Փաստ ինֆո

Եվրոպայի խորհրդի նախագահ Շառլ Միշելը բանակցություններից հետո չափավոր օպտիմիզմ է հայտնել,  որ կողմերը որոշակի պատրաստակամություն են հայտնել շարժվելու առաջ այդ ուղղությամբ։ Դեռ վաղ է խոսել որևէ հստակությունների մասին, բայց կարծես թե կա ընդհանուր մոտեցում և կա ընդհանուր ցանկություն՝ առաջ գնալ բանակցությունների շրջանակներում։ Այս մասին լրագրողների հետ զրուցյում ասաց ԱԺ «Քաղաքացիական պայմանագիր» խմբակցության պատգամավոր Վլադիմիր Վարդանյանը՝ անդրադառնալով Բրյուսելում կայացած Փաշինյան-Ալիև-Շառլ Միշել բանակցություններին։ 

Ինչպես արդեն տեղեկացրել ենք՝ երեկ 4,5 ժամ տեւած բանակցությունների արդյունքներով ձեռք է բերել պայմանավորվածություն` 2021թ. նոյեմբերի 26-ին Սոչիում ձեռք բերված համաձայնության համաձայն` մինչև ապրիլի վերջ ստեղծել Հայաստանի և Ադրբեջանի միջև սահմանների դելիմիտացիայի հարցերով երկկողմ հանձնաժողով, որը օժտված կլինի նաև սահմանի երկայնքով անվտանգություն և կայունություն ապահովելու հարցերով:

 
Միաժամանակ Հայաստանի վարչապետը և Ադրբեջանի նախագահը Արտաքին գործերի նախարարներին հանձնարարել են մեկնարկել երկու երկրների միջև խաղաղության բանակցությունների նախապատրաստական աշխատանքները։

Ըստ ՀՀ կառավարության պաշտոնական հաղորդագրության՝ Նիկոլ Փաշինյանը բանակցությունների ժամանակ անդրադարձել է ադրբեջանական ստորաբաժանումների վերջին գործողությունների հետևանքով Արցախում ստեղծված իրավիճակին, հումանիտար խնդիրներին, սակայն Միշելի հայտարարության մեջ Արցախի մասին որեւէ հիշատակում չկա։

Վլադիմիր Վարդանյանը, ըստ էության, խուսափեց պատասխանել հարցին, թե ովքեր կարող են ներգրավված լինել հանձնաժողովի կազմում՝ նշելով, որ այդ հստակությունը չի կարող լինել հիմա, քանի որ հանդիպումը երեկ ուշ երեկոյան է ավարտվել։

Դիտարկմանը, որ հայտարարության մեջ չկար որևէ խոսք՝ Արցախի կարգավիճակի վերաբերյալ՝ Վարդանյանը կրկին խուսանավեց՝ նշելով, թե բազում հարցերում, դիտարկումներում, հայտարարություններում ընդգծվել է Արցախի ժողովրդի իրավունքների հետ կապված հարցերը, որոնք պետք է  կարգավորվել՝ ելնելով նրանից, որ մենք ունենք ժողովուրդ, որն ունի որոշակի իրավունքներ և որոնք պետք է իրագործվեն։

«Տվյալ պարագայում խոսքը գնացել է Հայաստան-Ադրբեջան հարաբերությունների և նախկինում ձեռք բերված պայմանավորվածությունների ըստ էության կատարման և փոխվստահության մթնոլորտի ձևավորման մասին»,-նշեց Վարդանյանը, ինչին արձագանքելով լրագրողն արձանագրեց, որ Ադրբեջանը նախապայմաններով է խոսում և, որ թեև Վարդանյանը նշել է, որ Հայաստան-Ադրբեջան հարաբերությունների մասին է խոսքը, բայց գիտենք, որ հստակ որպես նախապայման ներկայացվում է Արցախի հարցը։

Դիտարկմանն ի պատասխան Վարդանյանը հայտարարեց, թե բանակցությունները հաջողությամբ պսակվելու մեկ կարևոր գրավական ունեն՝ ճկունությունն է և այնպիսի իրավիճակի չստեղծումը, որը կարող է խոչընդոտել գործընթացները, իսկ տվյալ պարագայում ներկայացվել են առաջարկներ, դրան պատասխան առաջարկներ են ներկայացվել, ԵԱՀԿ Մինսկի խումբը տեղեկացված է, գործընթացը շարունակվում է։

Հարցին՝ արդյո՞ք շուտ չէ սահմանագծման և սահմանազատման մասին խոսելը, քանի որ Ադրբեջանը դեռևս ՀՀ սուվերեն տարածքում է և պետք է լքի այն՝ Վլադիմիր Վարդանյանը պատասխանեց. «Միշտ չէ, որ դիվանագիտության մեջ պետք է փորձեք պատասխանները տեքստերում գտնել, փորձեք նաև տողերի արանքում գրվածը հաշվի առնել։ Երբ խոսվում է փոխվստահության, անվտանգության որոշակի մթնոլորտ ձևավորելու մասին, սա նաև ենթադրում է որոշակի միջոցառումների ձեռնարկում, որոնք հետագայում հնարավորություն կտան խուսափելու որևէ տեսակի միջադեպերից»։

Աղբյուր` Փաստինֆո