Փաստ ինֆո

Հայաստանում այսօր կա մեկ, ընդ որում, համահայկական պահանջ՝ միասնության, սակայն, դա պետք է տեղի ունենա այնպիսի մարդկանց շուրջ, ովքեր արատավորված չեն, պիղծ չեն, ովքեր հավատ են ներշնչում, ովքեր անցյալ ու կենսագրություն ունեն, ովքեր թաթախված չեն հարազատ ժողովրդի արյան մեջ և նրանց չեն կեղեքել։ Այս համոզմամբ է վերջին օրերին Ազատության հրապարակ գալիս ազատամարտիկ Պավլիկ Մանուկյանն, այս կերպ միանալով տեղում բողոքի ակցիա իրականացնող իր մարտական և գաղափարակից ընկերների նախաձեռնությանը։ 

«Մեզ առաջիկայում շատ ավելի լուրջ և վտանգավոր զարգացումներ են սպասվում։ Երեկ հայտարարեցին, որ ցանկանում են ընդունել զենքի օրինականացված վաճառքի մասին օրենքը։ Եթե սա տեղի ունենա, կնշանակի բացառապես և միայն մեկ բան՝ մեր վրա բաբելոնյան կրակ են ուզում թափեն, մեզ եղբայրասպան են ուզում դարձնեն։ Պատկերացնո՞ւմ եք՝ ինչ կկատարվի այդ պարագայում այստեղ՝ մեր երկրում կամ այս հրապարակում… Հասկանո՞ւմ եք, օրենքն արդեն քննարկման է դրվել, իսկ սա աղի և աղամանի պատմություն չէ, սա անհամեմատ վտանգավոր ու լուրջ բան է։ Մինչդեռ մեր զինվորների պահեստատուփերը դատարկ և կապարակնքված են, իսկ սահմանամերձ գյուղերին, որոնց պետք էր առաջնահերթ կերպով զենք, զինամթերքով ապահովել, չի արվում»,- «Փասինֆոյին» ասել է այս պահին Ազատության հրապարակում գտնվող ազատամարտիկ Պավլիկ Մանուկյանը։

Անդրադառնալով Փաշինյանի՝ Մոսկվա կատարած պետական այցին ու դրանից սպասվող ակնկալիքներին, Պավլիկ Մանուկյանը նկատում է՝ ինչ էլ այդ մարդն անի Մոսկվայում՝ քամին տանելու է.«Ինչպես հասկացա, նա այնտեղ որևէ անդառնալի փաստաթուղթ, գոնե այս այցի ընթացքում, չի ստորագրել։ Թեև, ինչ էլ որ նա արել է մինչ այս և դեռ՝ ինչ էլ կհասցնի անել, այդ ամենն ի չիք են դառնալու՝ ազգային և պետական շահ հետապնդող ու դրանց համար պայքարող մարդկանց համատեղ ուժերով։ Այնքա՜ն ստորագրություններ են առ ոչինչ դարձել, այնքան ավելի կարևոր ստորագրություններ են օդից կախված մնացել, սրա պարագան ևս բացառություն չի լինելու»։

Ազատամարտիկը նկատում է՝ ոչ մի պահ չի մոռանում, թե ում դեմ է պայքարի դուրս եկել Հայաստանի Հանրապետությունն ու Արցախը և ի՞նչ վտանգներ են իրենցից ներկայացնում մեր թշնամիներ՝ Թուրքիան և Ադրբեջանը. «Ես զինվորական գործիչ եմ և շրջահայացորեն նայում եմ ու հետևում մեր երկրի սահմաններին կատարվող զարգացումներին։ Հիմա մի այնպիսի իրավիճակ է ստեղծվել, երբ բոլոր կողմերից՝ ներսից թե դրսից, աղաղակում են՝ շուտ արեք, արագացրեք, անենք, գործն ավարտվի գնա, հանենք Նիկոլին։ Մյուս կողմից էլ՝ Ադրբեջանն է հոխորտում, թե արագացրեք սեղմ ժամկետների մեջ ստորագրեք, այսպես կոչված, Խաղաղության պայմանագիր կոչվածը։ Իսկ ես ձեզ ասում եմ՝ մի՛ շտապեք, այս շտապողականությունը մեզ ոչ մի լավ տեղ չի տանելու։ Իհարկե և՛ նախկինում, և՛ առավել ևս հիմա, ես ասում էի՝ Նիկոլին պետք է աղբամանը նետել։ Կրկնում եմ՝ հիմա էլ նույնն եմ ասում, բայց դա պետք է անել առանց շտապելու, մտածված և ճիշտ հաշվարկված քայլերով, որպեսզի ավելի չբարդացնենք մեր, առանց այն էլ՝ բարդ իրավիճակը, որը բազմաթիվ վտանգավոր ծուղակներով է լի»,- ասում է ազատամարտիկն ու հավելում՝ իրենց այնքան էլ չի մտահոգում ամեն գնով՝ արագ իշխանափոխություն կատարելու գաղափարը։ Առաջինն, ինչի մասին հիմա մտածում են ինքն ու իր մարտական և գաղափարակից, համախոհ ընկերները՝ միասնականություն ապահովելն է։

Աղբյուր` Փաստինֆո