Փաստ ինֆո

«Պարզվում է, Արցախի ուրացման պրոցեսը հասցվել է ամենաբարձր մակարդակի։ Դրանով արդեն, բացահայտ կերպով, զբաղվում են Հայաստանի թրքացած իշխանություններն ու նրանց սպասարկող գործակալական ուժերը։ Արցախի դրոշի պղծումը սրա վառ դրսևորումն էր։ Ընդ որում, նկատենք, որ Հայաստանի տարածքում սա, կարծես, մասսայական բնույթ է կրում։ Երեկ էլ Արտաշատի գլխավոր հրապարակից էին հեռացրել Արցախի Հանրապետության դրոշը»-«Փաստինֆո»-ի հետ զրույցում արձանագրել է Արևմտահայոց հարցերի ուսումնասիրության կենտրոնի ղեկավար, հայագետ Հայկազուն Ալվրցյանը։

Վերջինս հիշեցրեց՝ հանրաքվեի արդյունքում Արցախը հռչակել է իր անկախությունը, և որևէ մեկը՝ հայ իրականության կամ Սփյուռքի մեջ, չի մերժել, չի ժխտել կամ չի ընդվզել Արցախի անկախության և պետականության գոյության դեմ։ Ավելին, Հայաստանը մշտապես իրեն հռչակել է որպես Արցախի անվտանգության երաշխավորը.

«Թեև Արցախն ինքնահռչակ պետություն է և նրա միջազգային կարգավիճակը ճանաչված չէ ո՛չ Հայաստանի, ո՛չ աշխարհի կողմից, այսինքն՝ դե յուրե Արցախը ճանաչված չէ, բայց դե ֆակտո, ամբողջ աշխարհն է ճանաչում Արցախի անկախության փաստը։ Այդ մասին են խոսում միջազգային հարթակներում տարիներ ի վեր տարվող բանակցությունները՝ Արցախի պետականության և կարգավիճակի շուրջ, այդ թվում նաև Մինսկի խմբի կողմից։ Ավելին, այդ բանակցությունների ընթացքում շեշտվել է նաև Արցախի ինքնորոշման իրավունքի գերակայությունը՝ մյուս իրավունքների նկատմամբ։ Փաստենք միայն, որ Արցախը, սկզբունքորեն, մերժված է բացառապես երկու պետությունների՝ Թուրքիայի և Ադրբեջանի կողմից։ Հետևաբար, բոլոր նրանք, ովքեր մերժում են Արցախի գոյությունը՝ անխոս և անկասկած թուրք-ադրբեջանական տանդեմի շահերի սպասարկուներն են՝ կլինեն դա Հայաստանի ներկա իշխանությո՞ւնը, թե՞ նրանց ծառայություններ մատուցող այս կամ այն քաղաքական ուժերը, որոնք, ամենայն հավանականությամբ, համաձայնության են եկել թշնամական տանդեմի հետ, որն իրենից ենթադրում է Արցախի պետականության ոչնչացում»։

Հայագետն ընդգծել է՝ դրոշի գույները ներկելը, նշանակում է պետական սիմվոլի պղծում.«Թեև այդ արարքն իրականացնողները հայտարարում են, իբր, դրանով ցանկացել են միավորել Արցախի և Հայաստանի կարգավիճակը, այնուհանդերձ, կասկածից վեր է՝ նպատակն այլ է, ինչպես արդեն ասացի։ Մենք գործ ունենք ինքնահռչակ պետության դրոշի հետ, ի՞նչ է նշանակում դրա վրա տարբեր գույներով աղավաղումներ անել և անունը դնել՝ միացում։

Անդրադառնանք սրա ակունքներում կանգնածներին…Նիկոլ Փաշինյան անունով վարչապետը վերջերս հետևյալ ձևակերպումն արեց՝ Ադրբեջանի կազմից դուրս Արցախի կարգավիճակ ինքը չի տեսնում։ Ի՞նչ է սա նշանակում՝ այն, որ Արցախի կարգավիճակը, ըստ իր պատկերացումների, պետք է որոշվի Ադրբեջանի կազմում, այլ կերպ ասած՝ նա հրաժարվում է Արցախի ինքնորոշման իրավունքից։ Հենց սա է պատճառը, որ, արդեն տևական ժամանակ, այս իշխանության անդամներից որևէ մեկը չի արտաբերում Արցախի Հանրապետություն բառակապակցությունը»։

Հայկազուն Ալվրցյանի դիտարկմամբ՝ Արցախի հետ կապված փաշինյանական մանիպուլյացիաները հղի են խիստ վտանգավոր հետևանքներով։ Արդեն այսօր տեղի ունեցած դրոշի պղծման արարքը, նույնպես, սարսափելի որևէ աղետի գույժ կարելի է որակել.

«Մենք տեսանք, թե ինչ պատահեց, երբ այդ մարդը Արցախում գոռգոռաց՝ «Արցախը Հայաստան է և վերջ» նախադասությունը։ Սա ուզում էր ասել, իբր, Արցախը Հայաստանի մաս է և, ի պատասխան այդ արտահայտության, ընդամենը օրեր անց մենք հայտնվեցինք արյունալի պատերազմի մեջ։ Այսօր սցենարը նույնությամբ կրկնվում է, միայն դերակատարն է փոխվել։ Հիմա էլ՝ իրեն սպասարկող թուրքահպատակ ինչ-որ քաղաքական թիմի անդամներ, պղծելով Արցախի դրոշը, հայտարարում են, թե դա անում են, իբր, Հայաստանի և Արցախի միասնականության նպատակով։ Հետևաբար՝ սպասենք հերթական ստոր սադրանքին, որ կարող է պատահել Արցախի և Հայաստանի հետ»։

Ամփոփելով զրույցը՝ հայագետ Հայկազուն Ալվրցյանը հավելել է՝ այնուհանդերձ, թուրք ադրբեջանական տանդեմի շահերը ներկայացնող Փաշինյանի և իրեն կցված գործակալական ցանցի պլանները հաջողելու որևէ շանս չունեն.

«Ես լիահույս եմ, որ նրանք չեն հաջողելու։ Կգա մի պահ, որ կկատարվի անսպասելին՝ ժողովրդական ընդվզումը կպայթի։ Հակառակ դեպքում, ամբողջ Արցախն, ուղղակի, կցեղասպանվի, որից հետո Հայոց պետականության մասին խոսք լինել չի կարող։ Մինչև ընթացիկ տարվա աշուն, այս բոլոր հարցերն իրենց հանգուցալուծումը կստանան»։

Աղբյուր` Փաստինֆո