Փաստ ինֆո

Նիկոլ Փաշինյանին հրավիրելով Բրյուսել՝ միջազգային հանրություն կոչվող հավաքական կոլխոզը Հայաստանի վարչապետի ձեռքով մաքրեց ռազմական հանցագործ Ալիևի 44-օրյա պատերազմի ժամանակ և դրանից հետո առ այսօր շարունակվող հանցագործությունների արյունը: «Փաստինֆո»-ի հետ զրույցում նման հայտարարություն է արել ԱԺ նախկին պատգամավոր Նաիրա Զոհրաբյանը՝ անդրադառնալով Նիկոլ Փաշինյան-Ալիև-Շառլ Միշել բրյուսելյան բանակցություններին։

Նշենք, որ 4,5 ժամ տեւած բանակցությունների արդյունքում երկու որոշում է կայացվել՝ երկու երկրների միջև սկսել խաղաղության բանակցությունների նախապատրաստական աշխատանքները, ինչպես նաև մինչև ապրիլի վերջ ստեղծել Հայաստանի և Ադրբեջանի միջև սահմանների դելիմիտացիայի հարցերով երկկողմ հանձնաժողով: Անդրադառնալով հանդիպման արդյունքներին՝ Նաիրա Զոհրաբյանն արձանագրում է՝ ոչ մի խոսք Արցախի, Արցախի կարգավիճակի մասին, ԵԱՀԿ Մինսկի խմբի, դրա մանդատի մասին, չկա որևէ դատապարտող հայտարարություն Ադրբեջանի՝ Հայաստանի և Արցախի սուվերեն տարածք ներխուժելու մասին։

«Փաստինֆո»-ի հաղորդմամբ՝ կառավարության այսօրվա նիստում Ն. Փաշինյանը հայտարարել է, թե Բրյուսելում խոսել է Լեռնային Ղարաբաղում անվտանգային իրավիճակի վատթարացման շուրջ, բայց դրանք չեն հանգեցրեցին միասնական գնահատականի, ուստի պատեհ չի համարել հարցի հերթական քննարկումը։

Ն.Զոհրաբյանը նկատում է՝ Արցախի հարցը, կարծես, փակված է, Արցախի հարց գոյություն չունի:

«Փոխարենը Շառլ Միշելը կողմերին հայելային հետքաշման կոչ է անում, սրա աղետալի հետևանքը մենք տեսել ենք Քարագլխում,երբ հայկական կողմը, անսալով հերթական կոչին, հայելային կերպով զորքերը հետ քաշեց, ադրբեջանական կողմը ինչպես միշտ խաբեց, ավելին՝ Փառուխի կածաններով նրանք ամրակայվեցին Շուշիին համազոր ռազմավարական նշանակություն ունեցող Քարագլուխ բարձունքում։ Հայտարարության մեջ մենք չտեսանք որևէ բառ, որն Ադրբեջանին կոչ կաներ հետ քաշել զորքերը ելման դիրք, որտեղ եղել է մինչև Քարագլխի զավթումը, ավելին՝ մայիսի 12-ին արդեն կլրանա մեկ տարին, որ ադրբեջանական ուժերը օկուպացրել են Հայաստանի սուվերեն տարածքը և որևէ տեղ չի պատրաստվում գնալ, այդ հայտարարության մեջ չտեսանք որևէ դատապարտող խոսք սրա մասին»,-ասաց Զոհրաբյանը:

Նկատենք, որ Ռուսաստանը բազմիցս հայտարարել է, որ Հայաստանի և Ադրբեջանի միջև սահմանազատման և սահմանագծման աշխատանքները պետք է կատարվեն ռուսական կողմի միջնորդությամբ, ավելին՝ Ռուսաստանը նշել է, որ առանց իր մասնակցության չի կարող դա արվել, քանի որ քարտեզները գտնվում են իրենց շտաբում։ Իսկ Բրյուսելում կայացած հանդիպման ժամանակ որոշվել է ստեղծել Հայաստանի և Ադրբեջանի միջև սահմանների դելիմիտացիայի հարցերով երկկողմ հանձնաժողով, սակայն ոչ մի խոսք ռուսական կողմի միջնորդության մասին:
Նաիրա Զոհրաբյանը նկատում ՝ այս օրակարգը իր որոշ մեսիջներով հերթական թիկունքից հարվածն էր Ռուսաստանին

«Բայց ես վստահ եմ, որ առաջիկայում Նիկոլ Փաշինյանը այս նույն դրույթները քննարկելու է Ռուսաստանի հետ՝ փորձելով բերել բալանսի: Չի կարող սահմանազատման և սահմանագծման մասին խոսք լինել, երբ ադրբեջանական զինուժը օկուպացրել է Հայաստանի սուվերեն տարածքը, սա նշանակելու է Հայաստանի և Արցախի շատ ավելի ծանր կապիտուլյացիա, քանի նոյեմբերի 9-ի պարտությունն էր»,- արձանագրել է գործիչը:

Նշենք նաև, որ հանդիպման արդյունքում Հայաստանի և Ադրբեջանի ղեկավարները որոշել են երկու երկրների միջև սկսել խաղաղության բանակցությունների նախապատրաստական աշխատանքները՝ առանց ԵԱՀԿ Մինսկի խմբի միջնորդության: Մինչդեռ Հայաստանի ԱԳՆ-ն հայտարարել էր, որ դիմել են ԵԱՀԿ Մինսկի խմբին՝ համանախագահների շրջանակներում խաղաղության պայմանագրի շուրջ բանակցություններ սկսելու համար։ Բրյուսելյան հայտարարությունից բխում է, որ Հայաստանը հետ է կանգնել իր առաջարկից։

Ըստ Զոհրաբյանի՝սա նշակում է, որ Արցախի հարցով միակ փորձագիտական, իրավական մանդատ ունեցող ԵԱՀԿ Մինսկի խմբի վրա դրվեց «տապանաքար».

«Մինսկի խմբին հանել օրակարգից նշանակում է բավարարել Ալիևի այն հայտարարությունը, որ ԵԱՀԿ Մինսկի խումբ այլևս չկա»,-արձանագրել է զրուցակիցը

Ամփոփելով Բրյուսելյան հանդիպման արդյունքները՝ Նաիրա Զոհրաբյանը նկատում է՝ հայկական կողմի մինչ այս արված բոլոր առաջարկները մերժվել են, միայն Ադրբեջանի առաջ քաշած օրակարգն է եղել առաջնային.

«Իշխանության տարբեր ներկայացուցիչներ, իհարկե, ունեն իրենց բացատրությունները, թե իրենք հաղթող կողմ են և իրենք են թելադրում օրակարգ: Ամենամեծ խնդիրն էլ այն է, որ այս իշխանությունը շարունակում է ունենալ հասարակության մի որոշակի սեգմենտի աջակցությունը, որն այս իշխանության յուրաքանչյուր քայլ, այդ թվում Արցախի ամբողջական հանձնումը, ողջունելու է»,-նկատել է Զոհրաբյանը:

Աղբյուր` Փաստինֆո