Փաստ ինֆո

Ընդդիմադիր գործիչների մուտքն Արցախ արգելվել է այս իշխանություններին սպասարկող համապատասխան կառույցների հրահանգով: «Փաստինֆո»-ի հետ զրույցում նման համոզմունք է հայտնել ռազմական փորձագետ Հայկ Նահապետյանը։

«Լինելով այս իշխանությունների ամենաանհանդուրժող քննադատներից մեկը, այնուամենայնիվ, կարծում եմ՝ ընդդիմությունը կարիք չուներ հրապարակային կերպով, դեմարշով այցելելու Արցախ, որովհետև սրանով նրանք Ադրբեջանին հնարավորություն տվեցին ասելու, որ ՀՀ բարձրաստիճան պաշտոնյաները (նշանակություն չունի՝ օրենսդիր, գործադիր, թե դատաիրավական դաշտից) իրենց երկրի տարածք են մուտք գործել, չունենալով ադրբեջանական կողմի համապատասխան թույլտվությունը։ Ես, սկզբունքորեն, համակարծիք եմ, որ եթե հայաստանյան պաշտոնատար անձինք, այս կամ այն առիթով մեկնում են Արցախ, ապա այդ մասին պետք չէ հրապարակային կերպով հայտարարել»,- ասել է ռազմական փորձագետ Հայկ Նահապետյանը։

Վերջինս նկատում է՝ անկախ Արցախի վարչատարածքային ստատուսից, աշխարհի ոչ մի պետություն այն չի ճանաչել, հետևաբար, եթե մենք, անգամ, նույնիսկ ընդունենք, որ այն այժմ միջազգային իրավունքի ուժով համարվում է ադրբեջանապատկան տարածք, ապա, սկզբունքորեն, Ադրբեջանի իշխանություններն այս առումով իրավացի են.«Խոսքն այստեղ չի վերաբերում հասարակ քաղաքացիների կողմից Արցախ կատարած այցերին։ Երբ Ադրբեջանն ասում է, որ իր երկրի տարածք այլ երկրի պաշտոնատար անձանց մուտքը պետք է համաձայնեցվի համապատասխան մարմինների թույլտվությամբ, այստեղ որևէ սխալմունք չկա։ Հետևաբար, ՀՀ իշխանությունների այս կեցվածքը, որով նրանք փորձել են արգելել ընդդիմադիր պատգամավորների մուտքն Արցախ, (իսկ ես վստահ եմ, որ դա կատարվել է այս իշխանություններին սպասարկող համապատասխան կառույցների հրահանգով), կանխվել է Ադրբեջանի իշխանությունների կողմից, առանց այն էլ, ագրեսիվ հռետորաբանության մեջ նոր շեշտադրումներ ավելացնելու փորձերը։ Այլ կերպ ասած, փաստացիորեն, Փաշինյանին հաջողվել է բավարարել Ալիևի պահանջը՝ արգելելու բարձրաստիճան պաշտոնյաների, տվյալ դեպքում՝ ընդդիմադիր գործիչների մուտքն Արցախ։ Հետևաբար, կարծում եմ, Ադրբեջանն այս այցին որևէ արձագանք չի տա, որովհետև մեր պատգամավորները, ըստ տարածված տեղեկությունների, մուտք չեն գործել Արցախի տարածք»,- ասում է ռազմական փորձագետը։

Անդրադառնալով Ազգային Ժողովում Արցախի պետական խորհրդանիշ հանդիսացող դրոշի հետ կապված այսօրվա միջադեպին, Հայկ Նահապետյանը նկատում է՝ սա, ամենայն հավանականությամբ, համատեղ իրականացված օպերացիա է.«Պատահական չէր, որ սորոսի ծռերրի կողմից, դեռևս ապրիլի 8-ին Արցախի դրոշի պղծման համար ընտրվել էին բնակության վայրով կամ գրանցումով Արցախի քաղաքացիներ։ Մենք տեսանք, որ այս իշխանությունների կողմից այդ քայլին համապատասխան իրավաքաղաքական և բարոյական գնահատական, այդպես էլ, չտրվեց։ Ավելին, այն, ինչ այսօր կատարվեց Ազգային Ժողովում, նախորդի շարունակությունն էր և սա մեկ անգամ ևս հաստատում է, որ Արցախի Հանրապետության պետական սիմվոլ հանդիսացող դրոշի պղծման գործընթացը ուղիղ կապ ունի հայաստանյան իշխանությունների հետ՝ հրահանգը միևնույն կետից է գալիս»-, ասում է ռազմական փորձագետը։

Ամփոփելով զրույցը Հայկ Նահապետյանը հավելում է՝ ամենայն հավանականությամբ, Նիկոլ Փաշինյանն ունի հստակ պարտավորություններ, այն է՝ իր կառավարած երկրում Արցախի հետ կապված ոչինչ չպետք է լինի և այդ պարտավորությունը նա ստանձնել է Ադրբեջանի նախագահի դիմաց։ Դրա լավագույն դրսևորումները մենք տեսանք այսօր՝ ԱԺ-ում և Արցախ այցելող պատգամավորների միջադեպի համապատկերում։

Աղբյուր` Փաստինֆո