Փաստ ինֆո

Բրյուսելում տեղի ունեցած եռակողմ բանակցություններից հետո Եվրոպայի Խորհրդի նախագահ Շառլ Միշելը հանդիպել է լրագրողների հետ:

«Մենք շատ երկար ժամանակ ենք ծախսել, քննարկել ենք, խոսել ենք, կողմերը ներկայացրել են իրենց ասելիքները։ Ես առաջընթաց եմ զգում։ Հույս ունեմ, որ առաջիկա շաբաթներին կստղծենք կայուն կապ հաղորդակցման համար: Դժվար է կանխատեսել, թե երբ կստորագրվի խաղաղության պայմանագիրը: Ես չեմ թերագնահատում երկու կողմերի մարտահրավերներն ու դժվարությունները, բայց ես զգում եմ, որ կա ընդհանուր ցանկություն առաջընթացի համար», - «Սպուտնիկ Արմենիայի» փոխանցմամբ` ասել է եվրոպացի գործիչը։

Միշելն ընդգծել է բոլոր հումանիտար խնդիրների ամբողջական և արագ լուծման անհրաժեշտությունը, ներառյալ պահվող անձանց ազատումը և անհայտ կորածների խնդրի համակողմանի լուծումը, և հայտարարել, որ ԵՄ-ն պատրաստ է աջակցել այդ նախաձեռնությանը:

ԵՄ-ն կշարունակի աջակցել Ադրբեջանի և Հայաստանի միջև վստահության ամրապնդման միջոցառումներին, ինչպես նաև մարդասիրական ականազերծման ջանքերին, այդ թվում՝ շարունակելով փորձագիտական խորհրդատվություն տրամադրել և ավելացնելով ֆինանսական օգնությունը, ինչպես նաև օգնություն տրամադրել հակամարտությունից տուժած բնակչության վերականգնմանը:

Նա եւս վերահաստատել է, որ հանդիպման արդյունքներով ձեռք է բերել պայմանավորվածություն 2021թ. նոյեմբերի 26-ին Սոչիում ձեռք բերված համաձայնության համաձայն մինչև ապրիլի վերջ ստեղծել Հայաստանի և Ադրբեջանի միջև սահմանների դելիմիտացիայի հարցերով երկկողմ հանձնաժողով, որի մանդատը կլինի`երկկողմ սահմանազատում, սահմանի երկայնքով և դրա շրջակայքում կայուն անվտանգային իրավիճակի ապահովում:

Հայաստանի վարչապետը և Ադրբեջանի նախագահը Արտաքին գործերի նախարարներին հանձնարարել են մեկնարկել երկու երկրների միջև խաղաղության պայմանագրի նախապատրաստման վրա:

Նկատենք, որ Շառլ Միշելը չի անդրադարձել Արցախի հիմնախնդրին:

Աղբյուր` Փաստինֆո