Փաստ ինֆո

Մի քանի օրից կտեսնեք պայքարի տարբեր ձևեր և հետո մենք բոլորս կհավաքվենք այստեղ։ Այս մասին այսօր Ազատության հրապարակում լրագրողների հետ զրույցում ասաց «Պատիվ ունեմ» խմբակցության պատգամավոր Թագուհի Թովմասյանը։

Մոտ օրերս ավելի կոշտ քայլերի գնալու հնարավորությունը պատգամավորը չբացառեց․

«Այդ քայլերն անելու համար կրիտիկական զանգված պետք է հավաքվի, անհրաժեշտ է քաղաքացիների կոնսոլիդացիա, դրան ենք սպասում։ Մեզնից պահանջվում էր գործողություն, որը մենք սկսել ենք, հիմա քաղաքացիները պետք է միանան։ Ես կարծում եմ, որ նրանք կմիանան, և մենք բոլորս կհաջողենք։ Ուզում եմ ձեզ հավաստիացել, որ մեկ-երկու օրում որևէ փոփոխություն երբևէ տեղի չի ունեցել։ Հասկանում եմ ձեր շտապողականությունը, բայց պետք է հասկանալ՝ գործողությունների մեկնարկը տրված է, սպասում ենք համապատասխան վիճակի»։

«Փաստինֆո»-ի հարցին՝ ընդդիմադիր երկու խմբակցությունների գործողությունները համաձայնեցվա՞ծ են արդյոք, պատգամավորը պատասխանեց․ «Այո, Հայաստանում երբևէ չի եղել խորհրդանական ընդդիմություն, որ այնքան սինքրոն է աշխատել, ինչպես «Պատիվ ունեմ»-ն ու «Հայաստան»-ն են։ Մենք իրար հետ համաձայնեցված ենք աշխատում․ սա պայքարի մեր հատվածն է, «Հայաստան» դաշինքը կիրակացնի պայքարի իր մասը, և հետո ինչ-որ պահի կմիանանք»։

Ընդդիմադիր պատգամավորը վստահեցրեց, որ շարունակելու են խորհրդարանական բոյկոտը, որևէ նիստի չեն մասնակցելու և իրենց գործողությունները շարունակելու են Ազատության հրապարակում։ Մանդատները վայր չդնելու գլխավոր պատճառը, ըստ Թովմասյանի, հնարավոր իշխանափոխության դեպքում դրանց անհրաժեշտությունն է։

«Հնարավոր իշխանափոխությունն անպայման իրականացվելու է Խորհրդարանի միջոցով և պետք են լինելու պատգամավորներ։ Մանդատները վայր դնելով խորհրդարանը չի լուծարվում, ցավոք, այլապես վաղուց դա արած կլինեինք»,-նշեց Թովմասյանը։

Աղբյուր` Փաստինֆո