Փաստ ինֆո

Իրեն ժողովրդավար համարող և «ժողովրդավարություն» բառն անգիր արած ներկա իշխանությունը և քաղաքական ուժն օրեցօր ավելի ու ավելի է մարգինալության դաշտ տեղափոխվում։ Սեփական վախերի ձեռքը կրակն ընկածն ու մնացած ընկածները, բանը հասել է նրան, որ պատգամավորներին արգելում են ԱԺ նիստերի դահլիճում նախատեսված խորհրդարանական լսումներ անցկացնել։ Այսինքն՝ պատգամավորի՝ օրենքով նախատեսված լիազորություններն են սահմանափակում։ Բացատրությունը, թե՝ տեխնիկական խնդիրներ կան՝ ըստ ընդդիմադիրների՝ուղղակի «ապօրինի խոչընդոտում» է նշանակում։ Իրականում՝ պարզից էլ պարզ է, հանրության տարբեր շերտերում կուտակվող էներգիայից են սարսափում իշխանությունները։

Ի դեպ, իշխանության այս՝ խորհրդարանական ընդդիմադիրներին խոչընդոտելու քայլն ուղղակիորեն նրանց դեպի Ազատության հրապարակ տարավ, ուր օրվա ընթացքում տարբեր քաղաքական և հասարակական ուժերի համակիրների հոսք կա, որը գնալով ընդգրկուն է դառնալու։

Հետաքրքիր խորհրդածությունների առիթ է տալիս Ազատության հրապարակը։

Հատկապես, երբ մոտենում ես 44-օրյայի հերոս տղաների տաղավարին։ Տղերքը հացադուլը չեն դադարեցնում, որքան էլ՝ բոլորս հորդորում ենք, խնդրում։ Զոհված զինվորների ծնողներն էլ դեռ երեկ կեսօրին նույն տաղավարի մի անկյունում շատ անհարմար տեղավորվել էին։

Բնականաբար, այս անսիրտ, անհոգի հակահումանիստական իշխանության վերաբերմունքը տեսնելով միանգամից աչքիդ առաջ են գալիս 2008-ի փետրվարի վերջին Ազատության հրապարակն ամբողջովին վրաններով պատած լևոնանիկոլականները, որոնց վրանային «տնտեսությունը» եթե համեմատելու լինենք այսօրվա ընդդիմադիրների պայքարի համեստ «նստավայրի» հետ, պիտի շատ հստակ ձևակերպենք՝ ահավասիկ՝ «մարդու իրավունքները իրապես կարևորող նախկինների» ժամանակվա ընդդիմությունը, և ներկա՝ այսպես կոչված՝ «ժողովրդավարական», սակայն՝ իրականում՝ անմարդկային և բռնապետական իշխանությունների վարքաբանությունը։

Վերջինիս վկայությունն առանձնապես և հատկապես փաստում է Ազատության հրապարակում քնող-արթնացող ոստիկանական հսկայածավալ և զանգվածային ներկայությունը։ Մի տեսակ շատ ակնհայտ է, որ նրանց համար Ազատության հրապարակն ընդամենը «տեղամաս» է, որ հրահանգված է հսկել, պահել․․․

Պատկերացնու՞մ եք՝ եթե այս՝ փաշինյանական «ժողովրդավարները» պատերազմի մասնակից հացադուլավոր երիտասարդներին մի փոքրիկ վրանն անգամ արգելել են տեղադրել, բնականաբար, ո՛չ ՄԻՊ-ի և ո՛չ էլ առողջապահության նախարարի ի պաշտոնե այցելելու, տղաների ինքնազգացողությամբ, առողջությամբ հետաքրքրվելու մասին խոսք լինել չի կարող։ Կույր ու խուլ, նեղկուսակցական են այս պաշտոնյաները։

Իսկ միգուցե «ժողովրդավար» իշխանությունը վախենու՞մ է վրաններից, հիշելով, թե ինչեր էր հայտնաբերել ոստիկանությունն իրենց վրանների տակ։

Լուսանկարը՝ Վիքիպեդիայից

Աղբյուր` Փաստինֆո