Փաստ ինֆո

Ոստիկանապետի տեղակալը իրականությանը չհամապատասխանող տեղեկություն է հայտնել։ Նման հայտարարություն է տարածել Հայրենիք» կուսակցության քաղխորհրդի անդամ Արսեն Բաբայանը։

«Ես, որպես Ազատության հրապարակում տեղի ունեցող շտապ հավաքի պաշտոնական կազմակերպիչ պաշտոնապես հայտնում եմ, որ ոստիկանապետի տեղակալ Հ.Ֆիդանյանի հայտարարությունն իրականությանը չի համապատասխանում, իսկ օրենսդրական կարգավորումները մեկնաբանվել են չափից դուրս սուբյեկտիվ:

Այսպես,

1. հավաքների ազատությունը սահմանադրական իրավունք է, որի իրացումը չի ենթադրում որևէ պետական կառույցի թույլտվություն:

2. Ինքնաբուխ կամ մինչև 100 հոգու մասնակցությամբ հավաքների համար որևէ իրազեկում չի պահանջվում: Նախատեսված է միայն 1 պայման, այն է՝ կազմակերպչի կողմից ոստիկանությանը հայտնելը և ներկայանալը, որի նպատակն է ոստիկանության պարտականություն հանդիսացող աջակացություն ստանալը:

3. Բոլոր այն դեպքերում, երբ մասնակիցների քանակն անցել է 100 հոգին՝ իմ կողմից լիազոր մարմնին ներկայացվել է պատշաճ իրազեկում: Այդպիսի իրազեկումները բազմաթիվ են: Այդ իրազեկումներում ներկայացվել են այմ բոլոր միջոցները, որոնք օգտագործվում են հավաքի ընթացքում: Միջոցների ցանկում ընդգրկված են նաև վրանները, ինչը նշանակում է, որ ոստիկանությունը կամ որևէ այլ պետական մարմին իրավունք չունի արգելելու դրանց օգտագործումը:

4. Ինչ վերաբերվում է նախապես իրազեկմամբ հավաք անցկացնելու կանոնին, ապա այդ ռեժիմն օրենքը նախատեսում է միայն նախապես պլանավորված հավաքի համար: Այդպիսի օրինակ է ապրիլի 25-ից նախատեսված հավաքները, որոնց մասին նախապես իրազեկումս քաղաքապետարանն ընդունել է ի գիտություն:

Այսպիսով, ոստիկանությանը հորդորում եմ չկաշկանդվել քաղաքական իշխանության կամայականություններով և վախերով, պահպանել օրենքի ոգին ու տառը և չդիմել սադրիչ գործողությունների:

Ոստիկանության կողմից ձեռնարկված ցանկացած ապօրինի գործուղության հետևանքների ամբողջ պատասխանատվությունը կրելու է հենց ոստիկանությունը:

Ոստիկանության պետի տեղակալի հայտարարությունների առնչությամբ հրավիրում եմ ՄԻՊ-ի ուշադրությունը»:

Ինչպես արդեն տեղեկացրել ենք՝ ոստիկանությունը Ազատության հրապարակում նստացույց ու հացադուլ սկսած ընդդիմադիրներին՝ մասնավորապես «Պատիվ ունեմ» դաշինքի ղեկավար Արթուր Վանեցյանին եւ 44-օրյա պատերազմի մասնակից երկու տղաներին թույլ չէր տվել վրան տեղադրել, որպեսզի պաշտպանվեն ցրտից ու արեւից:

Կառավարության այսօրվա նիստից հետո ոստիկանապետի տեղակալ Արա Ֆիդանյանը պատասխանելով հարցին՝ ինչո՞ւ ոստիկանությունը թույլ չի տալիս Ազատության հրապարակում վրաններ տեղադրել, հայտարարել է, թե. «Խնդիրը բացառապես իրավական է: Մենք ունենք հավաքների անցկացման վերաբերյալ համապատասխան իրավակարգավորումներ, դրա վերաբերյալ օրենք եւ առաջնորդվում ենք տվյալ օրենքի դրույթներով»: Ըստ փոխոստիկանապետի, հավաքներ անցկացնելու վերաբերյալ պետք է լինեն համապատասխան ծանուցումներ, որոնց ընդունման դեպքում միայն հնարավոր կլինի տեխնիկական կամ այլ բնույթի սարքավորումներ տեղադրել»:

ց

Աղբյուր` Փաստինֆո