Փաստ ինֆո

Ապրիլի 25-ից ամբողջ Հայաստանով սկսում ենք անդադար բողոքի ակցիաներ, գործողություններ։ Ապրիլի 25-ից ՀՀ մարզերի չորս խորհրդանշական վայրերից քայլերթով կշարժվեն դեպի մայրաքաղաք Երևան։ Քիչ առաջ նման հայտարարությամբ հանդես եկավ «Հայաստան» խմբակցության պատգամավոր Իշխան Սաղաթելյանը։

«Մենք մեր ամբողջ ռեսուրսով, մեր հազարավոր հայրենակիցներով ու աջակիցներով դուրս ենք գալիս փողոցային պայքարի՝ այս ազգակործան իշխանություններին հեռացնելու նպատակով։ Սա պայքար չէ հանուն իշխանության։ Սա պայքար է հանուն հայկական Արցախի, հանուն պետականության։ Սա մեկ ուժի, մեկ կուսակցության, կազմակերպության կամ անհատի պայքար չէ․ սա համաժողովրդական պայքար է, որը պետք է վերածվի համազգային դիմադրության»,-ասաց Սաղաթելյանը՝ իրավիճակի լրջությունը գիտակցող բոլոր քաղաքացիներին կոչ անելով միանալ ապակենտրոն շարժմանը և դառնալ դիմադրության շարժման առաջամարտիկը։

«Սիրելի՛ հայրենակից, դու չես պայքարում մեզնից որևէ մեկին իշխանության բերելու համար․ դու պայքարում ես քո, քո զավակի համար, քո ծնողների համար, հայ մարդու արժանապատիվ ապագայի համար, ազատ անկախ ապրելու իրավունքի համար։ Այս պայքարը գոյութենական պայքար է, այլընտրանք չկա, նահանջ չկա»,-հայտարարեց Սաղաթելյանը։

Ընդդիմադիր պատգամավորը նաև նշեց, որ ապրիլի 25-ից սկսած յուրաքանչյուր օր գործողությունների ծրագրի մասին հանրությունը տեղեկացվելու է ամենժամյա ռեժիմով։

Աղբյուր` Փաստինֆո