Փաստ ինֆո

«Սասնա ծռերի» գործով 25 տարվա ազատազրկման դատապարտված Արմեն Բիլյանը հացադուլից դուրս չի գա մինչև նրան չտեղափոխեն «Դատապարտյալների հիվանդանոց» ՔԿՀ՝ բուժում ստանալու, սակայն Բիլյանի առողջական վիճակն օր օրի վատթարանում է, հացադուլի 19 օրվա ընթացքում Բիլյանը կորցրել է 11 կգ քաշ: Այս մասին «Փաստինֆո»-ի հետ զրույցում հայտնեց Արմեն Բիլյանի փաստաբան Աննա Ծառուկյանը:

Ինչպես արդեն տեղեկացրել ենք՝ Արմեն Բիլյանը մարտի 28-ից հացադուլ է հայտարարել՝ պահանջելով «Արմավիր » ՔԿՀ-ից իրեն տեղափոխել «Դատապարտյալների հիվանդանոց » ՔԿՀ՝ բուժման:

Փաստաբան Աննա Ծառուկյանը մեզ հետ զրույցում հայտնեց, որ Բիլյանին երեկ է այցելել, վերջինիս առաջարկել են չորս օրով տեղափոխել Արմավիր քաղաքում քաղաքացիական հիվանդանոց, սակայն Բիլյանը ցանկանում է տեղափոխվել «Դատապարտյալների հիվանդանոց», քանի որ մտավախություններ ունի՝ կապված իր անվտանգության ապահովման հետ։ Մասնավորապես, Բիլյանը պնդում է, որ ունի անվտանգության խնդիր, քաղաքացիական հիվանդանոցը չեզոք գոտի է համարվում, ՔԿՀ-ների տիրույթում չէ, հետևաբար, ցանկանում է տեղափոխվել «Դատապարտյալների հիվանդանոց», որպեսզի պետությունը պատասխանատվություն կրի՝ իր անվտանգության համար: Ավելին, փաստաբանը հայտնում է, որ Բիլյանը գտնվում է մենախցում, կարանտինային խցից դուրս չի եկել բերված օրվանից, ընդհանուր խուց չի գնում՝ վախեր ունենալով, որ իր հետ կարող է ինչ-որ բան տեղի ունենալ: Ծառուկյանի խոսքով՝ Բիլյանն իրեն այս պահին հայտարարում է քաղբանտարկյալ և գտնում է, որ իրեն խոշտանգման են ենթարկում: Ինչ վերաբերում է Բիլյանի առողջական խնդիրներին, փաստաբանը նշեց, որ ի սկզբանե եղել են որովայնի սուր ցավեր, աղիների հետ կապված խնդիրներ, առանց համապատասխան հետազոտության որոշել են, որ ունի աղիքային խնդիրներ, բայց համապատասխան փաստաթուղթ չկա, Բիլյանն ունի նաև անոթների հետ կապված խնդիրներ:

«Ասում է՝ թող դիակս հանեն, եթե չեն տեղափոխում Դատապարտյալների հիվանդանոց, որտեղ վերականգնվելուց հետո հայտարարում է, որ իրեն մասնավոր բժիշկներ կարող են այցելել: Բացի այդ՝ հայտարարում է, որ դատապարտյալների հիվանդանոցում մայրը կարող է իրեն այցելել՝ հացադուլի հետ կապված: Բիլյանն ամուսնացած երբևէ չի եղել, կին չունի, տարեց մոր խնամքին է, քույրն էլ՝ առողջական խնդիրներ ունի»,- նշեց Ծառուկյանը՝ հավելելով, որ փորձել է Բիլյանին համոզել՝ դադարեցնել հացադուլը, սակայն դա չի հաջողվել:

Բացի դա՝ փաստաբանը նաև տեղեկացրեց, որ նշանակված դեղամիջոցներից Բիլյանին տրամադրվել են միայն հակաբիոտիկները:
Հիշեցնենք, որ Երևանի ընդհանուր իրավասության դատարանը՝ դատավոր Մեսրոպ Մակյանի նախագահությամբ, 2021թ հունիսի 24-ին հրապարակել է «Սասնա ծռեր» գործով դատավճիռը, համաձայն որի՝ Արայիկ Խանդոյանի նկատմամբ քրեական հետապնդումը դադարեցվել է՝ մահվան հիմքով, Պավել Մանուկյանը մեղավոր է ճանաչվել՝ դատապարտվելով ազատազրկման՝ 7 տարի 8 ամիս ժամկետով, Վարուժան Ավետիսյանը՝ 7 տարի 4 ամիս, Մխիթար Ավետիսյանը 7, 5, Էդվարդ Գրիգորյանը՝ ՝6,5 տարի, Գագիկ Եղիազարյանը՝ 7 տարի 5 ամիս, Արեգ Կյուրեղյանը՝ 7 տարի 1 ամիս, Սեդրակ Նազարյանը՝ 8 տարի 2 ամիս ժամկետով։

Նշենք, որ երկու ոստիկանի՝ Յուրի Տեփանոսյանի և Արթուր Վանոյանի սպանության մեջ մեղադրվող Սմբատ Բարսեղյանը, որի համար դատախազը պահանջել էր ցմահ ազատազրկում, դատապարտվել է ազատազրկման՝ 25 տարի ժամկետով, իսկ Արմեն Բիլյանը, որին մեղսագրվում էր ոստիկանության ծառայող Գագիկ Մկրտչյանի սպանությունը, Երեւանի ընդհանուր իրավասության դատարանի կողմից արդարացվել էր ու ճանաչվել անպարտ։

Բիլյանը մեղավոր է ճանաչվել ՀՀ ՔՕ 235-րդ հոդվածի 3-րդ մասով, 218-րդ հոդվածի 3-րդ մասի 1-ին կետով, 238-րդ հոդվածի 4-րդ մասի 1-ին և 177-րդ հոդվածի 3-րդ մասի 1-ին և 2-րդ կետերով նախատեսված հանցագործությունների կատարման մեջ՝ կազմակերպված խմբի կողմից զենք-զինամթերք պահելու, կրելու, պատանդ վերցնելու, հրազեն հափշտակելու, շորթելու եւ առանձնապես խոշոր չափերով գողություն կատարելու համար ։ Նա դատապարտվել էր ազատազրկման՝ 4 տարի 11 ամիս ժամկետով ու ազատ արձակվել նիստերի դահլիճից՝ մինչև դատավճռի օրինական ուժի մեջ մտնելը նրա նկատմամբ որպես խափանման միջոց կիրառելով չհեռանալու մասին ստորագրությունը։ Վերաքննիչ քրեական դատարանը՝ դատավոր Տիգրան Սահակյանի նախագահությամբ, կազմով՝ դատավորներ Արմեն Բեկթաշյանի և Ռուբիկ Մխիթարյանի, 2021թ դեկտեմբերի 10-ին մասամբ բավարարել էր դատախազի վերաքննիչ բողոքը՝ Արմեն Բիլյանին մեղավոր ճանաչելով նաև սպանության համար և վերջնական պատիժ սահմանելով ազատազրկումը՝ 25 տարի ժամկետով։ Վերաքննիչ դատարանի որոշմամբ Բիլյանը կալանավորվել է հենց դատական նիստերի դահլիճից։

Հեղինակ՝ Իզաբել Սահակյան

Աղբյուր` Փաստինֆո