Փաստ ինֆո

Ապրիլի 17-ից Ազատության հրապարակից մեկնարկած իրազեկման անժամկետ ակցիան շարունակվում է, օրվա ընթացքում սպասվում են տարբեր քննարկումներ՝ այդ թվում հայ-թուրքական հարաբերությունների վերաբերյալ, հանրային գործիչների կողմից դասախոսություններ, իսկ երեկոյան՝ ակցիա։ Այս մասին քիչ առաջ Ազատության հրապարակում լրագրողների հետ զրույցում ասաց «Հայրենիք» կուսակցության նախագահ Արթուր Վանեցյանը՝ չմանրամասնելով, թե մասնավորապես ինչ ակցիա է նախատեսվում օրվա ավարտին։

Անդրադառնալով Ցեղասպանության հարցում հայկական պահանջատիրության կարևորությանը՝ Վանեցյանը շեշտեց՝ Հայաստանի հետ սահմանը փակել է Թուրքիան․եթե առանց նախապայմանների պատրաստ են բացել, ապա ինչո՞ւ չեն բացում։

«Թուրքական իշխանութուններն ասում են՝ եթե ուզում եք հարաբերությունները կարգավորել, ապա պետք է հրաժարվեք պահանջատիրությունից։ Ոչ ուղիղ ձևով նաև մեր Սահմանադրության հիմքը՝ Անկախության հռչակագիրն են ուզում փոխել, որի մեջ հստակ ամրագրված է, որ ՀՀ-ն պահանջատեր է Ցեղասպանության ճանաչման հարցում»,-նշեց Վանեցյանն ու հավելեց, որ թուրքական այդ պահանջներին այս իշխանությունները որևէ կերպ չեն արձագանքում, հակառակը՝ սահմանադրական, այսպես կոչված, բարեփոխումների գործընթացներ են նախաձեռնում, որին եթե չընդվզենք, նրանք նաև դա կանեն։

Հայ-թուրքական հարաբերությունների կարգավորումը, ըստ Վանեցյանի, ընդհանուր առմամբ, ողջունելի է, բայց՝ առանց նախապայմանների։

Հիշեցնենք, որ ապրիլի 17-ից «Հայրենիք» կուսակցության նախագահ Արթուր Վանեցյանը հայտարարեց, որ իր աշխատասենյակը տեղափոխվում է Ազատության հրապարակ, հաջորդ օրը պայքարին միացած 44-օրյայի մասնակցիներ Նվեր Կիրակոսյանն ու Արթուր Ավագյանը հացադուլ հայտարարեցին, նստացույցին միացավ «Սև հովազ» ջոկատը, պատերազմի ավագ սերնդի ներկայացուցիչները։

Ապրիլի 19-ից իրազեկման արշավներ է սկսել նաև «5165» շարժումը, իսկ երեկվանից հացադուլ հայտարարած իր զինակից ընկերներին է միացել Մնացական Ավետիսյանը։

Աղբյուր` Փաստինֆո