Փաստ ինֆո

ՀՀ երկրորդ նախագահ Ռոբերտ Քոչարյանի պաշտպան Արամ Օրբելյանը լքեց դատական նիստերի դահլիճը՝ հայտնելով իր անհամաձայնությունը դատավոր Աննա Դանիբեկյանի գործողությունների նկատմամբ։

Նշենք, որ դատարանն արդեն սահմանել է ապացույցների հետազոտման հաջորդականության կարգը, սակայն մինչ գործում առկա ապացույցների հետազոտմանն անցնելը, պաշտպան Արամ Օրբելյանը պնդեց՝ անհրաժեշտ է քննարկել քրեական գործի վարույթը կարճելու հարցը, սակայն նախագահող դատավորը նշեց, որ անցնում է ապացույցների հետազոտմանը։

Օրբելյանն էլ հայտարարեց, որ կլքի նիստերի դահլիճը՝ նույնիսկ առանց դատարանի թույլտվության։

«Իսկ իմ կարգապահական պատասխանատվության հարցը կարող եք քննարկել իմ ներկայությամբ։ Կարող եմ ձևական դուրս գալ և նորից մտնել դահլիճ, որպեսզի այդ հարցն իմ ներկայությամբ քննարկեք»,- հայտարարեց Օրբելյանը։

Դատախազ Պետրոս Պետրոսյանն առարկեց՝ նշելով, որ դատարանը պետք է անցնի ապացույցների հետազոտմանը, ինչից հետո դատարանը սահմանեց 5 րոպե՝ պաշտպանին արտահայտվելու համար։ Այդ ընթացքում Օրբելյանը նշեց, որ ապացույց չի կարող հետազոտվել մի գործում, որտեղ ապացույց չկա, ապա հավելեց, որ կարգապահական պատասխանատվության հարցը քննարկելիս մինչև վերջ հրապարակվի իր գրավոր դիրքորոշումը, որը պաշտպան Լուսինե Սահակյանի մոտ է։

«Դատարանը թույլ չի տալիս մեղադրանքի պարզաբանման փուլ կոչվածն ավարտին հասցնել և որոշում է ապացույցներ հետազոտել։ Դատավարությունը չի կարող հասնել ապացույցների հետազոտման փուլ, քանի դեռ չի գործը նախապատրաստված չէ», - նշեց Օրբելյանը, ապա լքեց նիստերի դահլիճը։

Նախագահող դատավոր Աննա Դանիբեկյանն արձանագրեց, որ առանց պաշտպանի մասնակցության դատական նիստը շարունակվել չի կարող, ապա հեռացավ խորհրդակցական սենյակ՝ Օրբելյանի նկատմամբ դատական սանկցիա կիրառելու հարցը քննարկելու համար։

Խորհրդակցական սենյակից վերադառնալուց հետո դատարանը հրապարակեց որոշումը՝ Օրբելյանի նկատմամբ դատական սանկցիա կիրառելու մասին։ Որպես սանկցիա կիրառվեց տուգանքը՝ 50.000 ՀՀ դրամի չափով։

Ըստ մեղադրական եզրակացության՝ Ռոբերտ Քոչարյանը մեղադրվում է այն բանի համար, որ նա, 1998-2008թ զբաղեցնելով ՀՀ նախագահի պաշտոնը, իր պաշտոնեական դիրքն օգտագործելով Սիլվա Համբարձումյանի օգտին գործողություններ կատարելու, նպաստելու, այն է՝ ընկերությանը տրամադրված ընդերքն օգտակար հանածոների շահագործման համար հատուկ լիցենզիաներով ընկերության 100 տոկոս բաժնեմասերի ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար 2008թ փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով 927 մլն ՀՀ դրամին համարժեք 3 մլն ԱՄՆ դոլարի չափով կաշառք։

Ըստ մեղադրական եզրակացության՝ Արմեն Գևորգյանը մեղադրվում է այն բանի համար, որ նա, 2006թ փետրվարից մինչև 2008թ ապրիլի 21-ը զբաղեցնելով ՀՀ նախագահի աշխատակազմի ղեկավարի և ԱԽ քարտուղարի պաշտոնները, օգտագործելով իր պաշտոնեական դիրքը, Սիլվա Համբարձումյանի օգտին գործողություններ կատարելուն նպաստելու համար 2008թ ապրիլին Սամվել Մայրապետյանի օժանդակությամբ ստացել է 309 մլն ՀՀ դրամին համարժեք 1 մլն ԱՄՆ դոլար կաշառք, ինչպես նաև՝ խեղաթյուրելով և թաքցնելով նման գումարի իրական բնույթն ու ծագումը, օրինականացրել է առանձնապես խոշոր չափերով հանցավոր ճանապարհով ստացված եկամուտները։

Հեղինակ՝ Իզաբել Սահակյան

Աղբյուր` Փաստինֆո