Փաստ ինֆո

Մեր հայրենիքը վտանգված է ու այլևս չենք կարող հանդուրժել ո՛չ բզկտմանը, ո՛չ բզկտողներին։ Այս կարծիքն արտահայտեց Ազատության հրապարակում ընդդիմության հրավիրած հանրահավաքին մասնակցող ԱԺ «Հայաստան» խմբակցության  պատգամավոր Վահե Հակոբյանը՝ հավելելով, որ այսօր՝ մեր առջև ծառացած է ոչ միայն Արցախի անվտանգության խնդիրը, այլ նաև՝ Հայաստան պետության։ Այսօր մեր ազգի գերխնդիրը՝ միավորվելն ու զանգ խփելը պետք է լինի։  

«Գրեթե մեկ տարի է Ադրբեջանի ԶՈՒ գտնվում է Հայաստանի սուվերեն տարածքում։ Եվ որևէ մեկը չի կարող երաշխավորել, որ թշնամու մտքով չի անցնի վաղն ավելի խորանալ մեր տարածքում՝ չհանդիպելով որևէ դիմադրության։ Սյունեցին առաջինն է թշնամուն տեսնում իր աչքերով ու իր պատուհանից։ Ամեն օր վախ ու սարսափով իր երեխային ուղարկում է դպրոց։ Սյունեցին ու արցախցին այսօր մենակ են թշնամու առաջ։ Իսկ Ադրբեջանը շարունակում է լկտիանալ ու ախորժակը մեծացնել»,-ասում է պատգամավորը և ավելացնում, որ Ադրբեջանն այնքան է լկտիացել, որ արդեն Արցախում Ռուսաստանի խաղաղապահ զորախմբի վերահսկողության տակ գտնվող գոտում  ոտնձգություններ է սկսել Արցախի քաղաքացիների նկատմամբ՝ դիմելով տարբեր միջոցների, այդ թվում ՝ հոգեբանական ճնշումներից մինչև հումանիտար աղետ՝ պարտադրելով արցախցուն լքել իր բնակավայրը։ 

Պատգամավորը հավելեց, որ այս ամենին զուգահեռ Նիկոլը Փաշինյանը շարունակում է խաղաղության դարաշրջանի իր կեղծ օրակարգը բերել առաջին պլան։ Վահե Հակոբյանի գնահատմամբ՝ Ադրբեջանը Թուրքիայի ձեռքը բռնած  հայ-ադրբեջանական խաղաղության հիմքում պարտադրում է 5 կետ, որը բխում են միայն Ադրբեջանի շահերից։ 

«Մեր երկիրն այսօր հանել են աճուրդով վաճառքի։ Այսօր քննարկում ենք ինչ կստորագրի, ինչ չի ստորագրի։ Միևնույն է գալու մեր թշնամու թելը թելի՝ ի վնաս Հայաստանի»,-ասաց պատգամավորը։

Մանրամասները՝ տեսանյութում

Աղբյուր` Փաստինֆո