Փաստ ինֆո

«Նորքի զինված խմբի» գործով ամբաստանյալ, ՀՀ պաշտպանության նախկին փոխնախարար Վահան Շիրխանյանը դատարանում ցուցմունք չտվեց՝ առողջական խնդիրների պատճառով, սակայն պաշտպանն ընթերցեց Շիրխանյանի հայտարարությունը, որով վերջինս «հաստափոր» քրեական գործը գնահատել էր որպես քաղաքական հետապնդման դասական նմուշ։ 

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանը՝ դատավոր Մեսրոպ Մակյանի նախագահությամբ, այսօր կայացել է «Նորքի զինված խմբի» գործով դատական նիստը։ Գործը գտնվում է ամբաստանյալների հարցաքննության փուլում։ Վահան Շիրխանյանը, որը սույն գործով ամբաստանյալ է, առողջական խնդիրների պատճառով չկարողացավ դատարանում ցուցմունք տալ, սակայն նշեց, որ հայտարարություն ունի, որը կընթերցի իր պաշտպանը։ Նախագահող դատավոր Մեսրոպ Մակյանը պարզաբանեց, որ դատաքննության ցանկացած փուլում Շիրխանյանը կարող է ցուցմունք տալ, ինչից հետո պաշտպանն ընթերցեց հայտարարությունը։

«Այս հաստափոր քրեական գործ կոչվածը քաղաքական հետապնդման դասական նմուշ է, որովհետև այն պատվիրել, կազմել և իր ապօրինի պաշտոնավարման վերջին օրը, իսկ այնուհետև՝ իր դրածոների միջոցով վերահսկել է Սերժ Սարգսյանը։ Այս գործը Սերժ Սարգսյանին պետք էր Արցախը և ազատագրված հողերն Ադրբեջանին հանձնելու՝ իր վրա վերցրած պարտավորության ժամկետը երկարացնելու համար»,- հայտարարությունում նշել է Շիրխանյանը՝ հավելելով, որ Սարգսյանն իր կառավարման տարիներին կազմակերպել է երկու նախագահական, երկու խորհրդարանական, մեկ սահմանադրական կեղծված քվեարկություններ և կեղված ընտրությունները լեգիտիմ ճանաչելու դիմաց՝ Սերժ Սարգսյանը պարտավորվել է կատարել պահանջը, հակառակ դեպքում՝ Ադրբեջանն ու Թուրքիան կհարձակվեին։

«Հողերը հանձնելու հետևանքներից նա սարսափում էր, նա գտավ ժամկետը երկարաձգելու միակ տարբերակը։ Մեկ տարում Սարգսյանը կարողացավ բացարձակապես շինծու ցուցմունքների հիման վրա սարքել, հղկել և ներկայացնել համանախագահներին, ԵԱՀԿ-ին, ճգնաժամային խմբին՝ Հայաստանում առկա մի քանի ահաբեկչական ծայրահեղական խմբեր։ Նրան հաջողվեց համապատասխան կենտրոններին համոզել, որ առանց երկրի ներսում ահաբեկչական կենտրոնները վերացնելու չի կարող անցնել Արցախյան կարգավորմանը»,- նշել է Շիրխանյանը՝ գտնելով, որ դա երեք տարի ժամանակ է տվել Սարգսյանին՝ Արցախը Ադրբեջանին հանձնելը նախապատրաստելու համար։

Ըստ նրա՝ այդ տարիներին արվել է ամեն ինչ, որպեսզի հակառակորդին դիմակայելու որևէ հնարավորություն չլինի, բանակը ջախջախված էր։

«Ինչու նա մինչ այսօր քրեական պատասխանատվության չի կանչված՝ ապօրինի գաղտնալսումների համար»,- նշել է նա՝ հավելելով, որ քրեական գործը հեռու է իրավունքից, արդարությունից։

Ի դեպ, Շիրխանյանը, փաստացի, նման հայտարարությամբ հանդես եկավ այն բանից հետո, երբ իշխող ուժի ներկայացուցիչները ԱԺ-ում անթաքույց հայտարարեցին Արցախը Ադրբեջանին հանձնելու հնարավոր մտադրությունների, գործընթացների մասին։ Իսկ թե Արցախի շուրջ ստեղծված մտահոգիչ իրավիճակի համատեքստում նման դիրքորոշում հայտնելով Շիրխանյանը «ում թելն է թելում»՝ մնում է կռահել։

Հիշեցնենք, որ ըստ մեղադրանքի Արթուր Վարդանյանը 2015թ. ապրիլից գտնվելով Հայաստանի Հանրապետության տարածքում, ստեղծել ու ղեկավարել է ՀՀ քաղաքացիներից կազմված հանցավոր համագործակցություն, կազմակերպված խմբի կազմում ապօրինի կերպով ձեռք է բերել,պահել, փոխադրել և կրել մեծ քանակությամբ զենք, ռազմամթերք, պայթուցիկ նյութեր, պայթուցիկ սարքեր` նպատակ ունենալով Հայաստանի Հանրապետությունում իշխանությունը յուրացնել, այսինքն` զավթել` բռնություն գործադրելու կամ բռնություն գործադրելու սպառնալիքով, ինչը ավարտին չի հասցվել նրա կամքից անկախ հանգամանքներում, քանի որ հանցավոր համագործակցության մեջ ներգրավված անձինք բացահայտվել ու 2015թ. նոյեմբերի 25-ին վնասազերծվել են Հայաստանի Հանրապետության ազգային անվտանգության ծառայության աշխատակիցների կողմից: Քրեական գործը դատարանում է գտնվում 2016 թվականի նոյեմբերից։ Նշենք, որ քրեական գործով ամբաստանյալներն են՝ Արթուր Վարդանյանը, Անտոն Թոթոնջյանը, Վահան Շիրխանյանը. Գառնիկ Մարգարյանը, Վլադիմիր Առաքելյանը, Խաչիկ Ավետիսյանը, Ավետիս Բարեյանը, Վաղինակ Ստեփանյանը, Արթուր Եղիազարյանը, Վահագն Սալնազարյանը, Արման Հայրապետյանը, Էդվարդ Ներսիսյանը, Հարություն Սարիբեկյանը, Ասյա Մկրտչյանը, Տիգրան Բոյաջյանը, Գևորգ Ջնդոյանը, Մարինե Կաթանյանը, Նելլի Մինասյանը։

Հեղինակ՝ Իզաբել Սահակյան

Աղբյուր` Փաստինֆո