Փաստ ինֆո

Այո, ես համաձայնություն եմ տվել, որ Հայաստանի և Ադրբեջանի ԱԳ նախարարները սկսեն խաղաղության պայմանագրի նախապատրաստական աշխատանքները։ Այս մասին ԱԺ-ում հայտարարեց ՀՀ վարչապետ Նիկոլ Փաշինյանը։ 

«Ադրբեջանի հետ խաղաղության պայմանագրի ստորագրումը՝ որքան հնարավոր է արագ, այո, մտնում է մեր պլանների մեջ, բայց պետք է ասեմ, որ այստեղ էլ իլյուզիաներ չունենք, որովհետև չենք բացառում, որ Ադրբեջանը կփորձի խաղաղության բանակցությունների գործընթացը հնարավորինս արագ փակուղի մտցնել՝ դա դարձնելով Հայաստանի և Արցախի դեմ նոր ագրեսիվ գործողությունների առիթ»,- հայտարարեց Նիկոլ Փաշինյանը՝ նշելով, որ նույն հաշվարկն ունեն նաև դելիմիտացիայի աշխատանքների կապակցությամբ, քանի որ չի բացառվում, որ Ադրբեջանն այդ գործընթացն օգտագործի՝ Հայաստանի նկատմամբ տարածքային պահանջներ ձևակերպելու համար՝ դե յուրե հայտարարելով, որ տարածքային պահանջ այլևս չունի։

Փաշինյանի խոսքով՝ հասկանալով և հաշվարկելով բոլոր ռիսկերն ու մարտահրավերները՝ եկել են այն եզրակացության, որ նույն կետում կանգնելը և գործընթացում որոշակի առաջընթաց չապահովելը ոչ միայն չի նվազեցնում, այլև՝ ավելի է սրում ռիսկերը։

«Այս է պատճառը, որ մենք նաև դելիմիտացիայի հարցում ենք Բրյուսելում եկել համաձայնության՝ մինչև ապրիլի վերջը ստեղծել դելիմիտացիայի և սահմանային անվտանգության հարցերով Հայաստան-Ադրբեջան երկկողմ հանձնաժողով և սկսել աշխատանքը»,- նշեց Փաշինյանը՝ հավելելով, որ մարտավարության համաձայն՝ պետք է ճշտել Ադրբեջանի պաշտոնական դիրքորոշումները՝ սահմանների հարցում, պաշտոնապես արձանագրել այդ նույն հարցում Հայաստանի դիրքորոշումները։

«Դիրքորոշումներում լինել մաքսիմալ լեգիտիմ, այսինքն՝ դելիմիտացիայի գործընթացում հիմնվել ՀՀ տարածքի ճշգրտման համար դե յուրե նշանակություն ունեցող փաստերի և ոչ թե ցանկությունների կամ զննությունների վրա, որովհետև արդեն նշեցի նման գործելակերպի վտանգների մասին»,- հայտարարեց Փաշինյանը։

Ընդ որում, թեև հայելային ետքաշման մասին իշխանականների պնդումները մշտապես քննադատության են արժանացել երկրում ստեղծված իրավիճակով մտահոգ քաղաքացիների, փորձագետների, նախկին ՄԻՊ Արման Թաթոյանի կողմից, քանի որ փաստացի հայելային ետքաշման հետևանքով մենք ստիպված կլինենք նահանջել մեր իսկ տարածքից, Փաշինյանը հայտարարեց, թե Բրյուսելյան հանդիպումից հետո իբրև իր հասցեին քննադատություններ են եղել, որ հրաժարվել է զորքերի հայելային ետքաշումից, մինչդեռ, ըստ Փաշինյանի, դա երբեք էլ մեր կողմից նախապայման չի եղել, պարզապես կարծում ենք, որ դելիմիտացիայի բնականոն գործընթաց հնարավոր է միայն այն սահմնների առնչությամբ, որտեղ անվտանգության և կայունության որոշակի մակարդակ կա, ինչը ցավոք չենք կարող ասել Հայաստան-Ադրբեջան այսօրվա սահմանի մասին։

«Մեր մտահոգությունը, թե Ադրբեջանը ցանկանում է դելիմիտացիային զուգահեռ պահպանել ռազմական լարվածությունը սահմանին՝ Հայաստանի նկատմամբ տարածքային նկրտումներ ձևակերպելու համար, ի վերջո, ընկալված է միջազգային հանրության կողմից, բայց արդեն վտանգավոր մի գծի ենք հասել, երբ զորքերի հայելային ետքաշման առաջարկը կարող էր ընկալվել որպես իրադրությունը փակուղի մտցնելու քաղաքականություն»,- նշեց Փաշինյանը՝ հավելելով, թե Բրյուսելում ճկունություն է ցուցաբերել։

Աղբյուր` Փաստինֆո