Փաստ ինֆո

Գարնանացանի աշխատանքների մեկնարկը մոտենում է, բայց գյուղացին սերմացու չունի․ այս տարի սերմացուի սուբսիդավորում չի եղել։ Վարդենիս խոշորացված համայնքի Արեգունի գյուղի բնակիչները չգիտեն՝ որտեղից սերմացու գտնեն, որ վարելահողերն անմշակ չմնան։

«Գյուղացիների 90 տոկոսը կոտրակ տաշտակի առաջ է կանգնել։ Քանի որ սերմացու չկա, պետությունն էլ ոչնչով չի օգնում, վարելահողերի մեծ մասը որպես խոտհարք կծառայեն»,-«Փաստինֆո»-ի հետ զրույցում ասում է Արեգունիի վարչական ղեկավար Սոս Հովհաննիսյանը։

Գյուղին պատկանող ավելի քան 800 հա վարելահողերի չնչին մասը կծառայի նպատակին։ Գյուղի վարչական ղեկավարը վստահեցնում է՝ սերմացու հայթայթել քչերը կկարողանան, իսկ դա նշանակում է, որ թե՛ գյուղացին ու իր անասունը, թե՛ քաղաքում ապրողը դրա հետևանքները զգալու են։

«Որ ցորեն, գարի չցանեն, որտեղի՞ց պիտի հնձեն։ Արդեն քանի տարի է՝ մեկ հեկտարից 250-300 կգ բերք ենք ստանում։ Քանի անգամ դիմել ենք, տեղեկացրել, որ մեր մոտի հողերի բերքատվությունը ցածր է, ասֆալտի համար խճի տեղ կարող են օգտագործել, գոնե հողի հարկը վերանայեն, Արարատյան դաշտի հողերի պես չհարկվեն։ Մինչև հիմա ոչ մի արձագանք չի եղել»,-նշում է Հովհաննիսյանը։

Արեգունիից Գեղարքունիքի մարզպետարանին ու կառավարությանը շատ նամակներ ու առաջարկներ են ուղարկել․ բոլորն էլ, ինչպես գյուղի վարչական ղեկավարն է ասում, «նամակ ռուսաց թագավորին» հայտնի գրության ճակատագրին են արժանացել։

«Մի քանի անգամ եկել են սպիտակ թուղթը սևացրել, գնացել։ Ոչ մեկը ոչ մի բան չի արել։ Գյուղացին, Թումանյանի ասած, «մի կտոր չոր հաց, էն էլ՝ երկնքից կախված» վիճակում է։ Արդեն քանի տարի է՝ մեկ երաշտ է, մեկ՝ կարկուտ, բերք չենք ունենում»,-ասում է Հովհաննիսյանը։

2021թ․ մայիսից, երբ ադրբեջանցիները ներխուժեցին ՀՀ սուվերեն տարածք ու հաստատվեցին Գեղարքունիքի մարզում ևս, սահմանամերձ բնակավայրերը նաև արոտատեղին չեն կարողանում օգտագործել։

Նույն խնդիրները նաև Ջաղացաձորում են։ Վարչական ղեկավար Մանվել Մինասյանն ասում է՝ գարնանացանի աշխատանքները մոտ երկու շաբաթից նոր կկարողանան սկսել, բայց թե ինչով, իրենք էլ չգիտեն։ Սերմացու գտնելու հարցով մտահոգ են բոլորը․ պարտքով ով կարողացավ, կվերցնի, կցանի, ով՝ չէ, չի ցանի։ Պարտքն էլ հարցական է՝ կկարողանան վերադարձնել, թե ոչ։ Եղանակը եթե անակնկալներ մատուցի, գյուղացին ավելի մեծ խնդիրների առաջ կկանգնի։ Հովհաննիսյանի խոսքով՝ գյուղացիներին օգնելու ցանկությունը մեծ է, բայց հնարավորություն չկա․ խնդիրները բազմաթիվ են ու միայն իրենց ջանքերով չեն կարող լուծել։

Աղբյուր` Փաստինֆո