Փաստ ինֆո

ԲԴԽ-ն հեռացել է խորհրդակցական սենյակ՝ Երևանի ընդհանուր իրավասության դատարանի դատավոր Արտուշ Գաբրիելյանին կարգապահական պատասխանատվության ենթարկելու միջնորդության վերաբերյալ որոշում կայացնելու։

Ինչպես արդեն տեղեկացրել ենք՝ Երևանի ընդհանուր իրավասության դատարանի դատավոր Արտուշ Գաբրիելյանի նկատմամբ կարգապահական վարույթ է հարուցվել՝ ՀՀ գլխավոր դատախազի տեղակալ Գևորգ Բաղդասարյանի հաղորդման հիման վրա։

«Փաստինֆո»-ի թղթակցի հաղորդմամբ՝ ԲԴԽ-ում այսօր կայացած նիստի ընթացքում ՀՀ արդարադատության նախարարի խորհրդական Գագիկ Հարությունյանը ներկայացրել է միջնորդությունը՝ նշելով, որ դատավոր Արտուշ Գաբրիելյանը 2021թ ապրիլի 30-ի որոշմամբ թույլ է տվել քրեական դատավարության օրենսգրքի 135-րդ հոդվածի 1-ին, 2-րդ մասերում ամրագրված պահանջների խախտում։

«Դատարանը, գործով քննության առնելով մեղադրյալի նկատմամբ կալանավորումը որպես խափանման միջոց կիրառելու մասին միջնորդությունը, որոշել է մերժել այն՝ վերջինիս՝ հանցագործություն կատարած լինելու հիմնավոր կասկածի բացակայության պատճառով, սխալ է մեկնաբանել քրեական օրենսգրքի 177-րդ հոդվածը. մեկնաբանել է մինչև 2019-ի դեկտեմբերի 14-ը եղած խմբագրությամբ: Ուստի հանգել է ոչ իրավաչափ եզրահանգման, արդյունքում չի քննել կալանավորման հիմքերի առկայության հարցը»,- նշեք է Գագիկ Հարությունյանը՝ հավելելով, որ վարույթի ընթացքում դատավորը ներկայացրել է բացատրություններ, որոնցում հիմնականում հայտնել է, որ որոշմամբ մեկնաբանել է գործող, ոչ թե՝ նախորդ խմբագրությամբ նյութական նորմը, ներկայացրել է այդ ուղղությամբ վերլուծություններ, ինչի արդյունքում կալանավորման պայմանին տվել է իրավաչափ գնահատական և հիմքերին չի անդրադարձել իրավաչափորեն։

Հարությունյանի խոսքով՝ եթե դատավորն առաջնորդվեր քրեական օրենսգրքի գործող խմբագրությամբ և մեղադրյալի խափանման միջոցի հարցը քններ, ապա չէր կարող չառաջանալ դրա անհրաժեշտությունը: Նախարարության ներկայացուցիչը գտնում է, որ դատավորի կողմից դատավարական իրավական նորմի խախտումը կատարվել է մեղավորությամբ, որը դրսևորվել է դիտավորությամբ։ Դատավոր Արտուշ Գաբրիելյանը ԲԴԽ-ում չցանկացավ դիրքորոշում ներկայացնել՝ նշելով, որ ստանալով արդարադատության նախարարության կողմից իր վերաբերյալ կարգապահական վարույթ հարուցելու միջնորդությունը՝ համապատասխան պատասխան է պատրաստել, որն ուղարկել է և՛ ԲԴԽ, և՛ արդարադատության նախարարին, հետևաբար այս պահին ավելացնելու որեւէ բան չունի։

Դատավորը նաև նշեց, որ օգտվում է իր իրավունքներից՝ հրաժարվելով պատասխանել նախարարության ներկայացուցիչների և ԲԴԽ անդամների հարցերին, ինչին արձագանքելով Գագիկ Ջհանգիրյանն արձագանքեց. «Մեզ էլ հետը՝ բիրիքով: Դե, որ ասում է՝ «նաս նետ, սուդա՝ նետ: Նստեք, որ հրաժարվում եք»։

Նախարարության ներկայացուցիչները պնդեցին միջնորդությունը։

Կողմերի դիրքորոշումը լսելուց հետո ԲԴԽ-ն հեռացել է խորհրդակցական սենյակ՝ որոշում կայացնելու։ Որոշումը կհրապարակվի ապրիլի 18-ին, ժամը՝ 15.00-ին։

Հեղինակ՝ Իզաբել Սահակյան

Աղբյուր` Փաստինֆո