Փաստ ինֆո

Նիկոլ Փաշինյանը բաց տեքստով ասում է, որ Հայաստանը Արցախի հետ որևէ գործ չունի, ինքը տեսնում է Արցախը Ադրբեջանի կազմում: Նա ասում է, որ բանակցությունների հիմքը պետք է լինի անվտանգությունը, ընդ որում՝ Հայաստանն այդ անվտանգությունը ապահովել չի կարող, այսինքն՝ նա հանձնում է Արցախը և Արցախի հայկական բնակչությանը Ռուսաստանին և կարծում է, որ գուցե այդպես հաջողվի անվտանգությունն ապահովել: Փաշինյանի ասածը սա է, պարզ տեքստով ասեց և ներկայացրեց իր անելիքները, իր ծրագիրը, հիմա շատ կարճ ժամանակում ընդդիմությունը պետք է հստակեցնի իր ասելիքը և անելիքը: «Փաստինֆո»-ի հետ զրույցում ասաց քաղաքական մեկնաբան Արմեն Բաղդասարյանը՝ անդրադառնալով երեկ և այսօր Նիկոլ Փաշինյանի՝ խորհրդարանում հնչեցրած Արցախի և Արցախի վերաբերյալ հայտարարություններին:

Նշենք, որ արդեն երկու օր է՝ Նիկոլ Փաշինյանը և ՔՊ-ական պատգամավորները Արցախի և Արցախի կարգավիճակի մասին հայտարարություններ են անում, որոնք լուրջ մտահոգություններ են առաջացրել Հայաստանում և Արցախում: Այս հայտարարություններից երևում է, որ Հայաստանի իշխանություններն ամենևին էլ դեմ չեն Արցախի որևէ կարգավիճակով ընդգրկմանը Ադրբեջանի կազմում: Նիկոլ Փաշինյանը, մասնավորապես, հայտարարել է Արցախի կարգավիճակի հարցում հայկական կողմի նշաձողն իջեցնելու մասին, նաև հայտարարել է, որ եթե նախկինում բանակցությունների հիմքում դնում էին Ղարաբաղի կարգավիճակը, ապա այժմ հիմքում դնում են արցախցիների անվտանգության երաշխիքներն ու իրավունքները:

Արմեն Բաղդասարյանի արձանագրմամբ՝ Նիկոլ Փաշինյանը բաց տեքստով ասում , որ տեսնում է Արցախն Ադրբեջանի կազմում, որ Հայաստանն այլևս չի կարող Արցախի անվտանգության երաշխավորը լինել.

«Հայաստանի իշխանությունները ոչ միայն ի վիճակի չեն, այլևս ցանկություն էլ չունեն դա անելու, ավելին՝ իշխող խմբակցության մի քանի պատգամավորներ հայտարարում են, թե սխալ էր այն տեսակետը, որ Արցախը Ադրբեջանի կազմում ապագա չունի, այսինքն, ըստ իրենց, լավ էլ ունի: Սա իշխող կուսակցության տեսակետն է, իրենք այս հարցը թողնում են Արցախի բնակչությանը և ռուս խաղաղապահներին»,-ասաց Բաղդասարյանը:

Ինչ վերաբերում է Փաշինյանի հայտարարությանը, որ «միջազգային հանրությունը Հայաստանին ասում է՝ մի փոքր իջեցրեք Լեռնային Ղարաբաղի կարգավիճակի հարցում նշաձողը», Արմեն Բաղդասարյանը նկատում է՝ միջազգային հանրությունը միշտ էլ ճանաչել է Ադրբեջանի տարածքային ամբողջականությունը, բայց այն ժամանակ ուժերի հարաբերակցությունն այլ է եղել, Արցախը կարող էր ինքն իրեն պաշտպանել, Հայաստան կարող լինել Արցախի անվտանգության երաշխավոր, իսկ հիմա իրավիճակը բոլորվին այլ է.

«Նույն Նիկոլ Փաշինյանը ուղիղ մեկ տարի առաջ ասում էր, որ պետք է առաջնորդվել անջատում՝ հանուն փրկության գաղափարով, հիմա ինչն է փոխվել, որ դրանից հրաժարվել է, ես չգիտեմ»,-ասաց փորձագետը:

Փորձագետը ընդգծեց՝շատ կարճ ժամանակում ընդդիմությունը պետք է հստակեցնի իր անելիքն ու հանրությանը ներկայացնի իրավիճակից դուրս գալու ելքերի առաջարկը.

«Ընդդիմությունը պետք է փոխի իր գործելաոճը, հրաժարվի պոպուլիզմից, կենացային ցանկություններ արտահայտելու տրամաբանությունից, և եթե ասելիքներ կամ կոնկրետ ծրագրեր կան, պետք է ներկայացնեն այդ ծրագրերը:

Նիկոլ Փաշինյանն իր ծրագրերը հստակ ներկայացրեց, որպեսզի հասարակությունը կողմնորոշվի՝ ի՞նչ տարբերակների մեջ է ընտրությունը, այլապես ստացվում է, որ Նիկոլ Փաշինյանն ամեն ինչ հանձնում է, բայց դրան այլընտրանք չկա, քաղաքական դաշտի անելիքը սա պետք է լինի: Այստեղ այնտեղ դրոշ տնկելով ոչնչի չեն հասնելու, լրջագույն քաղաքական գործընթացներ են,որոնց դեմ շոուներով պայքարելն անիմաստ է, առավել ևս, որ Նիկոլ Փաշինյանը շոուների ավելի լավ մասնագետ է»,-ասաց Բաղդասարյանը:

Իսկ թե ո՞րը պետք է լինի հանրության անելիքը՝ Արմեն Բաղդասարյանը կարծում է, որ հանրությունը չի կարող այս հարցը լուծել .

«Միակ անելիքը պետք է լինի այն, որ եթե համաձայն չի այս իշխանության հետ, ակտիվորեն ցույց տա իր անհամաձայնությունը, և եթե կան մի քանի տարբերակներ, ապա ճիշտ ընտրություն կատարի դրանց միջև, եթե տարբերակներ ներկայացված չեն, հանրությունն ի՞նչ պետք է անի, այդ խնդիրները միայն պետական մակարդակով կարող են լուծվել »,-ասաց նա:

Փորձագետը շեշտեց՝ իրավիճակից գալու ելքերը պետք է ներկայացնեն քաղաքական ուժերը.

«Ընդ որում՝ սա այնպիսիս կարևոր հարց է, որ չի կարելի վստահել գործող իշխանություններին, այսինքն ՝ պետք է պահանջել, որ հարցը դրվի հանրաքվեի, կամ հրավիրվեն արտահերթ ընտրություններ, պայմանով, որ յուրաքանչյուր քաղաքական ուժ ներկայացնի, թե ինչպես է տեսնում Արցախի հարցի լուծումը »,-ասաց Բաղդասարյանը:

Նիկոլ Փաշինյան հայտարարությունները մտահոգություններ են առաջացրել Արցախում: Արցախի նախագահ Արայիկ Հարությունյանը հայտարարել է, որ անընդունելի են Արցախի կարգավիճակի վերաբերյալ Ադրբեջանի առաջարկները։

Արմեն Բաղդասարյանի խոսքով՝ Արցախի առջև այսօր հիմնական խնդիրը գոյաբանական խնդիրն է՝ ինչպե՞ս դիմակայել Ադրբեջանի հայատյաց քաղաքականությունը, ինչպե՞ս կանխել Արցախի հայաթափումը.

«Եթե Հայաստանի իշխանությունը հայտարարում է, որ այս հարցում իրենց վրա հույս դնել պետք չէ, այս դեպքում Արցախի իշխանությունները պետք է այլ ելք գտնեն, օրինակ` Արայիկ Հարությունյանը արդեն բաց տեքստով խոսում է Ռուսաստանի հետ ուղղահայաց հարաբերությունների մասին, այնտեղ նույնիսկ ստորագրահավաք են կարծես անցկացնում՝ Ռուսաստանին միանալու համար, սա լավ օրից չէ, այսինքն` ինչ-որ ելքեր են փնտրում, սեփական ուժերով չեն կարող ապահովել սեփական անվտանգությունը, Հայաստանն էլ չի ցանկանում դա անել և հայտարարում է, որ Արցախը տեսնում է Ադրբեջանի կազմում, Արցախի իշխանությունները պետք է արձանագրեն այս իրողությունները և հասկանան՝ ի՞նչ ճանապարհով են գնում և ինչպես են կանխելու Արցախի հայաթափում»,-ասաց Արմեն Բաղդասարյանը:

Աղբյուր` Փաստինֆո