Փաստ ինֆո

«Պատմության ուսուցչի» գործով դատարանն անթույլատրելի ճանաչեց մեղադրանքի հիմքում դրված և գործի համար առանցքային նշանակություն ունեցող ձայնագրությունը՝ անհայտ աղբյուրից ձեռք բերված լինելու հիմքով՝ բավարարելով պաշտպանի միջնորդությունը։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Մնացական Մարտիրոսյանի նախագահությամբ, այսօր կայացել է պատմության ուսուցիչ Հակոբ Գրիգորյանի գործով դատական նիստը։

Դատարանում հարցաքննվեց գործով վերջին վկան՝ դպրոցի նախկին տնօրենը, որն այժմ աշխատում է որպես ուսուցիչ։ Նա պատմեց, որ վերջին տարիների ընթացքում պատմության չորս ուսուցիչ է ընդունել, որոնք դուրս են եկել աշխատանքից, հետո՝ աշխատանքի է ընդունել Հակոբին, որն իրենց կուրսի լավագույն ուսանողն էր, իսկ որպես ուսուցիչ՝ իրենով հիացած էին բոլորը, հատկապես՝ ծնողները, որոնք նշում էին, որ «հազիվ երեխաները պատմություն և հայրենասիրություն են սովորել»։

Ինչ վերաբերում է դեպքին, դպրոցի նախկին տնօրենը նշեց, որ մշտապես ուսուցիչներին ասել է՝ դրսից ոչինչ չբերել, իսկ համացանցում՝ ձայնագրության տարածումից հետո Հակոբ Գրիգորյանն ինքն է դիմում ներկայացրել՝ աշխատանքից ազատվելու մասին։ Վկան, որը մասնագիտությամբ ևս պատմության ուսուցիչ է, 37 տարի պատմություն է դասավանդում, նկատեց, որ պատմության ուսուցիչը կարող է քաղաքականությունից խոսել՝ համեմատելով նախկին իրավիճակները՝ ներկայի հետ, քանի որ ամբողջը պատմություն է։

Վկայի հարցաքննության ավարտից հետո դատարանում ցուցմունք տվեց ամբաստանյալը՝ պատմության ուսուցիչը։ Նա պատմեց, որ դասը չի օգտագործել այլ նպատակի համար և, որ ուսուցիչը չի դիտվում որպես պաշտոնատար անձ։ Դասի թեման եղել է միջնադարը՝ թուրքմենական ցեղերին վերաբերող, իսկ ուսուցիչը պետք է ակտուալացներ աշխատանքը։

«Առաջին անգամ նրանք Տիգրիս եկան, անցան Արևմտյան Հայաստան՝ 1475թ-ին։ 547 տարի է այդ օղյուս ցեղի ձեռքին տառապում ենք՝ մինչև հիմա։ Հիմա, ճիշտ է, կեղծ հայրենասիրություն են մեզ հետ խաղում, բայց սահմանին մեր տղաները մահանում են»,-պատմեց ուսուցիչը՝ հավելելով, որ 44-օրյա պատերազմը ցույց տվեց, որ պատմությունը, ցավոք սրտի, սպիրալաձև կրկնվում է՝ մեզ համար ողբերգական ելևէջներով։ Նա շեշտեց, որ ինքը քաղաքականությամբ չի զբաղվում, որևէ կուսակցության չի անդամակցել, միայն՝ ԽՍՀՄ տարիներին ընդունվել է Կոմկուսի շարքերը, քանի որ այդ տարիներին սովորում էր ասպիրանտուրայում և դիսերտացիայի վրա աշխատելու համար ինքը պետք է ծանոթանար արխիվներիրն, ինչի համար պետք էր լինել կուսակցական։

Նա պատմեց, որ դասի ընթացքում, երբ դեպքը տեղի է ունեցել, որն այդքան էլ լավ չի հիշում, կապված էր ստացված լուրի հետ, որ թուրքերն ինչպես ամբողջ Արցախում, այնպես էլ՝ Մեծ Թաղլարում, որտեղ ծնվել է իր պապը, մայրը, ավիրել են խաչքարերը, եկեղեցին, պատմամշակութային բոլոր հուշարձանները, Հայրենական պատերազմին զոհերի հիշատակին նվիրված հուշարձանը, ինչը յուրաքանչյուր հայի համար ցավ է և, երևի այն, ինչ ասել է՝ եղել է այդ ապրումների, զգացմունքների ազդեցության տակ։

Ընդ որում, Գրիգորյանը հայտնեց, որ ձայնագրության տարածումից հետո իր հասցեին վիրավորական արտահայտություններ, ատելության խոսք է հնչել։

«Ես հասկանում եմ, որ նման բան չպետք է ասեի, բայց ես ինձ մեղավոր չեմ համարում, չեմ գտնում, որ հանցանք եմ կատարել, որի համար պետք է պատասխանատվություն կրեմ»,-նշեց Գրիգորյանը՝ հավելելով, որ իր նախկին ցուցմունքներից գրեթե ոչինչ չի հիշում, քանի որ ոստիկանություն ներկայացել էր շատ անտրամադիր, զարմացած վիճակում, հետևաբար, հրաժարվում է իր նախկին ցուցմունքներից, իսկ ձայնագրությունը, որը դրված է մեղադրանքի հիմքում, համարում է ապօրինի՝ անհայտ ծագումով։

«Այդ ո՞նց եղավ՝ ինձ ձայնագրեցին, գործ հարուցեցին, իսկ իմ հասցեին շատ ավելի վատ բան ասողները մնում են անպատիժ։ Դրանից բացի՝ մեղադրում էին ինձ, ԿԳՄՍ-ին և նախկին տնօրենին՝ իբրև շղթայի մեջ լինելու և անօրինական գործողություններ կատարելու համար։ Ինչ-որ մատյաններ էին նկարել՝ չգիտեմ որ դպրոցի և ոչ պատմության առարկայի և դա էլ էին ինձ վերագրում»,-պատմեց Գրիգորյանը՝ հայտնելով, որ իր մեղավորությունն այն էր, որ ինքն առանց փաստաբանի էր գնացել հարցաքննության, ճնշված է եղել, միայնակ և իրեն թվում էր, թե ամբողջ համակարգն իր դեմ է եղել, չի հասկացել պաշտպանի անհրաժեշտությունը։

Գրիգորյանի հարցաքննությունից հետո, նրա պաշտպան Ռուբեն Մելիքյանը միջնորդություն ներկայացրեց՝ պահանջելով, որ մեղադրանքի հիմքում որպես ապացույց դրված ձայնագրությունը, որն անհայտ աղբյուրից ներբեռնել էր ոստիկանը, ճանաչվի անթույլատրելի։

Մելիքյանն ընդգծեց, որ առկա չէ որևէ տեղեկություն, թե որն է այդ ձայնագրության աղբյուրը, մասնավորապես, արդյոք այն սահմանված ընթացակարգերի պահպանմամբ ձեռք է բերվել օպերատիվ-հետախուզական գործունեության արդյունքում, թե կոնկրետ քաղաքացուց կամ համացանցից՝ կոնկրետ հասցե ունեցող կոնկրետ կայքից, ավելին, առկա չէ տվյալ, թե ինչպիսի դատավարական գործողությունների արդյունքում է նշված փաստաթուղթն ամրագրվել ոստիկանության համապատասխան բաժանմունքի պետ Խաչատրյանի կողմից և դարձել զեկուցագրի բաղկացուցիչ մաս, առկա չէ նաև որևէ ապացույց, որը կնկարագրեր ձայնագրության առաջացման և ստացման հանգամանքները, մինչդեռ, Քրեական դատավարության օրենսգրքի համաձայն՝ անհայտ աղբյուրից ձեռք բերված ապացույցները թույլատրելի համարվել չեն կարող։ Դատավոր Մնացական Մարտիրոսյանը բավարարեց միջնորդությունը՝ հաստատելով ձայնագրառման անթույլատրելի լինելը։ Դատական նիստը հետաձգվեց։

Հիշեցնենք, որ Երևանի Գայի անվան թիվ 129 հիմնական դպրոցի ուսուցիչ Հակոբ Գրիգորյանը մեղադրվում է ՀՀ քրեական օրենսգրքի 226,2-րդ հոդվածի 2-րդ մասի 2-րդ կետի հատկանիշներով։ Ըստ նախաքննական մարմնի, պատմության ուսուցիչը համաձայն չի եղել ՀՀ վարչապետ Նիկոլ Փաշինյանի վարած քաղաքականության հետ և 2021 թվականի մայիսի 21-ին՝ 7-րդ դասարանի պատմության դասաժամին, աշակերտների ներկայությամբ, իբր, հանդես է եկել ՀՀ վարչապետ Նիկոլ Փաշինյանի և նրա ընտանիքի անդամների նկատմամբ բռնություն գործադրելու հրապարակային կոչերով, այն է՝ հայտարարել է, որ Նիկոլ Փաշինյանին պետք է սպանել, նրան և նրա ընտանիքին պետք է հրապարակում վառել:

Նախաքննության ընթացքում Գրիգորյանն ընդունել է առաջադրված մեղադրանքը և զղջացել կատարվածի համար։

Հեղինակ՝ Իզաբել Սահակյան

Աղբյուր` Փաստինֆո