Փաստ ինֆո

Հայկական իշխանություններին ուղղված Թուրքիայի ԱԳ նախարարի հայտարարությունը՝ լինել ավելի համարձակ, թուրքերենից թարգմանաբար նշանակում է ավելի համարձակորեն անցնել բոլոր այն կարմիր գծերը, որոնք մեր պետականության ու ազգային շահի տեսանկյունից անընդունելի և մերժելի են լինելու։ Թուրքագետ, ԵՊՀ Արևելագիտության ֆակուլտետի դեկան Ռուբեն Մելքոնյանը «Փաստինֆո» լրատվականի հետ զրույցում այսպես է մեկնաբանում Թուրքիայի ԱԳ ղեկավար Չավուշօղլու՝ այսօր արած հայտարարությունն այն մասին, թե հայաստանյան իշխանությունները պետք է ավելի համարձակ լինեն։

Վերջինս հավելել էր նաև, թե հայաստանյան իշխանությունները ճնշման տակ են, քանի որ սկսված պրոցեսներն ամենևին էլ հեշտ գործընթաց չեն, որովհետև հայկական Սփյուռքի մի մասը՝ հատկապես ԱՄՆ-ի ու Ֆրանսիայի համայնքները չեն աջակցում այս գործընթացին։

Ռուբեն Մելքոնյանը նկատում է՝ ըստ թուրքական պատրանքների, լինել ավելի համարձակ նշանակում է առավել արագ տեմպերով Արցախը հանձնել Ադրբեջանին, ավելի արագ մոռանալ Հայոց Ցեղասպանության խնդիրն ու հայաթափել Հայաստանն ու Արցախը. «Կարծում եմ, Չավուշօղլու կողմից հնչեցված այս արտահայտության մեջ արդեն առկա է այն փաստը, որ հայկական իշխանություններն, իրենց պատկերացումների համաձայն, բավականին, համարձակ են, իսկ դրա վառ վկայությունը երեկ և այսօր ՀՀ Ազգային Ժողովում տեղի ունեցող՝ պարզ խոսքերով չբնութագրվող ելույթների տարափն է, որ թափվում է իշխանական ֆրակցիայի ներկայացուցիչների կողմից»։

Թուրքագետը տարակուսած է՝ անհնար էր երևակայել, որ Հայաստանի Հանրապետության խորհրդարանում կարող էին հնչել նման կարծիքներ։ Ըստ վերջինիս, ստեղծվել է մի իրավիճակ, որտեղ խոսքերը, մտքերն ու, անգամ, ամենածանր ու կոշտ քննադատությունն արդեն մաշված և ուշացած է.«Այն, ինչ նախօրեից սկսած տեղի է ունենում Ազգային Ժողովում, առողջ տրամաբանությունից անդին մի երևույթ է։ Թուրքիայի ԱԳ նախարարը, որ, բնականաբար, հետևում է այս պրոցեսներին, տեսնում է, որ Հայաստանի իշխանություններն, իրենց ուզածի չափով համարձակ են, գնում են Արցախի վերջնական հանձնման և Հայոց Ցեղասպանության խնդրի չեղարկման ճանապարհով, ապա նա ուղղակիորեն խրախուսում է իր գործընկերներին՝ հետ չկանգնել բռնած ուղղուց, լինել ավելի համարձակ, որպեսզի հարցն արագ կերպով գլուխ բերվի»։

Նկատառմանը, թե Թուրքիայի ԱԳ նախարարը հորդորել է հայաստանյան օրվա իշխանություններին շրջանցել Սփյուռքի առաջացրած խնդիրները՝ Ռուբեն Մելքոնյանը պատասխանում է՝ այսօրինակ մոտեցումն, առնվազն, տարօրինակ չէ, որովհետև հայկական Սփյուռքը տասնամյակներ շարունակ եղել է թուրքական իշխանությունների ու պետության թիրախը։ Միաժամանակ համարվել է, որ հայկական Սփյուռքն այն բաստիոններից մեկն է, որ պահում է Հայաստանի և հայ ազգի համար կարևորագույն կարմիր գծերը. «Այս իմաստով, Չավուշօղլու վերոհիշյալ թիրախավորումը խիստ օրինաչափ է։ Սա թուրքական պետության 30 ամյա թեզն է՝ թե հայկական Սփյուռքը «խանգարում» է հայ – թուրքական հարաբերությունների կարգավորմանն ու հաշտեցմանը։ Չավուշոօղլու կողմից բարձրաձայնված այդ բարդությունները, որոնք բանեցվում են այս իշխանությունների նկատմամբ, հետևյալն է՝ ամեն գնով պետք է հաղթահարել մեր ինքնությունը բնորոշող այն տարրերը, որոնք ընդունելի են իրենց հայ համարող բոլոր մարդկանց համար։ Իսկ բոլոր նրանք, ովքեր իրենց հայ չեն համարում, կարող են ականջալուր լինեն Չավուշօղլուի հորդորներին և այնել այնպես, ինչպես թուրքերն են ցանկանում»։

Անդրադառնալով Չավուշօղլու հայտնած պատրաստակամությանը՝ թուրքական պատվիրակության հավանական այցին Երևան, Ռուբեն Մելքոնյանն արձագանքում է՝ Աստված մի արասցե, պրոցեսների այս հունով ընթանալու պարագայում, կարող ենք սպասել նաև թուրքական պատվիրակության այցը Երևան.«Օրինակ, չեմ զարմանա, եթե, ասենք, Երևան ժամանած թուրքական պատվիրակությունը, օրվա իշխանությունների հետ միասին, ապրիլի 24-ին Հայոց Ցեղասպանության հուշարձան համալիրը վերանվանեն «Խաղաղության» հուշարձան։ Այս տեմպերով առաջ գնալու պարագայում, նման հեռանկարը կարող է ոչ հեռավոր ապագայում իրականություն դառնա։ Ինչ վերաբերում է նրան, որ հայկական կողմը խուսափել է թուրքական պատվիրակությանն այստեղ՝ Երևանում հանդիպելու առաջարկից, պայմանավորված է նրանով, որ այն ամենից հետո, ինչ կատարվեց մեզ հետ՝ այդքան զոհերն ու հասարակության լայն զանգվածների մոտ առկա լարվածության մթնոլորտը, կարող են անվտանգային խնդիրներ առաջացնել թուրք պատվիրակության անդամների համար»։

Ամփոփելով զրույցը թուրքագետն անդրադարձ է կատարում առաջիկա՝ ապրիլ 24-յան ոգեկոչման արարողության թեմային։ Վերջինս ընդգծում է՝ այլևս որևէ ապոկալիպտիկ և սարսափելի զարգացում՝ կապված ազգային, պետական խնդիրների, այդ թվում նաև՝ ապրիլ 24-յան ոգեկոչման արարողության հետ, ինքը չի բացառում.«Հատկապես, եթե հիմք ընդունենք այս իշխանության տարբեր ներկայացուցիչների հրապարակային ելույթներն ու մոտեցումներ, այդ թվում, մասնավորապես՝ երեկ և այսօր Ազգային Ժողովում հնչած աներևակայելի հակահայկական թեզերն ու ելույթները, որ այդ ամենի գերխտացումն էր, այլևս ոչինչ անսպասելի կամ անակնկալ չի լինելու։ Եթե տեղյակ եք, այսօր ԱԺ-ում կարծիք հնչեց, իբր թուրքատյացությունը մերժելի երևույթ պետք է դառնա մեր հասարակության համար։ Ապրիլի 24-ը, Ցեղասպանության ոգեկոչման արարողությունն ու հուշարձանն, ինքնին, թրքատյացության վառ դրսևորումներից ու խորհրդանիշներից են, հետևաբար, չեմ կարող բացառել, որ այդ հարցում ևս, այս տարի մեզ աներևակայելի բացասական զարգացումներ են սպասվում»,- ասում է ԵՊՀ Արևելագիտության ֆակուլտետի ղեկան Ռուբեն Մելքոնյանը։

Աղբյուր` Փաստինֆո