Փաստ ինֆո

Քանի որ իմ գործընկերներից միայն ես եմ Երևանում, ես եմ եկել այստեղ՝ ձեր դեմքին ասելու այն, ինչ մտածում են հազարավոր մարդիկ։ Այս մասին ԱԺ-ում կառավարության հետ հարցուպատասխանի ընթացքում ասաց «Հայաստան» խմբակցության պատգամավոր Քրիստինե Վարդանյանը՝ դիմելով կառավարությանը։ 

Ինչպես արդեն տեղեկացրել ենք՝ ԱԺ ընդդիմադիր խմբակցությունները հայտնել են, որ այս քառօրյային չեն մասնակցելու, մեկնելու են Արցախ, քանի որ թիվ մեկ օրակարգն այժմ Արցախն է, սակայն Արցախ մուտք գործել այդպես էլ չի հաջողվել։ Այժմ ընդդիմադիր գործիչները Գորիսում են, որտեղ այսօր տեղադրվել է Արցախի դրոշը։

Կառավարության հետ հարցուպատասխանին ներկա ընդդիմադիր միակ պատգամավորը Քրիստինե Վարդանյանն է, որը հայտարարեց, որ, քանի որ իր գործընկերներից միայն ինքն է Երևանում, եկել է ԱԺ՝ վերջիններիս դեմքին ասելու այն, ինչ մտածում են հազարավոր մարդիկ։
Վարդանյանը հիշեցրեց, որ երեկ Ադրբեջանի թշնամական պետության ղեկավարը հայտարարել է՝ «եթե Հայաստանը զինեն, մենք դա բացասական կընկալենք։ Զանգեզուրի միջանցքը բացվելու է, եթե Հայաստանը դրան կամավոր չհամաձայնի, ապա կդիմենք այլ մեթոդի։ Մենք ասել ենք՝ ԼՂ անունով վարչատարածքային միավոր չկա։ Բրյուսելում ևս մեկ անգամ հստակեցրել եմ, որ Հայաստանն ընդունում է մեր պայմանները, իսկ «հակամարտություն» և «ԼՂ» չկային հայտարարության մեջ, որովհետև դրանք լուծված են և չեն կարող քննարկվել։ Արցախցիները պետք է ընդունեն, որ իրենք Ադրբեջանի քաղաքացիներ են և պետք է լինեն Ադրբեջանի դրոշի ներքո», սակայն կազմակերպված մի քանի ժամանոց շոուի ընթացքում կառավարության ներկայացուցիչները ոչ միայն չեն անդրադարձել այս հայտարարություններից որևէ մեկին, այլև՝ հայտարարել են, որ Ադրբեջանի ներկայացրած պայմաններն իրենց համար ընդունելի է։

«Շատ լավ իմանալով, որ Ադրբեջանը և թուրք-ադրբեջանական տանդեմը կանգ չի առնելու ոչ մի բանի դիմաց, անկախ նրանից՝ ինչ կզիջեք, դուք խոսում եք խաղաղության դարաշրջանի մասին, որի միակ երաշխիքը թուրքի խոսքն է և որի վերջնարդյունքը լինելու է նոր ցեղասպանությունը։ Այս ամենը հաշվի առնելով միայն արցախցիներին պետք է ասեմ՝ սիրելի արցախցիներ, լավ իմացեք, որ սա միայն ձեր հարցը չէ, Հայաստանում կան հարյուր հազարավոր արժանապատիվ քաղաքացիներ, որոնք գիտակցում են, որ սա հայկական հարց է»,- հայտարարեց Քրիստինե Վարդանյանը՝ ցույց տալով ձեռքում օգտագործված փալաս և նշելով, որ հիմա Հայաստանի անունից բանակցում է դա. «Դուք սա եք, սա է ձեր դեմքը, սա է ճշմարտությունը և սրանից փոխչել դուք չեք կարող»։

Աղբյուր` Փաստինֆո