Փաստ ինֆո

«Ազգային անվտանգություն» կուսակցության նախագահ Գառնիկ Իսագուլյանը համոզված է, որ Ազատության հրապարակում ծավալված պայքարը հաջողելու է և հասնելու իր նպատակին:

«Փաստինֆո»-ի հետ զրույցում քաղաքական գործիչը կարծիք հայտնեց, որ երկուշաբթի օրվանից պայքարը նոր թափ է հավաքելու. «Այս ակցիաները տարբերվում են նախորդ հավաքներից, մարդիկ խումբ-խումբ հավաքվում, քննարկումներ են ունենում, քննարկումների շրջանակը լայնանում է: Ես վստահ եմ, որ երկուշաբթի օրվանից մեծ թափով մեզ կմիանա նաև ուսանողությունը, երիտասարդությունը, մարդիկ չեն կարող անտարբեր մնալ»։

Ազատության հրապարակում պայքարը սկսվեց Նիկոլ Փաշինյանի՝ ԱԺ-ում հնչեցրած հայտարարությունից հետո առ այն, որ միջազգային հանրությունը պահանջում է Արցախի կարգավիճակի հարցում իջեցնել նշաձողը:

Հակադարձելով Փաշինյանի այս հայտարարությանը՝ Իսագուլյանը նշեց. Փաշինյանը նախ թող պարզաբանի՝ ի՞նչ ասել է միջազգային հանրություն, ո՞վ է այդ միջազգային հանրությունը.
«Կարո՞ղ է այդ միջազգային հանրությունն Աննա Հակոբյանն է, իր դուստրերն են, որդին է կամ նորանշանակ ՊՆ նախարարը։ Թող ասի տեսնենք՝ միջազգային հանրությունն իր ականջի՞ն է փսփսացել։ Ընդամենը երկու օր առաջ Պուտինի հետ հայտարարություն ստորագրեց, այնտեղ նման բան չկար, որ միջազգային հանրությունը պահանջում է:

«Նիկոլի հերթական ստերն են, մարդը եթե 5 րոպե սուտ չխոսի, ֆիզիկապես կոչնչանա»,-ասաց Իսագուլյանը:

Ինչ վերաբերում է իշխանության խոստացված «խաղաղության դարաշրջանին», զրուցակիցը պնդեց՝ խաղաղության դարաշրջան՝ նշանակում է պատերազմ.

«Նիկոլն ինչ ասում, հակառակն է անում, ասաց՝ Արցախը Հայաստան է ու վերջ, Արցախը նվիրեց թուրքին, հիմա էլ ասում է ՝ խաղաղության դարաշրջան եմ բերում, ստում է, բերելու է ավեր և ավար, սա է Նիկոլը: Կարծում եմ օր առաջ պետք է այս իշխանություններին հեռացնել, որ պատերազմի դարաշրջան չսկսվի, որ հայ ժողովրդին իր բնօրրանում չկոտորեն: Այս մարդը երկիրն ամբողջությամբ ուզում է տալ, Արցախը միանգամից, Հայաստանն էլ՝ մաս-մաս, որպեսզի իր զոմբիներին կարողանա զոմբիացած պահել»,-ասաց Գառնիկ Իսագուլյանը:
Մեր այն դիտարկմանը, որ հասարակության մեծամասնությունը անտարբեր է տեղի ունեցող գործընթացների նկատմամբ և անհաղորդ է վտանգին՝ քաղաքական գործիչն ընդգծեց՝ այստեղ մեծ է հատկապես նախկին իշխանությունների մեղքը.
«Երբ հասարակական կազմակերպություններ էին բացվում, ես, որպես անվտանգության հարցերով խորհրդական, զեկուցագրեր գրել եմ ժամանակին: Հասարակությունն այս ընթացքում դաստիարակության առումով դեգրադացիա ապրեց: Նախորդ իշխանությունն էլ պետք է խոստովանի, որ հասավ դեգրադացիայի այն աստիճանի, որ մանիպուլյատոր, ստախոսի իշխանության բերեցին »։ Այդուհանդերձ, նա կարծում է, որ հասարակությունը կամաց-կամաց ուշքի է գալիս.

«Մարդիկ առաջ ասում էին՝ Նիկոլն է ասել ու վերջ, իսկ հիմա խմբերով քննարկում են իր ասածը, այսինքն՝ սկսել են կասկածի տակ դնել Նիկոլի ասածները, սա նշանակում է, որ մարդիկ կամաց-կամաց զոմբիացած վիճակից դուրս են գալիս»,-արձանագրեց Գառնիկ Իսագուլյանը:

Աղբյուր` Փաստինֆո