Փաստ ինֆո

«Հայրենիք» կուսակցության անդամ Խաչիկ Գալստյանը կարծում է, որ Ազատության հրապարակում իրենց ծավալած ակցիան իր առաջնային նպատակին հասել է, մարդիկ այլևս դիտորդի կարգավիճակում չեն, դուրս են գալիս փողոց:

«Փաստինֆո»-ի հետ զրույցում Խաչիկ Գալստյանը հայտարարեց, որ Ազատության հրապարակը դարձել է համաժողովրդական շարժում
«Երբ Արթուր Վանեցյանը կոչով հանդես եկավ և եկավ Ազատության հրապարակ, ընդամենը 10-20 հոգի էինք, այդ թիվը հիմա տասնապատկվել է, ես ֆանտաստիկ զգացողություններ ունեմ՝ ինչպես է ազգն արթնանում, ինչպես են հասարակության տարբեր խմբեր, ուսուցիչներ, մանկավարժներ, երիտասարդներ, գյուղական համայնքի բնակիչներ գալիս և իրենց աջակցությամբ մեզ ոգևորում, մարդիկ այստեղ գալիս են ընտանիքներով, երեխաներով: Քաղաքացիները հավաքվում են, խոսում ենք, քննարկում, նրանք հասկանում են, որ այսպես այլևս հնարավոր չէ, մարդիկ վճռական են»,-պատմեց Խաչիկ Գալստյանը:

Բանախոսը մեր խնդրանքով անդրադարձավ նաև ապրիլի 19-ի Պուտին-Փաշինյան հանդիպմանը և դրա արդյունքում ընդունված համատեղ հայտարարության և ստորագրված փաստաթղթերին:

Ըստ Խաչիկ Գալստյանի՝ Մոսկվայում ընդունված հայտարարությունը փաստաթուղթ է ոչնչի մասին.

«Այս փաստաթղթերն, ըստ էության, ջուր են, դատարկություն: Մեր կենսական շահերի տեսանկյունից ոչինչ չտվող փաստաթուղթ է, Արցախի անվտանգության ապահովման երաշխիքների, և այլնի մասին խոսք չկա»,-ասաց Գալստյանը: Նրա բնորոշմամբ՝ իշխանությունները որդեգրել են լարախաղացի քաղաքականություն, Խաչիկ Գալստյանի խոսքով՝ իշխանությունները «քյանդրբազի» նման աշխարհաքաղաքական խաղեր են տալիս, արդյունքում կործանվում է պետությունը, վտանգվում է ժողովրդի անվտանգությունը.

«Իրենք պատկերացում չունեն՝ ի՞նչ է աշխարհաքաղաքականությունը, սրանց թվում է, թե աշխարհն իրենց շուրջ է պտտվում և հեղափոխական էյֆորիայի տակ իրենց համարում են համաշխարհային հեղափոխության առաջնորդներ, որոնք կարող են պատմության անիվը շրջել, բայց այդ անիվի մեջ իրենք ընդամենը «վինտիկներ են»»,-ասաց Խաչիկ Գալստյանը:

Աղբյուր` Փաստինֆո