Փաստ ինֆո

Դատավորները կարդում են «Աղվան Հովսեփյանի վերաբերյալ քրեական գործ», եւ մոռանում են իրավաբանությունը, սկսում հորինել՝ ինչ անել, որ կալանավորման ժամկետը երկարացվի։ Այս մասին «Փաստինֆո»-ի հետ զրույցում ասել է փաստաբան Երեմ Սարգսյանը։

«Փաստինֆո»-ի թղթակցի հաղորդմամբ՝ Վերաքննիչ քրեական դատարանում՝ դատավոր Ռուբիկ Մխիթարյանի նախագահությամբ, այսօր կայացել է ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի կալանավորման ժամկետը ևս երկու ամսով երկարացնելու որոշման դեմ բողոքի քննությունը։ Այն դեռևս չի ավարտվել, դատական նիստը հետաձգվել է՝ մինչև ապրիլի 28-ը։

Նիստի ավարտից հետո Երեմ Սարգսյանը «Փաստինֆո»-ի հետ զրույցում ուշադրություն հրավիրեց այն հանգամանքին, որ նախորդ անգամ Աղվան Հովսեփյանի կալանավորման ժամկետը երկարացնելու միջնորդության քննարկման ժամանակ պաշտպանության կողմը պահանջել էր, որ դատավորը քննիչից պահանջի դատախազի ցուցումը՝ հասկանալու, թե ինչ գործողություններ կա կատարելու և արդյո՞ք այդ գործողությունների կատարման ընթացքում, եթե Աղվան Հովսեփյանը մնա ազատության մեջ, կարող է խոչընդոտել, թե ոչ կամ ինչքան պետք է երկարացնի կալանավորման ժամկետը՝ 5 օր, 10 օր, մեկ ամիս, քանի որ, եթե դատարանը չգիտի, թե ինչ գործողություններ պետք է իրականացվի,ապա չի կարող գնահատել, հետևաբար, չի կարող օրինական որոշում կայացնել՝ կալանքի ժամկետը երկարացնելու։ Այդ նիստում դրանք քննիչը չի ներկայացնել, որին ծանոթանալու հնարավորություն պաշտպանական կողմն ստացել է միայն հիմա՝նախաքննության ավարտից հետո, ու ակնհայտ է դարձել, որ կալանքը երկարացվել է կամայական որոշման արդյունքում։

Մասնավորապես, ինչպես նշեց պաշտպանը, դատախազի ցուցումը չի պարունակում այնպիսի հիմքեր, որոնցից ելնելով կարելի ասել, որ կալանավորման ժամկետը պետք է երկու ամիս երկարացվի։ Միակ բանը, որը նշված էր, այն էր, որ դատախազը դեռևս 2019թ քննիչին ցուցում էր տվել հարցաքննելու Վարշամ Ղարիբյանի գործը քննող քննիչներին, դատախազներին, որը, սակայն չի կատարվել և պետք է կատարվեր, բայց այս պահի դրությամբ՝ այդ անձինք դեռևս չեն հարցաքննվել, քննիչն էլ գրավոր դիմել է դատախազին՝ ասելով, որ այդ անձանց հարցաքննության անհրաժեշտություն չի տեսնում։

«Այսինքն՝ Դավիթ Արղամանյանը երկարացրել է կալանքի տակ պահելու ժամկետը մի ցուցումի հիման վրա, որը չուներ և հիմա պարզվեց, որ դրա կարիքը չկար։ Ինչու՞ վարույթ իրականացնող մարմինը ցուցումը չէր տալիս, որովհետև եթե տրամադրեր, ապա կտեսնեին, որ կալանքի ժամկետը երկարացնելու հիմք չկար։ Հիմա հետադարձով տեսնում ենք, որ չկա։ Այս պայմաններում՝ առաջին ատյանը երկարացրեց, Վերաքննիչը թողեց ուժի մեջ, հիմա էլ՝ Վճռաբեկում է։ Պարզվում է՝ կամայականություն է, այսինքն, կարող են փաստաթղթեր չներկայացնել, դատավորն էլ ստիպված մի բան կմտածի, մի բան կհորինի, կգրի և ոչինչ, որ հետո կպարզվի, որ որևէ հիմք էլ չկար»,- արձանագրել է Երեմ Սարգսյանը՝ հավելելով, որ կալանավորման ժամկետի վերջին երկարացման ժամանակ քննիչը պնդել է, թե ցուցումից բխող պահանջներ կան, որոնք պետք է կատարեն, հարցումներ պետք է ուղարկեն։

«Դատավորին ասում ենք՝ այս հարցումների մասով խոչընդոտման հիմք չկա, դատավորը գրում է՝ այո, այս մասով խոչընդոտման խնդիր չեմ տեսնում, բայց դեռևս վկաների նկատմամբ կարող է ազդեցություն գործադրել, մինչդեռ, քննիչը միջնորդությամբ որևէ բան չի նշում վկաների հարցաքննության մասին։ Այսինքն՝ դառնում է, որ դատավորն ինքն է արհեստական հիմք հորինում և դրա հիման վրա կալանքի ժամկետ երկարացնում։ Այս ամենը դատարանում ներկայացրել ենք, տեսնենք՝ այս անգամ ինչ են մոգոնելու։ Սա այն գործն է, որ դատավորները կարդում են՝ «Աղվան Հովսեփյանի վերաբերյալ քրեական գործ» մոռանում են իրավաբանությունը, տարրական իրավաբանությունն անտեսում են և սկսում են հորինել, որ կալանավորման ժամկետը երկարացվի»,- նշեց փաստաբանը։

Հիշեցնենք, որ Աղվան Հովսեփյանը ձերբակալվել է սեպտեմբերի 7-ին՝ առավոտյան։ Նախաքննական մարմինը շուրջ 1.5 տարի քննվող քրեական գործի շրջանակներում մեղադրանք է առաջադրել Հովսեփյանին և նրա նկատմամբ որպես խափանման միջոց ընտրել կալանավորումը։ Ընդ որում՝ դատարանները բավարարել են քննիչի միջնորդությունները՝ կալանավորումը որպես խափանման միջոց ընտրելու կամ այն երկարացնելու մասին՝ ընդունելով հանդերձ, որ հիմքեր չկան կարծելու , որ նա կարող է թաքնվել քննությունից։

Հեղինակ՝ Իզաբել Սահակյան

Աղբյուր` Փաստինֆո