Փաստ ինֆո

«Կապիտուլյանտների վարչակազմի ղեկավարից պետք չէ ակնկալել Հայաստանի Հանրապետության, Արցախի կամ համայն հայության շահերի պաշտպանություն։ Իրականությունն այն է, որ այս մարդը գնացել էր Բրյուսել՝ իրեն վերապահված ազգադավ ծրագիրը մինչև վերջ ավարտին հասցնելու համար, որտեղ էլ նա իր «քարդաշ» Ալիևի հետ այդ ծրագրի վերջին հանգրվանին է եկել։ Այլ կերպ ասած, մարդը գնացել էր անելու այն, հանուն ինչի իրեն իշխանության են բերել անգլոսաքսոնական ուժերը»,- «Փաստինֆո» -ի հետ զրույցում ասել է ռազմական փորձագետ Դավիթ Ջամալյանը՝ վերլուծելով երեկ Բրյուսելում տեղի ունեցած եռակողմ բանակցությունների արդյունքները։

Երևանում՝ կառավարության հերթական նիստում Փաշինյանի ելույթների բովանդակությունը Դավիթ Ջամալյանը, մեծ իմաստով, լուրջ չի համարում, հետևաբար՝ անդրադառնալ Փաշինյանի ելույթների այս կամ այն թեզին և փորձել լուրջ մեկնաբանություններ կատարել դրանց վերաբերյալ, ըստ վերջինիս, ժամանակի զուր կորուստ է. «Կա անբովանդակ խոսույթ, մեկը մյուսի հետ տրամաբանական կապ չունեցող հայրենասիրական ֆրազաներ, որի իրական նպատակն է՝ հերթական անգամ մոլորության մեջ գցել հանրային լայն զանգվածներին՝ շեղելով նրանց ուշադրությունը մեր երկրում կատարվող խիստ վտանգավոր և դավադիր ծրագրից։ Ստացվում է, որ նա գնացել էր Բրյուսել՝ կյանքի կոչելու թուրք – ադրբեջանահաճո սխեման, ինչը նա, արդեն երեկ արեց, հիմա վերադարձել ու իրեն բնորոշ մանիպուլյատիվ հնարքներով ծուղակի մեջ է գցում մարդկանց։ Սրա ինչը՞ մեկնաբանես…»,- նկատում է ռազմական փորձագետը։

Հարցին՝ առարկայական ի՞նչ արհավիրքներ պետք է սպասել Հայաստանում բրյուսելյան այցից հետո՝ Դավիթ Ջամալյանը պատասխանում է՝ արհավիրքն իրականում շատ կանխատեսելի է.«Այս մարդը ճանաչելու է Ադրբեջանի տարածքային ամբողջականությունը, որովհետև ստեղծված իրավիճակում, դեմարկացիա և դելիմիտացիա իրականացնելը, միայն դա է նշանակում։ Միաժամանակ, մեծագույն հարցականի տակ է դրվելու Արցախի ճակատագիրը, որն իր հույսը սկսելու է կապել միայն Ռուսաստանի Դաշնության հետ, որովհետև Հայաստանում ռեժիմն ազգադավ է։ Այլ կերպ ասած, ստացվում է, որ Փաշինյանի ձեռամբ, Արցախը Հայաստանի Հանրապետության կազմում վերամիավորված տեսնելու երազանքից մենք մեկընդմիշտ հրաժարվելու ենք»։

Անդրադառնալով բրյուսելյան հանդիպման հետևանքով Հայաստանում սպասվելիք անցանկալի հետևանքների թեմային, Դավիթ Ջամալյանը նշում է՝ առավել նկատելի է դառնում Սյունիքի գլխին կախված վտանգը. «Ընդ որում, Փաշինյանը վերջերս հայտարարեց այն մասին, որ Ադրբեջանը համաձայն չէ սահմանազատման գործընթացն իրականացնել Խորհրդային միության քարտեզների հիման վրա։ Հարց է ծագում՝ իսկ ինչի՞ հիման վրա է կատարվելու այդ սահմանազատումը, որը, նույնպես, անհայտ է։ Կամ այդ ի՞նչ հանձնաժողով են պատրաստվում ստեղծել Ալիև - Փաշինյան քարդաշները, որով պետք է քննարկվեն, այսպես կոչված, Խաղաղության պայմանագրի կետերը, ևս հայտնի չէ։ Ինչ սահմաններ են մեզ հրամցնելու այս քարդաշների կողմից կազմված հանձնաժողովները, հայտնի չէ։ Առնվազն հայտնի է միայն այն, որ մեզ Հայաստանի Հանրապետության տարածքներից նույնպես որոշակի կորուստներ են սպասվում։ Այլ կերպ ասած, բրյուսելյան այցից հետո, վտանգավոր անորոշությունից զատ, այս պահին Սյունիքի և առհասարակ ՀՀ-ի մասով ոչինչ արձանագրել չենք կարող»։

Ամփոփելով զրույցը Դավիթ Ջամալյանն արձանագրել է՝ այս իրավիճակից մեզ կարող է դուրս բերել միայն միասնական դարձած հայ ժողովուրդը. «Մոտավորապես 20.000 մարդ օրերս Ազատության հրապարակում ոչ ասեց այս թրքացման ծրագրին։ Վստահ եմ, որ շատ ու շատ մեր հայրենակիցներ, ովքեր այս կամ այն պատճառով չէին եկել հրապարակ, տանը նստած հետևում էին այդ հանրահավաքին։ Փաստն այն է, որ օրվա իշխանությունների առաջնորդած թրքացման օրակարգը մեր հասարակությունը մերժել է։ Պարզապես, մի ակտիվ կորիզ ակներևաբար դուրս է գալիս՝ փողոցում իր պայքարը մղելու, մյուսները դեռևս պասիվ են։ Հիմա բոլոր պետականակենտրոն ուժերի գերխնդիրը պասիվ հատվածին ակտիվացնել է։ Հանրային դիմադրությունն է միայն, որ ունակ է զսպելու թրքահաճո իշխանության ազգադավ օրակարգը։ Մյուս կողմից, ես գիտեմ նաև, որ աշխարհաքաղաքական գործոններով պայմանավորված, Փաշինյանի և իր ռեժիմի հեռանկարները շատ մշուշոտ են, նրանց ազգադավ իշխանության օրերը՝ հաշված։ Հայոց պատմության այս անփառունակ էջը մենք շուտով փակելու ենք։

Աղբյուր` Փաստինֆո