Փաստ ինֆո

Երևանի ընդհանուր իրավասության դատարանում՝ դատավոր Ալեքսեյ Սուքոյանի նախագահությամբ, այսօր կայացել է ՀՀ երկրորդ նախագահ Ռոբերտ Քոչարյանն ընդդեմ Նիկոլ Փաշինյանի գործով դատական նիստը։ 

Հիշեցնենք, որ 2020թ ապրիլին ՀՀ երկրորդ նախագահ Ռոբերտ Քոչարյանը հայց էր ներկայացրել ընդդեմ Նիկոլ Փաշինյանի՝ հրապարակայնորեն արտահայտված զրպարտությունից պատիվը և արժանապատվությունը պաշտպանելու և զրպարտությամբ պատճառված ոչ նյութական վնասի հատուցման պահանջով՝ 2 մլն դրամի չափով։ Հայցադիմումի հիմք էր հանդիսացել սահմանադրական բարեփոխումների վերաբերյալ քարոզարշավի ժամանակ Նիկոլ Փաշինյանի հայտարարություններն առ այն, որ 4 մլրդ դոլարով պետք է ավելանա պաշտպանության բյուջեն, որից 1,2 մլրդը պետք է վերադարձվի թալանված գումարը և այդ հայտարարության ժամանակ հնչել է Ռոբերտ Քոչարյանի անունը: Հայցվոր կողմը գտնում է, որ այդ հայտարարությամբ խախտվել է Ռոբերտ Քոչարյանի անմեղության կանխավարկածը։

«Փաստինֆո»-ի թղթակցի հաղորդմամբ՝ գործը գտնվում է դատաքննության փուլում։ Ռոբերտ Քոչարյանի ներկայացուցիչ Հայկ Ալումյանը հայտարարեց, որ պատասխանողը (Փաշինյանը) արել է այնպիսի հայտարարություններ, որոնցով հայցվորին մեղադրել է հանցագործության կատարման մեջ, ասել՝ թալանել է բանակն ու պետությունը։

«Քանի որ պատասխանողը հայցվորին մեղադրել է հանցագործություններ կատարելու մեջ, ապա միակ թույլատրելի ապացույցը կարող էր լինել օրինական ուժի մեջ մտած դատավճիռը»,- նշեց Ալումյանը՝ հավելելով, որ մարդը համարվում է անմեղ, քանի դեռ նրա մեղավորությունն ապացուցված չէ օրինական ուժի մեջ մտած դատավճռով, հետևաբար, պնդումները, որ արել է Նիկոլ Փաշինյանը, չեն կարող հաստատվել որևէ այլ ապացույցով, բացի՝ օրինական ուժի մեջ մտած դատավճռով, մնացած բոլոր ապացույցներն անթույլատրելի են։

Ինչ վերաբերում է ԱԱԾ սահամադրական կարգի պահպանության, ահաբեկչության դեմ պայքարի դեպարտամենտի պետի պաշտոնակատարի գրություններին՝ հասցեագրված ՀՔԾ պետին, ապա Ալումյանը նշեց, որ դրանք, թեև ստորագրված են նույն անձի անունից, սակայն ստորագրություններն ակնհայտորեն տարբերվում են, բացի այդ, դրանցից մեկում որպես Ռոբերտ և Բելլա Քոչարյաններին պատկանող միակ գույք նշված է Իսակովի պողոտայում գտնվող բնակարանը, սակայն մեկ այլ գրությունում հղում է կատարվում ինչ-որ անհայտ օպերատիվ տվյալներին և նշվում է, թե Ռոբերտ Քոչարյանին է պատկանում նաև նրա զավակներին պատկանող գույքը և դրամական միջոցները, սակայն հայցվոր կողմը վիճարկում է այդ ապացույցների իսկությունը, քանի որ դրանք ձեռք են բերվել անհայտ աղբյուրից։

Նիկոլ Փաշինյանի պատասխանողի ներկայացուցիչը նշել է, թե, իբր, նա Քոչարյանի վերաբերյալ այդ տեղեկությունները ձեռք է բերել ԱԺ նախկին պատգամավոր Արման Բաբաջանյանի՝ 2021թ հայտարարությունից, իսկ մեկ այլ պնդմամբ, այդ տեղեկությունը պատասխանողն իմացել է ավելի վաղ։ Այս հանգամանքը ևս վիճարկվում է Ռոբերտ Քոչարյանի կողմից։ Նախ՝ Փաշինյանը հայտարարությունը հնչեցրել է նախքան 2020թ, հետեւաբար չէր կարող այդ մասին տեղեկանալ շուրջ մեկ տարի անց Ա. Բաբաջանյանի կողմից արված հայտարարությունից։ Ինչ վերաբերում է երկրորդ պատճառաբանությանը, ապա, ինչպես նկատեց, Քոչարյանի ներկայացուցիչ Ալումյանը, ինչպես կարող էին այդ տվյալները հայտնվել վարչապետի մոտ, եթե դրանք նախաքննական գաղտնիք են, արդյոք դա տեղի է ունեցել նրա կողմից՝ վարչապետի լիազորությունների օգտագործմամբ։

«Դա Հանրապետության վարչապետին հասու նյութ չէ, այնպես չէ, որ որքան բարձր է պաշտոնը, այնքան շատ նախաքննական գաղտնիք կարելի է տրամադրել։ Կան որոշակի դատավարական սուբյեկտներ, որոնք կարող են ստանալ գործի նյութերը, վարչապետը նման սուբյեկտ չէ»,- նշեց Ալումյանը։

Դատական նիստի ընթացքում պատասխանը ներկայացրեց նաև Փաշինյանի ներկայացուցիչը։ Դատական նիստը հետաձգվեց։

Հեղինակ՝ Իզաբել Սահակյան

Աղբյուր` Փաստինֆո