Փաստ ինֆո

ՀՀ երկրորդ նախագահ Ռոբերտ Քոչարյանի և ՀՀ նախկին փոխվարչապետ, ԱԺ «Հայաստան» խմբակցության պատգամավոր Արմեն Գևորգյանի գործով սահմանվեց ապացույցների հետազոտման կարգը, համաձայն որի՝ կուսումնասիրվեն մեղադրանքի հիմքում դրված ապացույցները։ Ըստ հաջորդականության՝ առաջինը կհետազոտվեն դատավարական գործողությունների արձանագրությունները՝ ըստ եզրակացությամբ նշված հաջորդականության, զննում կատարելու մասին, առգրավում կատարելու վերաբերյալ արձանագրությունները, իրեղեն ապացույցներ, այլ փաստաթուղթ- ապացույցները։ Այնուհետև դատարանը կանդրադառնա վկաների հարցաքննությանը՝ ըստ դատակոչի ցուցակի, առաջինը կհարցաքննվի գործով առանցքային վկա Սիլվա Համբարձումյանը, ապա՝ Վարդան Օսկանյանը, Լևոն Սուլթանյանը, Անահիտ Իսրայելյանը, Կարմեն Սահակյանը, Անդրանիկ Գևորգյանը։ Վկաների ցուցմունքները լսելուց հետո դատարանը կուսումնասիրի գործում առկա փաստաթղթերը, որոնք գործի համար նշանակություն ունեն, ապա յուրաքանչյուր կողմ կհրապարակի այն փաստաթուղթը, որը ըստ կողմի՝ նշանակություն ունի գործի համար։ Վերջում դատարանը կանցնի ամբաստանյալների հարցաքննությանը, եթե վերջիններս ցանկություն ունենան ցուցմունք տալու։

«Փաստինֆո»-ի թղթակցի հաղորդմամբ՝ դատարանի սահմանած ապացույցների հետազոտման կարգի շուրջ առարկություններ հայտնեց պաշտպանական կողմը։ Արմեն Գևորգյանի պաշտպան Լուսինե Սահակյանն արձանագրեց, որ 25 տարվա մեջ չի ունեցել գեթ մեկ դատական նիստ, որի ընթացքում կարող է սահմանվել նման հաջորդականություն.մեղադրող կողմի ներկայացրած ապացույցները հետազոտել, հետո տարանջատել մնացած ապացույցները, որ գործի համար էական նշանակություն ունեն և այդ ապացույցները հետազոտել՝ վկաներին լսելուց հետո։ Սահակյանն արձանագրեց, որ, սովորաբար, սկզբում հրապարակվում են ապացույցները, հետո՝ վկաներին են լսում, որ ապացույցների վրա հղում անելով պաշտպանության կողմը կարողանա վկաներին հարցեր տալ։

«Ժամանակին պետք է ինքնաբացարկ հայտնեիք, որովհետև Դուք ամեն դատական նիստում ցույց եք տալիս, որ այս դատարանի դահլիճում մեղադրական կողմը երկուսն են՝ մեր դիմաց նստածը և Դուք, որովհետև Դուք պարբերաբար մեղադրանքի կողմի դիրքորոշում եք արտահայտում։ Դուք ի սկզբանե դատավարությունը մեղադրական ուղիով տարաք։ Դատարաններն անկախ նրանից՝ քաղաքական գործեր են քննում, թե ոչ՝ ձևականորեն գոնե դատավարության գործընթացում թույլ չեն տալիս նման բացահայտ խախտումներ, այսինքն՝ մենք կարող ենք հարցեր տալ վկաներին միայն մեղադրական ապացույցների հետ կապված, ինչն անթույլատրելի է»,- նշեց Սահակյանը՝ դիմելով գործով նախագահող դատավորին։

Ըստ մեղադրական եզրակացության՝ Ռոբերտ Քոչարյանը մեղադրվում է այն բանի համար, որ նա, 1998-2008թ զբաղեցնելով ՀՀ նախագահի պաշտոնը, իր պաշտոնեական դիրքն օգտագործելով Սիլվա Համբարձումյանի օգտին գործողություններ կատարելու, նպաստելու, այն է՝ ընկերությանը տրամադրված ընդերքն օգտակար հանածոների շահագործման համար հատուկ լիցենզիաներով ընկերության 100 տոկոս բաժնեմասերի ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար 2008թ փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով 927 մլն ՀՀ դրամին համարժեք 3 մլն ԱՄՆ դոլարի չափով կաշառք։ Ըստ մեղադրական եզրակացության՝ Արմեն Գևորգյանը մեղադրվում է այն բանի համար, որ նա, 2006թ փետրվարից մինչև 2008թ ապրիլի 21-ը զբաղեցնելով ՀՀ նախագահի աշխատակազմի ղեկավարի և ԱԽ քարտուղարի պաշտոնները, օգտագործելով իր պաշտոնեական դիրքը, Սիլվա Համբարձումյանի օգտին գործողություններ կատարելուն նպաստելու համար 2008թ ապրիլին Սամվել Մայրապետյանի օժանդակությամբ ստացել է 309 մլն ՀՀ դրամին համարժեք 1 մլն ԱՄՆ դոլար կաշառք, ինչպես նաև՝ խեղաթյուրելով և թաքցնելով նման գումարի իրական բնույթն ու ծագումը, օրինականացրել է առանձնապես խոշոր չափերով հանցավոր ճանապարհով ստացված եկամուտները։

Հեղինակ՝ Իզաբել Սահակյան

Աղբյուր` Փաստինֆո