Փաստ ինֆո

Այն մարդիկ, որոնք Արցախի դրոշը բարձրացնելուց նոպաներ է ունենում, դա իրենց պրոբլեմն է։ Սա ձևական ակցիա չէ, սա շատ հստակ քաղաքական, ժողովրդական ուղերձ է՝ և՛ դրսի երկրներին, և՛ օրվա իշխանություններին։ Այս մասին լրագրողների հետ զրույցում ասաց ԱԺ «Հայաստան» խմբակցության պատգամավոր, ԱԺ փոխխոսնակ Իշխան Սաղաթելյանը։ 

Հիշեցնենք, որ ԱԺ «Հայաստան» խմբակցության ղեկավար Սեյրան Օհանյանն ԱԺ ամբիոնի վրա տեղադրեց Արցախի դրոշը, ինչից հետո հայտնեց, որ խորհրդարանական ընդդիմությունը չի մասնակցելու ԱԺ այս քառօրյային և մեկնում է Արցախ։ Իշխանական պատգամավոր Վահագն Ալեքսանյանն էլ ամբիոնից հեռացրել է դրոշը, իսկ Վաղարշակ Հակոբյանը հայտարարեց, թե Արցախի դրոշը ԱԺ ամբիոնին դնելով Արցախը չեն պաշտպանում։

Անդրադառնալով ՔՊ-ականների հայտարարությանը, թե Արցախը Երևանի կենտրոնում չեն փրկում, փրկում են՝ Ստեփանակերտում՝ Սաղաթելյանն արձանագրեց. «Եթե Արցախը փրկում են Ստեփանակերտում, բա ինչու՞ չեն գնում Ստեփանակերտ, ինչ գործ ունեն ասֆալտի վրա ճոռոմաբանությամբ զբաղվելով։ Իրենք ձեռքերը լվացել են, իրենց անգործունեությունը, Արցախի նկատմամբ դավաճանությունը հիմնավորելու համար փորձում են հերթական անգամ հղում անել ժողովրդին, թե դրանով կվտանգենք։ Իրենք արդեն վտանգել են»։

Լրագրողի դիտարկմանը, որ նախկինում արդեն ականատես ենք եղել, թե ինչպես է Արցախի դրոշը պղծվել, և այժմ, երբ Արցախի դրոշ է տեղադրվել ԱԺ-ում, ով պետք է վերահսկի, որ դրոշը մնա տեղում՝ Սաղաթելյանն արձագանքեց՝ նշելով, որ այդ վտանգը կա, բայց ով ոտնձգություն անի մեր խորհրդանիշի՝ Արցախի դրոշի նկատմամբ, Ալիևից ու թուրքերից ոչնչով չի տարբերվում, այդ դրոշի համար մեր զինվորը պայքարել է, արյան գնով ազատագրել է Արցախը և մեր պայքարն այդ դրոշի համար է։

Սաղաթելյանի խոսքով՝ ակնհայտ է, որ օրվա իշխանությունը երկիրը փորձում է տանել նոր կապիտուլյացիայի։

«Իրենց այս վարքագիծը հիմնավորելու համար փորձում են նման գռեհիկ, անմիտ ելույթներ ունենալ՝ հերթական անգամ ժողովրդին խաբելով, մոլորեցնելով և Ալիևով վախեցնելով»,-ասաց պատգամավորը։

Նրա խոսքով՝ շատ արագ գործընթացներ են տեղի ունենում, բրյուսելյան վերջին հանդիպումը ևս դրա վկայությունն է։

«Մենք գտնում ենք, որ Հայաստանի թիվ մեկ օրակարգը Արցախն է և Հայաստանի անվտանգությունը։ Այս պահին ԱԺ-ում քննարկել մեր երկրի կենսական շահերի հետ անմիջական առնչություն չունեցող հարցեր՝ նպատակահարմար չենք գտնում»,-ասաց Սաղաթելյանը։

Աղբյուր` Փաստինֆո