Փաստ ինֆո

Բոլոր մտավախությունները, ցավոք սրտի, իրականություն դարձան։ Հայտարարությունը վկայում է այն մասին, որ կլինի գրավոր, թե բանավոր՝ միևնույն է՝ ՀՀ շահը չի պաշտպանվում, Նիկոլը որտեղ գնա, աշխարհի որ մայրաքաղաքում լինի խնդիրը զիջելն է, զիջելն այնքան, որքան պետք է իր իշխանավարությունը երկարաձգելու համար։ Այս մասին լրագրողների հետ զրույցում ասաց ԱԺ «Պատիվ ունեմ» խմբակցության պատգամավոր Աննա Մկրտչյանը՝ անդրադառնալով Բրյուսելում կայացած Փաշինյան-Ալիև-Շառլ Միշել բանակցություններին։

Ինչպես արդեն տեղեկացրել ենք՝ երեկ 4,5 ժամ տեւած բանակցությունների րդյունքներով ձեռք է բերել պայմանավորվածություն` 2021թ. նոյեմբերի 26-ին Սոչիում ձեռք բերված համաձայնության համաձայն` մինչև ապրիլի վերջ ստեղծել Հայաստանի և Ադրբեջանի միջև սահմանների դելիմիտացիայի հարցերով երկկողմ հանձնաժողով, որը օժտված կլինի նաև սահմանի երկայնքով անվտանգություն և կայունություն ապահովելու հարցերով:

Միաժամանակ Հայաստանի վարչապետը և Ադրբեջանի նախագահը Արտաքին գործերի նախարարներին հանձնարարել են մեկնարկել երկու երկրների միջև խաղաղության բանակցությունների նախապատրաստական աշխատանքները։

«Գնալ Բրյուսել, չխոսել և չստանալ գրավոր տեքստ՝ հայ ռազմագերիների, պահվող անձանց, Բաքվում ՀՀ քաղաքացիների նկատմամբ ապօրինի դատավճիռների հետ կապված, նշանակում է մեկ բան՝ չունենալ այնտեղ ներկայացուցիչ, չունենալ մարդ, ով քո երկրի և պետականության շահերն է պաշտպանում։ Գնալ հասնել Բրյուսել, չխոսել և չստանալ գրավոր տեքստ այն մասին, որ մինչև հիմա Ադրբեջանի ագրեսիվ քաղաքականությունը, ագրեսիվ պատերազմական քաղաքականությունը ՀՀ սուվերեն տարածքում զինվորականների և զորախմբերի միավորումներ տեղակայելով սկսվում և ավարտվում է վարձկաններով հայ բնակչությանն ահաբեկելով, Արցախում հումանիտար տեռոր ստեղծելով։ Այս ամենից ոչ մեկին չանդրադառնալը նշանակում է, որ այնտեղ կան Հայաստանի թշնամիներ, բոլորն ունեն ներկայացուցիչներ՝ բացի Հայաստանից»,- նշեց Աննա Մկրտչյանը։

Պատգամավորը նշեց, որ ունի վստահություն, որ ամեն անգամ, երբ Նիկոլն իր ոտքը դուրս է դնում Հայաստանից, դա հայկական շահն ուրանալու, հայկական օրակարգը մոռացության մատնելու մասին է և այն գործողությունները, որոնք այս ամբողջ ընթացքում արել են, նրա համար է, որ բթացնեն հայ հասարակության մոտ հայկական օրկարգի գոյության անհրաժեշտությունը։

«Այսինքն՝ սկսենք, օրինակ, համակերպվել այն մտքի հետ, որ Հայաստանը կարող է լինել տրանսպորտային հանգույցների միջանցք, համակերպվենք այն մտքի հետ և իրականությունից անցում կատարենք, որ մինչև 2018թ ունեինք թշնամի, որ խոստովանում էր, որ փակ դռների ետևում իրենց ստիպում են ճանաչել Արցախի անկախությունը, մենք հիմա հասել ենք նրան, որ ՔՊ ուսապարկերն ասում են և փորձում են մեզ հաշտեցնել այն մտքի հետ, որ Արցախի կարգավիճակը կարող է լինել Ադրբեջանի կազմում»,- նշեց Մկրտչյանը։

Պատգամավորի համոզմամբ՝ Նիկոլի ընթացքը կարող է կասեցվել միայն իր՝ քաղաքական առումով գոյության բացակայությամբ։ Նրա խոսքով՝ Բրյուսելից տարածված հայտարարությունը խոսում է այն մասին, որ չկա Արցախ, չկա հայկական շահի մասին որևէ հիշատակում։

«Խոսքը հետևյալն է՝ ափալ-թափալ եկեք տարածքային ամբողջականության հարց լուծենք, ափալ-թափալ եկեք տեսնենք՝ ինչ է մեզնից ձեզ պետք՝ ստացեք, հայելային ետքաշման մասին է խոսքը, երբ տեսանք, թե ինչ հետևանքների է դա բերում և, ի վերջո, ինչ հայելային հետքաշում, եկել մխրճվել են մեր տարածք, մենք ասում ենք՝ մեր տարածքից մենք էլի հետ գնանք, դուք եկեք առա՞ջ։ Սրա մասին էր Բրյուսելը»,- նշեց Մկրտչյանը։

Աղբյուր` Փաստինֆո