Փաստ ինֆո

Վերաքննիչ քրեական դատարանը՝ դատավոր Արմեն Դանիելյանի նախագահությամբ, հեռացել է խորհրդակցական սենյակ՝ «Ցորի» զորամասի աղմկահարույց գործով ամբաստանյալ Գևորգ Գևորգյանի նկատմամբ ընտրված խափանման միջոց կալանավորումն անփոփոխ թողնելու որոշման դեմ բողոքի գործով որոշում կայացնելու։ Այն կհրապարակվի վաղը։

Ինչպես արդեն տեղեկացրել ենք՝ Սյունիքի մարզի ընդհանուր իրավասության դատարանը՝ դատավոր Լուսինե Սեփխանյանի նախագահությամբ, «Ցորի» վերաբերյալ գործի՝ դատաքննության նախապատրաստման փուլում անփոփոխ թողել Գևորգյանի նկատմամբ ընտրված խափանման միջոց կալանավորումը։

Փաստաբան Գոռ Գևորգյանը «Փաստինֆո»-ի հետ զրույցում հայտնեց, որ, թեև նախորդ դատական նիստը հետաձգվել էր՝ պայմանավորված դատավոր Լուսինե Սեփխանյանի դեմ ներկայացված հանցագործության մասին հաղորդմամբ, այսօր դատարանն ավարտել է բողոքի քննությունը՝ առանց հարցնելու, թե, ի վերջո ինչ որոշում է կայացվել, ինչը պաշտպանի մոտ կասկածներ է առաջացրել առ այն, որ դատավորը քաջատեղյակ է, չի բացառվում, որ նույնիսկ զանգել և ասել են, որ հաղորդման հիման վրա ԱԱԾ-ն անգամ նյութեր չի նախապատրաստել։

Վերաքննիչ բողոքի շրջանակներում պաշտպանը վեր է հանել իրավունքի այն խախտումները, որոնք կարող էին պատճառ դառնալ որոշման բեկանման համար, սակայն չի կարող ասել՝ զուգադիպություն է արդյոք, որ գործը մակագրվել է հենց դատավոր Արմեն Դանիելյանին։

«Հարցում էլ անցկացնենք՝ 10-ից 9.5-ը կասեն, որ Արմեն Դանիելյանից արդարադատություն սպասելի չէ։ Դա միայն իմ կարծիքը չէ։ Այնպես որ՝ որևէ ակնկալիք չունեմ, զուտ էթիկայից ելնելով այսօր եկել եմ։ Ստիպված եղա Արմեն Դանիելյանին հիշեցնելու, որ մեր ազգը բավականին հետ է գնացել քրիստոնեությունից, Արմեն Դանիելյանին հիշեցրի Աստծո դատաստանի մասին, որ, եթե անգամ այս պահին ինքը կտրվի իրավունքից և կայացնի որոշում, որն իրենից ակնկալում են, խնդրեցի հիշեցնել Աստծո դատաստանի մասին և որ Աստծո դատաստանին արժանանալու է ոչ թե ինքը, այլ՝ իր սերունդները։ Մի պահ, իմ կարծիքով, դա սթափեցրեց Արմեն Դանիելյանին, անգամ հարց տվեց՝ արդյոք իրեն սպառնում եմ, ես էլ ստիպված պարզաբանեցի, որ Աստծով երբեք չեմ սպառնում, ընդամենը հիշեցնում եմ Աստվածաշնչյան մոտեցման մասին, թե ով է դատավորը և ինչ ֆունկցիա պետք է կատարի այստեղ»,- նշեց Գևորգյանը։

Հիշեցնենք, որ քրեական գործով Գեւորգ Գեւորգյանին մեղադրանք է առաջադրվել՝ ՀՀ քրեական օրենսգրքի 375-րդ հոդվածի 4-րդ մասով. ըստ նախաքննական մարմնի՝ անձնական շահագրգռվածությունից ելնելով` սեփական կյանքը փրկելու նպատակով, ՊԲ N զորամասի հրետանային դիվիզիոնի պատասխանատու սպա, մայորը դրսևորել է իշխանության անգործություն, որն առաջացրել է ծանր հետևանքներ։ Նախաքննության ընթացքում Գևորգյանը ցուցմունք է տվել՝ հայտնելով, որ երբ իրենց Ֆիզուլիի հատվածում տեղափոխել են նշված տեղամաս, տվել են նշանակետեր, որոնք Դ-20 տիպի հրանոթով խոցում էին, հասկացել է, որ մեր խոցելի հեռավորությունը 4200 մ է, մինչդեռ այդ տիպի հրանոթը խոցում է մոտ 17 կմ, ինչից մայորի մոտ հարց է առաջացել, թե ինչու այդքան հեռահար խոցող զինտեխնիկան տեղադրված է 4 կմ հեռավորության վրա, ինչի վերաբերյալ մտահոգությունը բարձրացրել է նաև հրամանատարության կազմի մոտ։

Հեղինակ՝ Իզաբել Սահակյան

Աղբյուր` Փաստինֆո