Փաստ ինֆո

Հարավային Կովկասում պատերազմի հավանականությունը միշտ է բարձր եղել, հատկապես, որ պատերազմը դեռ չի ավարտվել, պարզապես այն «տաք» փուլից կրկին անցել է հիբրիդայինի։ «Փաստինֆո»-ի հետ զրույցում ասել է «Ազգային օրակարգ» կուսակցության գործադիր քարտուղար Արա Գասպարյանը՝ փաստելով, որ մեր թշնամիները շարունակում են Հայաստանը՝ որպես քաղաքական գործոն վերացնելու իրենց նպատակասլաց քաղաքականությունը։

«Հիմա, ընդհանուր առմամբ, օրակարգում պահելով ռազմական ներխուժման ֆոնը և սահմանների երկայնքով ռազմական ճնշումը, թշնամին փորձում է Հայաստանը գրավել փափուկ ուժի միջոցով։ Դա արվում է մեզ տարատեսակ «խաղաղության» թակարդ-օրակարգերի պարտադրման միջոցով՝ դիմակայության և ազգային հավակնությունների իրավունքից զրկելու, մեր քաղաքական, մեդիա, տնտեսական դաշտերի վրա վերահսկողություն սահմանելու, բանակի ու անվտանգային համակարգի իրական ֆունկցիոնալությունը վերացնելու, կարճաժամկետ հեռանկարում Հայաստանում նաև ժողովրդագրական փոփոխություններ առաջացնելու միջոցներով։ Նկատենք, որ փափուկ ուժի միջոցով Հայաստանի վերացման հեռանկարը պակաս վտանգավոր չէ, քան ռազմական։ Երկու միջոցներն էլ միտված են Հայաստանի վերջնական ոչնչացմանը։ Ինչ վերաբերում է մեր հարավային հարևանին, ապա այնտեղ՝ Իրանում, մեր թշնամիների ռազմավարական պլանների մասին, անշուշտ, քաջատեղյակ են և պարբերաբար փորձում են զսպել դրանց նկրտումները»,- ասում է Արա Գասպարյանը։

Հիշեցնենք, որ նախօրեին Իրանի Իսլամական հեղափոխության պահապանների կորպուսը իր թվիթթերյան էջում տեղադրել էր նոր տեսահոլովակ, որում, կրկին անգամ, շեշտել էր, որ Իրանը կտրուկ հանդես կգա միջազգային սահմանների փոփոխության ցանկացած ծրագրի դեմ։ Տարածված տեսահոլովակում շեշտվում են Հայաստանի Հանրապետության սահմանները, մասնավորապես, ընդգծված կերպով՝ Սյունիքը։

Հարցերին՝ մո՞տ է արդյո՞ք նոր պատերազմի վտանգը և ի՞նչ աշխարհագրություն այն կընդգրկի մեր երկրում՝ Արա Գասպարյանը նկատում է՝ պատերազմի տաք փուլի վերսկսման վերաբերյալ կանխագուշակություններ անել չէր ցանկանա։ Այնուամենայնիվ ակնհայտ է՝ պատերազմը շատ մոտ է, դրա վերսկսման հավանականությունը դամոկլյան սրի պես կախված է մեր գլխին։ Պրոցեսները կապված են աշխարհաքաղաքական գործընթացներից. «Թե որո՞նք կլինեն հարվածների հիմնական ուղղությունը կամ ուղղությունները, այս հարցի համար գոյություն ունի հետախուզություն, սակայն, ակնհայտ է, որ Արարատյան դաշտավայրը Երևանով, Արցախը, Սյունիքը, Վայոց ձորը, Գեղարքունիքն ու Տավուշը կարող են հայտնվել թշնամու առաջին հարվածների թիրախում»։

Հարցին՝ ինչո՞վ են զբաղված հայաստանյան իշխանությունները ստեղծված իրավիճակում՝ Արա Գասպարյանը պատասխանում է՝ նրանք սպասարկում են թշնամու օրակարգը. «Հետևաբար, հայության առաջին խնդիրը այսօր պետք է լինի օրվա իշխանություններին հեռացնելը։ Հայաստանում կոշտ ազգայնական իշխանության ձևավորումն, այլևս, օրակարգային հարց է, որն էլ երկիրը կնախապատրաստի տոտալ, համազգային պատերազմին։ Առաջին և հրատապ քայլերը պետք է լինեն՝ բանակի վերափոխումը, պահեստազորի համակարգի արդիականացումը, աշխարհազորի ձևավորում, երկրի տարածքն անառիկ ամրոցի վերածումը (երկիր -ամրոց կոնցեպտ) և իհարկե, բնակչության համատարած զինումը»։

Աղբյուր` Փաստինֆո