Փաստ ինֆո

Հովիկ Աբրահամյանի՝ արգելանքի տակ գտնվող առանձնատան վաճառքի հարցով ԱԱԾ քննչական դեպարտամենտում հարուցված է քրեական գործ, որի շրջանակում կպարզաբանվի, թե ինչու այդ իրավիճակում ունեցանք պրակտիկայից տարբերվող վիճակ։ Այս մասին ԱԺ-ում տեղեկացրեց ՀՀ գլխավոր դատախազ Արթուր Դավթյանը՝ պատասխանելով պատգամավորի հարցին, թե արդյո՞ք դատախազության կողմից քրեական գործերի հանդեպ ոչ պատշաճ հսկողությո՞ւնն է պատճառը, որ նման դեպքեր են գրանցվում։ 

Արթուր Դավթյանը նախ նշեց, որ իրենք աշխատանքային շփում, օրենքով նախատեսված համագործակցություն են ունեցել նախաքննական մարմնի հետ։ Նրա պարզաբանմամբ՝ երբ գույքի հետ կապված նախաքննական մարմինը սահմանափակումներ է կիրառում, դա կիրառվում է դատավարական որոշմամբ, որից տեղյակ էին ու ստուգել են դրա օրինականությունը, այսինքն՝ գիտեին, որ կոնկրետ գույքի հանդեպ կա օրինական սահմանափակում։

«Կոնկրետ այս իրավիճակում, պատկերացրեք, մենք բողոքարկման ժամկետի կեսին ենք, պատրաստել ենք բողոք եւ մեկ էլ տեղեկանում ենք, որ նախաքննական մարմինն արդեն իսկ այդ սահմանափակումը հանելու ուղղությամբ գործողություններ է կատարել։ Այս իրադրության պայմաններում դատախազին ինչ էր մնում անելու, մնում էր՝ քննիչի ձեռքը բռնած պահել »,- նշեց Դավթյանը՝ հավելելով, որ այո, իրավական հարց է վիճարկվում, բայց իրենք՝ որպես քրեական հետապնդման մարմին, ունեցել են պրակտիկա, որ դա կատարվում է այն ժամանակ, երբ որոշումն օրինական ուժի մեջ է մտնում՝ բողոքարկման ընթացակարգերը սպառված լինելու իմաստով։

Նրա խոսքով՝ Վճռաբեկ դատարանն այս հարցով դեռեւս չունի նախադեպային որոշում կայացված, դատավարական պրակտիկայում դատավորների մոտեցումները տարբեր են, սակայն քրեական հետապնդման մարմինները բոլորը միակարծիք էին այդ հարցում։

«Սա մեզ համար անակնկալ լինել չէր կարող։ Քննիչը պետք է սպասի մեր բողոքարկման արդյունքին։ Նկատի ունենալով, որ ունեցել ենք ձեւավորված պրակտիկայի հանդեպ այլ իրադրություն եւ պարզել ենք, որ օրերի ընթացքում տեղի են ունեցել նաեւ գույքի հետ կապված գործարքներ, մեր մոտ հիմքեր են առաջացել՝ այդ հանգամանքները ստուգելու։ Դրա համար ԱԱԾ քննչական մարմնում հարուցված է քրեական գործ, որի շրջանակում կպարզաբանվի, թե ինչու այդ իրավիճակում ունեցանք պրակտիկայից տարբերվող իրավիճակ։ Արդյո՞ք դա կապ ունի գործարքի հետ, հետագայում կատարված գործողությունների հետ։ Սա է իմ տարակուսանքը»,- պարզաբանեց Դավթյանը։

Աղբյուր` Փաստինֆո