Փաստ ինֆո

Ըստ՝ «Քաղաքացիական պայմանագիր» խմբակցության պատգամավոր Լենա Նազարյանի՝ իրենց կառավարությունն ամենառաջադիմականն է, քանի որ առաջ է տանում խաղաղության օրակարգը:

Լենա Նազարյանը ԱԺ-ում իր ելույթի ժամանակ մեղադրեց խորհրդարանական ընդդիմությանը՝ կառավարության՝ հանդիպելու և իրենց հետաքրքրող հարցերի պատասխանը ստանալու առաջարկը շարունակաբար մերժելու համար.

«Իրականում ընդդիմությունը շատ բան չի կորցնում, ամեն ինչ ժամանակին ասվել է և հիմա էլ ասվում է՝ բաց և հրապարակային: Կարծում եմ, պետք է իրենց էլ ճիշտ հասկանալ, հո չե՞ն կարող առանց փակագծերի խոսակցությունից հետո դուրս գալ և ձևանալ անտեղյակ, իսկ այս դեպքում իբր անիրազեկ են և հետևաբար՝ անպատասխանատու, շատ հարմար կարգավիճակ են ընտրել իրենց համար, սա փսևդոընդդիմությունը կարգավիճակ է»,,-ասաց Լենա Նազարյանը:

ՔՊ-ական պատգամավորին զարմացնում է ոչ միայն ընդդիմության, այլ նաև քաղաքացիական հանրության կեցվածքը.

«Երկու ամիս առաջ էր, երբ քաղաքացիական հանրության ներկայացուցիչներ, շատ արդարացի զայրույթով լցված, հավաքվել էին կառավարության շենքի դիմաց, դրա նախօրեին սահմանին զոհ էինք ունեցել և նրանք պահանջներ ունեին կառավարությանը հասցեագրված, պահանջում էին ավելի խորը խրամատներ փորել , սահմանին ամրաշինական աշխատանքներ անել, նորակոչիկներին հեռացնել սահմանից, փոխարենը՝ պայմանագրայիններին տանել սահման, կարծես, պայմանագրայինների կյանքը պակաս կարևոր է: Ի զարմանս ինձ՝ այդ հարգարժան կանայք չասացին կառավարությանը՝ գնացե՛ք և կնքե՛ք խաղաղության պայմանագիր Ադրբեջանի հետ, փակեք պատերազմի էջը և գնացեք լուծումների»,-ասաց Նազարյանը և հավելեց.

«Ինձ համար պարզ է մի բան, այս կառավարությունը, որն առաջ է տանում խաղաղության օրակարգը բոլորից առաջադիմական է, սա շատ տարօրինակ է, սովորաբար ավելի առաջադիմական լինում է ընդդիմությունը և քաղաքացիական հանրությունը»,-ասաց Նազարյանը:

Նրա խոսքով՝ խաղաղության օրակարգն ունի շատ լայն հանրային կոնսենսուս.

«Այս կառավարությունը միայնակ չէ, ինձ միշտ հուսադրում է այն, որ քաղաքացիների և զոհված զինծառայողների հետ հանդիպումների ժամանակ ես տեսնում եմ, որ խաղաղության օրակարգն ունի շատ լայն հանրային կոնսենսուս»,-ասաց ՔՊ-ական Լենա Նազարյանը:

Լուսանկարը՝ ԱԺ-ի

Աղբյուր` Փաստինֆո