Փաստ ինֆո

Բրյուսելում հայկական կողմն ամբողջությամբ և վերջնականորեն հրաժարվել է Արցախից, լուծվել է նաև անկլավների խնդիրը։ Նման մտահոգություն «Փաստինֆո»-ի հետ զրույցում հայտնել է Արևմտահայոց հարցերի ուսումնասիրության կենտրոնի ղեկավար, հայագետ Հայկազուն Ալվրցյանը:

Բրյուսելում գաղտնի ձեռք բերված պայմանավորվածությունների մասին դատողություններ այս փուլում կարելի է անել միայն ինֆորմացիոն արտահոսքերից, որոնք իրականացվում են շահագրգիռ տարբեր շրջանակների կողմից: Այս համատեքստում «Փաստինֆո» լրատվականի հետ զրույցում հայագետը ուշադրություն է հրավիրել «Ազատություն» ռադիոկայանի ներկայացրած քարտեզի վրա, որն, ըստ նրա, թաքնված հաղորդագրություն է իր մեջ պարունակում:

Այդ քարտեզի վրա չկա գոյություն ունեցող Արցախը, բայց կա Ադրբեջանից դեպի Նախիջևան գնացող գոյություն չունեցող Մեղրիով անցնող երկաթուղին։ Նենգություն է սա՞, թե՞ սխալմունք, հարցնում է Հայկազուն Ալվրցյանն ու ինքն էլ պատասխանում. «Ուշադիր ուսումնասիրելով՝ Ադրբեջանի սահմաններում կարելի է նկատել Հայաստանի գույնով ներկված փոքրիկ կետ՝ Արծվաշենը, որը սրանց տերերի կողմից, հավանաբար, համարվում է Ադրբեջանի տարածքում գտնվող միակ հայկական տարածքը: Ի դեպ, ըստ այդ քարտեզի, ադրբեջանական երկաթուղին էլ անցնում է Մեղրու տարածքով»:

Հայագետը հավելում է՝ սա միանշանակ պատահականություն չէ. «Ինչի՞ մասին է սա խոսում. գուցե այն, որ դավադիր պայմանավորվածությունն արդեն իսկ կա, կրկին թաքուն, բոլորի մեջքի հետևում, որ կնքել է Նիկոլ Փաշինյան անունով մարդը՝ թուրքի հետ։ Բրյուսելից վերադարձի հաջորդ օրը նա Կառավարության նիստի ընթացքում հայտարարեց, թե մենք ունենք հողեր, որոնք Ադրբեջանի վերահսկողության տակ են։ Հիմա ես հարց եմ տալիս Նիկոլին՝ այդ Արծվաշենի՞ մասին ես խոսում դու։ Այսինքն, ըստ գործակալական ցանցի հրապարակած այդ քարտեզի՝ Արցախն արդեն ամբողջությամբ հանձնել ես, Մեղրիով ճանապարհը տվե՞լ ես և փոխարենն Արծվաշենն՞ է հետ վերադրաձվում մեզ։ Բոլորովին չի բացառվում, որ Բրյուսելում հենց այս քարտեզն է ընդունվել»,- ասում է հայագետը։

Հայկազուն Ալվրցյանը խիստ կասկածներ ունի՝ դրոշի և քարտեզի հետ կապված պատմության միաժամանակյան ի հայտ գալը համաձայնեցված և փոխկապակցված են իրար հետ։ Արցախի ուրացումն այդ քարտեզի վրա է, ասում է հայագետն ու հավելում՝ ըստ այս տրամաբանության, ստացվում է, որ անկլավների հարցը լուծված է, անկլավները հանձում են.«Եթե կա արդեն ձեռք բերված համաձայնություն՝ միայն Արծվաշենի անկլավը թողնել հայերին, ուրեմն կա նաև համաձայնություն՝ դրա դիմաց Ադրբեջանին հանձնել մյուս անկլավները։ Այսինքն, ստացվում է, որ հայ- ադրբեջանական տարածքային խնդիրները վերածվել է անկլավների խնդրի։ Արցախն իսպառ քաղաքական օրակարգից դուրս է։ Չխոսենք այն մասին, որ Արցախի դեմ արշավը սկսվել էր դեռ շատ վաղուց՝ 2018 թվականից, այս մասին, արդեն շատ է խոսվել, չմանրամասնենք։ Ցավալին այն է, որ այդ արշավը մտել է նոր և, թերևս, վերջնական փուլ։ Կհաջողի՞ արդյոք թուրք – ադրբեջանական տանդեմին ավարտին հասցնել դավադիր հայ իշխանության հետ սկսած գործը, կարծում եմ ՝ոչ»։

Ամփոփելով զրույցը Հայկազուն Ալվրցյանը առաջարկում եմ, որպեսզի լրատվամիջոցն, ինչպես հարկն է, ներողություն խնդրի այդ սխալի համար, և հրատարակի այն քարտեզը, որն արտահայտում է իր քաղաքականությունը:

Աղբյուր` Փաստինֆո