Փաստ ինֆո

Ազատության հրապարակում շարունակում են հավաքվել երկրում ստեղծված իրավիճակով մտահոգ քաղաքացիներ՝ այդ թվում քաղաքական տարբեր ուժերի ներկայացուցիչներ, հասարակական գործիչներ, մշակույթի գործիչներ, անկուսակցականներ։

Այս պահին Ազատության հրապարակում է նաև նախկին պատգամավոր Գևորգ Պետրոսյանը, ով, ինչպես նշեց, չի հարում որևէ քաղաքական ուժի և այստեղ է եկել՝ որպես ՀՀ քաղաքացի։

«Ես որևէ քաղաքական ուժի ներկայացուցիչ չեմ հիմա․ սա քաղաքական ուժի պայքար չէ, քաղաքական դիվիդենտ շահելու պայքար չէ․սա պետականափրկության պայքար է։ Այսօր զոհասեղանին դրված է հայկական պետությունն ու պետականությունը և դա պետք է հուզի թե՛ ՀՀ բնակչությանը, թե՛ Սփյուռքին»,ասաց Պետրոսյանը՝ համոզմունք հայտնելով, որ Փաշինյանին օր առաջ պետք է վռնդել իշխանությունից, քանի որ նա ամբողջությամբ ձախողել է պետական կառավարման գործընթացը։

Հիշեցնելով ՀՀ Սահմանադրության առաջին և երկրորդ հոդվածները՝ Գևորգ Պետրոսյանը շեշտեց, որ Նիկոլ Փաշինյանը, որպես ղեկավար, չի կատարել երկրի գլխավոր օրենքի դրույթները։

«ՀՀ Սահմանդրության առաջին հոդվածը սահմանում է, որ ՀՀ-ն ինքնիշխան, ժողովրդավարական, սոցիալական, իրավական պետություն է։ Հիմա սրանցից ո՞րն է ապահովված։ Ոչ մեկը։ Այսօր որ համայնքում ուրիշ կուսակցության անդամ է հաղթում, քրեական գործ են հարուցում, տանում պատժում։ Ո՞ր համայնքում է թողել, որ ժողովրդի ձայնը հասնի իր նպատակին։ Ինքնիշխանության ամսին էլ չեմ խոսում․ ամբողջ սահմանով մեկ ադրբեջանցիներն են վխտում»,-իր այս ու մի շարք այլ հարցադրումներին ինքն էլ պատասխանում է Պետրոսյանը՝ հիմնավորելով, թե ինչու է պետք է օր առաջ պետականության կորստի տանող ներկա իշխանություների գործողությունների դեմն առնել։

Պետրոսյանն ընդգծում է՝ երկրի ղեկավարը, անկախ նրանից, թե ով լինի, պարտավոր է ապահովել Հայաստանի ինքնիշխանությունն ու ՀՀ մայր օրենքից բխող մյուս բոլոր սկզբունքները։

Աղբյուր` Փաստինֆո