Փաստ ինֆո

Այս երկու օրվա մեջ շփվել եմ հազարավոր մարդկանց հետ՝ մարդիկ, որոնք ինֆորմացված չեն, որոնք զոհ են դարձել իշխանական մամուլին, սոցիալական ցանցերով տարածվող կեղծ տեղեկատվությանը։Այս մասին Երևանի կենտրոնում քայլերթի ընթացքում ասաց «Հայրենիք» կուսակցության նախագահ Արթուր Վանեցյանը։

Նրա արձանագրմամբ՝ Արցախի Ազգային ժողովում հնչած հետևյալ միտքը՝ Արցախը բեռ չէ, Արցախը զրահաբաճկոն է, շատ խոր իմաստ ունի։ «Ես ուզում եմ, որ մարդիկ հասկանան՝ Արցախը հանձնելով իրենք ոչ լավ են ապրելու, ոչ էլ՝ անվտանգ, ընդհակառակը՝ Արցախը հանձնելուց հետո խոսք է բացվելու Սյունիքը, Գեղարքունիքը հանձնելու մասին։ Իսկ պատերազմ՝ այն էլ պարտվողական, լինելու է միայն այն դեպքում, եթե այս իշխանությունները շարունակեն պաշտոնավարել»,-նշեց Վանեցյանը և հավելեց, որ Արցախի ԱԺ-ից ևս պատգամավոր է միացել իրենց։

«Հարգելի քաղաքացիներ, դո՛ւրս եկեք ասե՛ք ձեր խոսքը, դո՛ւրս եկեք և ցույց տվեք, որ դուք չեք լիազորել այս իշխանություններին հանձնել ձեր հայրենիքը։ Ես դիմել եմ այս քայլին, որովհետև մենք պետք է ցույց տանք Նիկոլ Փաշինյանն ու իր խմբակին, որ իրենք չեն կարող ողջ ժողովրդի անունից խոսել Արցախն ու Հայաստանը թշնամուն հանձնելու մասին և չստանալ հակադրությունը։ Եվ այս հակադրությունը պետք է վերածվի համաժողովրդական շարժման, որպեսզի ձևավորվի ազգային իշխանություն,որը կսպասարկի Հայաստանի և Արցախի շահերը»,-հայտարարեց Վանեցյանը։

Հիշեցնենք, որ Արթուր Վանեցյանը ապրիլի 17-ին հայտարարեց անժամկետ պայքար սկսելու մասին՝ հայտարարելով, որ պահը կրիտիկական է ու այլեւս տուն չի գնելու մինչեւ չհեռացնեն այս իշխանություններին։ Անցած երեք օրերի ընթացքում բողոքի ակցիան ձնագնդի նման մեծանալու նշաններ է ցույց տվել. 44 օրյա պատերազմի երկու մասնակից ապրիլի 18-ից հացադուլ են հայտարարել, իսկ այսօր պատերազմի ավագ սերնդի ներկայացուցիչները հայտարարել են նստացույցի մասին։ «Ազատության» հրապարակում ակցիա են իրականացնում նաեւ «Սեւ հովազ» ջոկատի լեգենդար հրամանատար, պատերազմում զոհված Ռուստամ Գասպարյանի եղբար Սերոբ Գասպարյանն ու իր կողմնակիցները, իսկ 5165 կուսակցության նախագահ Կարին Տոնոյանն էլ հայտարարեց, որ ժամանակավորապես կասեցնում են կուսակցության գործունեությանը ու միանում Փաշինյանի հրաժարականի պահանջի շարժմանը ու կարմի ժապավենով իրազեկող ակցիա նախաձեռնել Երեւանում՝ ցույց տալու, որ Փաշինյանը հատել է բոլոր հնարավոր կարմիր գծերը։

Աղբյուր` Փաստինֆո