Փաստ ինֆո

Ռեժիսոր, դերասան Վահրամ Սահակյանը նոր ներկայացում է բեմադրել։ «Ոզնիներ»-ի, «Խաթաբալադա»-ի, «Մեա Կուլպա»-ի և ճանաչված այլ գործերի հեղինակ Վահրամ Սահակյանի նոր աշխատանքը՝ «Կատակամարտ»-ը տրագիկոմեդիա է, որ պատմում է մեր Հայրենիքի օրհասական վիճակի, դավաճանության, ծախված մտավորականության և այսօրվա պայքարի մասին։ «Փաստինֆո»-ի հետ զրույցում բեմադրիչն ասում է՝ այն ամենը, ինչ հենց հիմա հուզում է պայքարի դուրս եկած իսկական հայերին, կգտնեն այս ներկայացման ընթացքում՝ Ճարտարապետների միության դահլիճում, ապրիլի 22-ին և 23-ին։ Ներկայացման ցուցադրությունները տևական չեն լինելու, բեմադրիչը զբաղված է նոր ֆիլմի աշխատանքներով։

Մեզ հետ զրույցի պահին Վահրամ Սահակյանը գտնվում էր Ազատության հրապարակում.

«Հիմա մենք մեր բոլորիս հայրենասիրության մակարդակը պետք է կարողանանք այնքան բարձրացնել, որ ինչ – որ բանի հասնենք։ Երբ ասում ենք, որ իրավիճակը երկրում օրհասական է, սրանք ուղղակի բառեր չեն։ Մեր առաջին ներկայացումներից մեկի մեջ ասվում է՝ եթե մի բանը շատ ես ուզում, լինում է։ Հիմա պետք է լինի, ուրիշ կերպ այլևս հնարավոր չէ։ Մենք փակուղու առաջ ենք կանգնել՝ լինել – չլինելու հարց է»,- ասում է Վահրամ Սահակյանը։

Բեմադրիչը նկատում է՝ վերջին ժամանակների պայքարի դրսևորումները շատ անգամներ է համատել, օրինակ՝ «150 դրամի»-ի համար և ու նմանատիպ այլ, այսպես կոչված, պայքարների հետ ու եկել է միևնույն եզրակացության՝ դրանք բոլորը, հիմնական մասով, փողով կազմակերպված «պայքարներ» էին, ընդ որում, ըստ վերջինիս, դրսից ֆինանսավորող գումարներով։ Այլ կերպ ասած՝ կեղծ օրակարգի մի մաս, որ երկիրը ներսից քանդելու նպատակ էին հետապնդում.«Ես չեմ ուզում, որ հիմա ինչ -որ մեկը պարտադրված իրեն մղի դեպի Ազատության հրապարակ։ Մենք հայտնվել ենք մի այնպիսի իրավիճակում, որ դա ինքնաբուխ և օրակարգային խնդիր պետք է լինի։ Ամեն հայ մարդ, իսկական մտահոգ քաղաքացի, պետք է ինքնակամ գիտակցի ու հասկանա, որ հիմա իր տեղը Ազատության հրապարակում է։ Այն խնդիրները, որ հիմա մեր առաջ են, անհապաղ լուծումներ են պահանջում, իսկ լուծման միակ տարբերակը պայքարն է, ստեղծված իրավիճակում այլ տարբերակ չկա»։

Բեմադրիչը նշում է՝ չի ցանկանում քաղաքական թեմաներ քննարկել, նմանօրինակ վերլուծություններից աշխատում է զերծ մնալ, որովհետև, քաղաքականությունից, որպես այդպիսին, լավագույնս գլուխ չի հանում։ Փոխարենն ասում է.«Մենք բոլորս մեր դիրքերում ենք, մեր պոստերում։ Ստեղծված իրավիճակում և, առհասարակ, ամեն մարդ պետք է անի այն, ինչ իր գործն է համարում, ինչից ինքը գլուխ է հանում։ Հիմա կա չէ՞ մի խավ՝ «համբալները», հենց այդպես էլ կգրեք, նրանք սիրում են ասել՝ բա դուք ինչի՞ պոստերում չեք։ Հատուկ այդ «համբալների» և, առհասարակ, բոլոր նորմալ մարդկանց համար հայտարարում եմ՝ մենք մեր պոստերում ենք։ Գիտե՞ք հիմա նոր ներկայացում եմ խաղում, մեր ցավի մասին է։ Իրականում այն կատակերգության ժանրում է, մարդիկ ներկայացման ընթացքում ծիծաղում են։ Ես չէի ուզում, բայց ստացվել է այնպես, որ հանդիսատեսը ներկայացումներից հետո մոտենում ու ասում է, որ ներկայացման ավարտին արտասվել են…Հատկապես այն համբալներին, ովքեր, տեղի – անտեղի հարց են տալի՝ բա մենք ինչի՞ պոստերում չենք, հրավիրում եմ ներկայացումը դիտելու։ Առհասարակ, բոլորին եմ հրավիրում, քանի դեռ այդ հնարավորություն կա, որովհետև այս ներկայացումը ես այլևս չեմ խաղալու …»,- ասում է բեմադրիչը։

Խոսելով Արցախում ստեղծված իրավիճակի մասին, Վահրամ Սահակյանը հակիրճ է՝ եթե դեպքերի ընթացքը շարունակվի այնպես, ինչպես հիմա է, Արցախը կհայաթափվի, իսկ արցախցիները կհայտնվեն Հայաստանում։

Աղբյուր` Փաստինֆո