական հետապնդման հետ»։

Բաբայանը նաև նշեց, որ իշխանությունները, տեսնելով, թե ինչպես է օր օրի թափ հավաքում շարժումը, ամեն կերպ փորձում են կասեցնել այն, բայց և վստահեցրեց, որ դա նրանց չի հաջողվելու։

Ազատության հրապարակում գիշերող մարդկանց թիվն օր օրի ավելանում է։ 7-րդ օրն է, ինչ այս հրապարակում բողոքի ակցիաներ են իրականացնում տարբեր քաղաքական հայացքների, նախասիրությունների տեր մարդիկ, զոհված զինծառայողների հարազատներ, 44-օրյայի մասնակիցներ, հասարակական գործիչներ, քաղաքականությամբ երբևէ չզբաղված մեծ թվով քաղաքացիներ։ Ապրիլի 17-ից Ազատության հրապարակից մեկնարկած շարժումը հետզհետե մեծ ծավալներ է ընդունում, ընդլայնվում է նաև աշխարհագրությունը։

Երեկ Հայաստան խմբակցության պատգամավոր Իշխան Սաղաթելյանի ելույթից հայտնի դարձավ, որ հանուն Հայաստանի և Արցախի մեկնարկած շարժումը ապրիլի 25-ից նոր թափ է ստանալու՝ շնորհիվ Հանրապետության տարբեր վայրերում նախատեսվող անդադար բողոքի ակցիաների։ Իսկ այսօր երեկոյան՝ 19։15-ին Հանրապետության հրապարակից կմեկնարկի անվանդական ջահերով երթը։

Աղբյուր` Փաստինֆո