Փաստ ինֆո

Արցախի խորհրդարանը բացահայտ հայտարարեց, որ չի կարելի Արցախի հարցը իջեցնել որոշակի մակարդակից ցածր, չի՛ կարելի հատել կարմիր թելը, այն է՝ տեսնել Արցախն Ադրբեջանի կազմում, սա հստակ ուղերձ էր Հայաստանի իշխանություններին: «Փաստինֆո»-ի հետ զրույցում հայտարարել է քաղտեխնոլոգ Արմեն Բադալյանը՝ վերլուծելով Արցախի ԱԺ երեկ ընդունած հայտարարությունը, որով պահանջում են Հայաստանի իշխանություններից հրաժարվել աղետաբեր քաղաքականությունից:

Ըստ Արմեն Բադալյանի՝ Արցախի ԱԺ այս հայտարարությունը որևէ ազդեցություն չի ունենալու, քանի որ Հայաստանի վարչապետը չի որոշելու Արցախի կարգավիճակի հարցը, Արցախի հետ կապված ցանկացած հարց այլևս լուծում է Ռուսաստանը, իսկ Ռուսաստանը խնդիրը լուծելու է այնպես, ինչպես ինքն է ցանկանում, անկախ նրանից՝ ում է դա դուր գալիս, ում՝ ոչ։

«Հայաստանի վարչապետը ոչինչ չի որոշելու, Ռուսաստանն արդեն իր քայլերն իրականացնում է, ինքն է արդեն որոշում՝ ով կարող է մտնել Արցախ, ով չի կարող, անկախ նրանից՝ պատգամավոր է, թե պատգամավոր չէ, որոշում է Հայաստան-Ադրբեջան խաղաղության գործընթացը, դրա համար արդեն դիվանագետ է նշանակում, այսինքն ՝ Ռուսաստանն իր քայլերը հստակ անում է՝ անկախ նրանից՝ Հայաստանի վարչապետն ինչ կորոշի» ,-ասաց Բադալյանը:

Քաղտեխնոլոգի արձանագրմամբ՝ Արցախը վերածվում է Ռուսաստանի վերահսկողության տակ գտնվող շրջանի, իսկ թե այդ տարածքի կարգավիճակն ի՞նչ կլինի, հետագա ճակատագիրն ինչպիսի՞ն կլինի, ժամանակը ցույց կտա.

«Մի՛ դիտարկեք Հայաստանը և Արցախն առանձին՝ առանց Ռուսաստանի վերահսկողության, սովորե՛ք, որ Հարավային Կովկասում, հատկապես, Արցախյան կոնֆլիկտի հետ կապված ամեն ինչ պետք է դիտարկել Ռուսաստանի վերահսկողությամբ իրականացվող գործընթացների շրջանակում: Այս տարածաշրջանը, մասնավորապես, Արցախը, կամաց- կամաց պետք է դիտարկել որպես Ռուսաստանի մաս, ՌԴ խաղաղապահ զորքերը շատ հանգիստ թույլ չտվեցին, որպեսզի ՀՀ պատգամավորը մտնի Արցախ, շատերն ասում են, թե այստեղից են զանգել, ասել, բայց սա անհավատալի է, Հայաստանի իշխանավորը չի կարող ռուս խաղաղապահին ասել՝ սրան թող, նրան մի թող, նրանց ուղղակի բանի տեղ չեն դնելու,: ՀՀ ԱԳն-ն հայտարարեց՝ մենք չգիտենք ՝ի՞նչ իրավունքով ռուս խաղաղապահները չեն թողել նրանց, ու վերջ։ Այլևս ոչինչ չեն կարող անել, որովհետև այլևս ռուսներն են որոշելու, հետո այդ որոշումները կխստանան, ինչքան Ռուսաստանի դիրքերը Ուկրաինայում ամրապնդվեցին, այնքան այստեղ է ամրանալու »,- մեզ հետ զրույցում ասաց Արմեն Բադալյան:

Իսկ թե արդյո՞ք Արցախի ԱԺ հայտարարությունը որևէ ազդեցություն կունենա Հայաստանի իշխանությունների վրա, գոնե նրանց հայտարարությունները զսպելու առումով, քաղտեխնոլոգն ասաց.
«Ոչ մի ազդեցություն էլ չի ունենալու: Հայաստանի գլխավոր իշխանավորը հաշվի չի առնում ոչինչ, անում է այն, ինչ նպատակահարմար է գտնում»,-ասաց Բադալյանը:

Մեզ հետ զրույցում Արմեն Բադալյանը նշեց, որ ոչ միայն Հայաստան-Ադրբեջան, այլ նաև Հայաստան-Թուրքիա բանակցայի գործընթացն է վերահսկվելու ՌԴ ղեկավարության կողմից:

Հարցին՝ ստացվում է Հայաստանն այլևս կորցրե՞լ է իր սուբյեկտայնությունը և այլևս միայնակ որոշումներ չի կայացնում, քաղտեխնոլոգն ասաց.

«Ունենք դրոշ, ունենք, գերբ ունենք, դրամ ունենք, բայց Ռուսաստանը կամաց-կամաց վերցնում է այս տարածաշրջանը, Հայաստանն առաջին հերթին: Մենք տեսնում ենք, որ հին աշխարհակարգը ջարդվում է, նորն է ստեղծվում, իսկ մենք նորի ստեղծման կամուրջին կանգնած ենք ու գնում ենք այդ կամուրջով, այսինքն ՝ այդ փոփոխվող աշխարհի հենց մեջտեղով ենք գնում: Ամեն ինչ գնում է նրան, որ Ռուսաստանն ավելի ու ավելի է ուժեղացնում իր ազդեցությունը Հայաստանի վրա: Ռուսաստանը վերցնում է առաջին հերթին՝ Ղարաբաղը, ենթադրաբար կվերցնի նաև Հայաստանը և ամբողջ Հարավային Կովկասը, այդ իսկ պատճառով կարևոր չէ՝ ՔՊ-ական պատգամավորներն ինչ կխոսեն, կապ չունի՝ իրենք հայ-թուրքական հարաբերությունների կողմնակի՞ց են, թե՞ ոչ, իրենք չեն որոշելու, այլ մարդիկ են որոշելու, ինչպես եղել է հին ու բարի ժամանակներում՝ Մոսկվան ոնց կորոշի, այդպես էլ կլինի »,-ասաց Արմեն Բադալյանը:

Աղբյուր` Փաստինֆո