Փաստ ինֆո

Արցախի նպատակն է միանալ Մայր Հայաստանին, բայց եթե պահն օրհասական լինի և ընտրության առաջ կանգնենք՝ Ադրբեջան, թե Ռուսաստան, միանշանակ, Արցախի փրկության համար այլ տարբերակ չի կարող լինել, քան Ռուսաստանին միանալը::

Նշենք, որ տևական ժամանակ է համացանցում լուրեր են շրջանառվում, թե Արցախում ոչ հրապարակային ստորագրահավաք են անց կացնում՝ Ռուսաստանի կազմի մեջ մտնելու հարցով:

«Փաստինֆո»-ի հետ զրույցում Արցախի պատգամավոր Մետաքսե Հակոբյանը հայտնեց, որ Արցախում նման հարցով ստորագրահավաք չի անց կացվում, զրուցակիցն ընդգծեց, որ Ռուսաստանի կազմի մեջ մտնելը կքննարկվի ծայրահեղ դեպքում՝ Արցախի ֆիզիկական ոչնչացումը կանխելու համար.

«Ես չեմ տեսել, որ ստորագրահավաք լինի, եթե սկսեին նման բան, Ստեփանակերտից կսկսվեր, Արցախը փոքր է, կտեսնեինք: Հավանաբար, հանրության շրջանում պտտվող խոսակցություններ են, քանի որ հանրությունը հասկանում է, որ այս իշխանությունները որևէ կերպ չեն ճանաչելու Արցախի անկախությունը, չեն նպաստելու այդ գործընթացին, մտածում են, որ միանգամից պետք է սկսենք Ռուսաստանին միանալու գործընթացը, որպեսզի հետագայում կարողանանք փրկել Արցախը, բայց սրանք ուղղակի լուրեր են: Նայելով Հայաստանի իշխանությունների գործողություններին՝ շատերը հասկանում են, որ իրենք հօգուտ Արցախի քաղաքական լուծում չեն տալու, այս պարագայում, եթե ընկնենք փակուղի, ֆիզիկական վերացման առաջ կանգնած լինի Արցախը , ստիպված ընտրության առաջ կանգնենք Ադրբեջան, թե Ռուսաստան, բնականաբար, հանուն փրկության պետք է ընտրենք Ռուսաստանը, բայց չեմ կարծում, որ հիմա մենք այդ իրավիճակում ենք, համարում ենք, որ այս պահին դեռ կարող ենք Արցախի ֆիզիկական բնաջնջումը կասեցնել».-ասաց Հակոբյանը՝ հավելելով, որ այսպիսի գործընթացը նաև քաղաքական առումով իրատեսական չէ, քանի որ այն բավականին երկար և բարդ գործընթաց է:

Ըստ պատգամավորի՝ ստեղծված աղետից որպես փրկություն կարող է լինել Արցախի անկախության ճանաչումը: Զրուցակիցն ընդգծեց՝ պետք է ստիպել Հայաստանի իշխանություններին, որպեսզի ճանաչեն Արցախի անկախությունը, կամ էլ դիմեն Ռուսաստանին, այլ պետության, որ ճանաչեն Արցախի անկախությունը.

«Եթե սա էլ չեն անում, ուրեմն պետք է պահանջենք, որ բոլոր դիվանագիտական խողովակներով Արցախի ձայնը լսելի դարձնեն, Արցախի համար մշտապես խոսել են Հայաստանի իշխանությունները, իհարկե, խորհրդակցելով Արցախի իշխանությունների հետ, թող միջնորդ հանդիսանան և այդ խողովակները տան Արցախին, որպեսզի Արցախը կարող է նաև ուղիղ Ռուսաստանի հետ՝ իր ճակատագրի վերաբերյալ, սրանք իրատեսական ելքեր են»,-ասաց զրուցակիցը:

Մետաքսե Հակոբյանին խոսքով՝ արցախցիները ևս հակված չեն Ռուսաստանի կազմի մեջ մտնելուն,ավելին՝ ըստ նրա, հանրության շրջանում ՌԴ կազմի մեջ մտնելու մասին խոսակցությունները խուճապի արդյունք են, ինչն էլ իր հերթին Արցախի իշխանությունների պահվածքի հետևանքն է

«Արցախում չկա մի ընտանիք, որ 90-ականներից առ այսօր գոնե մեկ զոհ տված չլինի ազատագրական պայքարի համար, իրենք բոլորը գիտակցում են, որ բոլոր զոհերը հանուն Հայաստանի միացման են և իրենց համար ամենակարևոր նպատակն է միանալ Հայաստանին, իրենք էլ են նույնկերպ մտածում »,-ասաց Հակոբյանը:

Արցախցի պատգամավորը չի բացառում, որ ՌԴ կազմի մեջ մտնելու խոսակցությունները Հայաստանի իշխանություններից է դուրս գալիս.

«Այսօր Հայաստանում լրիվ այլ զգացում է, ամեն դեպքում երեկվա հանրահավաքից արդեն պարզ դարձավ , որ առաջվա մի քանի հոգին չեն, շատ մարդ կար հրապարակում, այդ մարդիկ իրականում Արցախով են մտահոգված, հիմա իշխանություններն ուզում են ցույց տալ, թե Հայաստանում պայքարում են Արցախի, համար բայց արցախցին չի ուզում ձեզ, շարունակում են բաժանարար սեպ խրել, ատելություն մտցնել հայկական երկու պետությունների մեջ, իրենց այդ տեխնոլոգիաներին վաղուց ծանոթ ենք»,-եզրափակեց Մետաքսե Հակոբյանը:

Աղբյուր` Փաստինֆո