Փաստ ինֆո

«Ազգային անվտանգություն» կուսակցության նախագահ Գառնիկ Իսագուլյանի վերաբերյալ քրեական գործերը միացվեցին մեկ վարույթում։ 

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Վաչե Մարգարյանի նախագահությամբ, այսօր կայացել է Գառնիկ Իսագուլյանի վերաբերյալ քրեական գործով դատական նիստը։

Դատական նիստի մեկնարկին պաշտպան Աննա Ծառուկյանը միջնորդություն ներկայացրեց՝ մեղադրող դատախազին բացարկ հայտնելու մասին՝ հայտարարելով, որ դատախազը շարունակում է պաշտպանել շինծու մեղադրանքը, երբ խոսքը գնում է ակնհայտ անմեղ անձի և հանցակազմի բացակայության հիմքով քրեական գործի կարճման մասին։ Պաշտպանի խոսքով՝ եթե դատարանը կաշկանդված է դատաքննության փուլով, ապացույցների հետազոտմամբ, ապա դատախազը մինչև մեղադրական եզրակացությունը հաստատելն արդեն տեսել է ապացույցները, ունի ներքին համոզմունք առ այն, որ փաստերի հիման վրա հերքվում է հանցակազմը։

« Հանցակազմի բացակայության հիմքի պարագայում գալ և պաշտպանել մեղադրանքը՝ խոսում է այն մասին, որ կա շահագրգռվածություն՝ սուբյեկտիվ ընկալման հիմքով։ Գործ ունենք ոչ անաչառ դատախազի հետ, գործ ունենք դատախազի հետ, որը կոնկրետ թիրախավորված ապօրինի հետապնդման հիման վրա շարունակում է պաշտպանել մեղադրանք, որը չպետք է գոյություն ունենար»,- հայտարարեց փաստաբանը։

Մեղադրող կողմն առարկեց միջնորդության դեմ։ Դատարանը, լսելով կողմերին, հեռացավ խորհրդակցական սենյակ, որտեղ 15 րոպե մնալուց հետո վերադարձավ և հրապարակեց որոշում՝ դատախազին բացարկ հայտնելու միջնորդությունը մերժելու մասին։

Դատական նիստին քննարկվեց նաև Գառնիկ Իսագուլյանի վերաբերյալ երկու քրեական գործերը մեկ վարույթում միացնելու հարցը։

Մասնավորապես, խոսքը երկու նույնական և համասեռ բնույթի գործերի մասին է՝ սուտ մատնության հատկանիշներով, որոնցից մեկը վերաբերում է ՔԿ նախագահ Արգիշտի Քյարամյանի կողմից պատերազմի օրերին իբրև ադրբեջանցիներին 1400 հայկական անձնագիր բաժանելու գործին, որը հարուցվել և դատարան էր ուղարկվել շատ ավելի վաղ, իսկ մյուս քրեական գործը վերաբերում է Նիկոլ Փաշինյանի նախկին մամուլի խոսնակ, այժմ՝ Ուկրաինայում ՀՀ դեսպան Վլադիմիր Կարապետյանի՝ թուրքական հատուկ ծառայությունների կողմից հավաքագրված լինելու մասին արված հայտարարություններին։ Քրեական գործերով Գառնիկ Իսագուլյանը որպես մեղադրյալ է ներգրավվել ՀՀ քրեական օրենսգրքի 333-րդ հոդվածի 2-րդ մասի 1-ին կետով՝ սուտ մատնություն կատարելու հատկանիշներով, որը զուգորդվել է ծանր կամ առանձնապես ծանր հանցագործության մեջ մեղադրելով։ Արգիշտի Քյարամյանի վերաբերյալ հայտարարություններին առնչվող քրեական գործով Իսագուլյանի նկատմամբ որպես խափանման միջոց էր կիրառվել ստորագրությունը՝ չհեռանալու մասին, իսկ երկրորդ քրեական գործի հարուցումից հետո Իսագուլյանի նկատմամբ որպես խափանման միջոց է կիրառվել կալանավորումը։ Հետագայում դատաքննության նախապատրաստման փուլում դատարանը քննարկել է Իսագուլյանի խափանման միջոցի փոփոխման հարցը և նրա նկատմամբ գրավ կիրառելու որոշում կայացրել։ Նշենք, որ երկու գործերն էլ գտնվում էին դատավոր Վաչե Մարգարյանի վարույթում։

Այսօրվա նիստում դատարանը որոշել է մեկ վարույթում միավորել գործերը։ Դատական նիստը հետաձգվել է՝ դատախազ Սերոբյանի բացակայության հիմքով։

Հեղինակ՝ Իզաբել Սահակյան

Աղբյուր` Փաստինֆո